(نبی کریم صلی اللہ علیہ وسلم نے فرمایا:)
”میں نکاح کے ذریعے پیدا ہوا ہوں، زنا کے ذریعے نہیں، آدم علیہ السلام کے زمانے سے لے کر میرے والدین کے مجھے جنم دینے تک، مجھے جاہلیت کے زنا میں سے کچھ بھی نہیں چھوا۔“ [صحيح الجامع الصغير وزيادته/حرف الخاء./حدیث: 3225]

(نبی کریم صلی اللہ علیہ وسلم نے فرمایا:)
”میں تمہیں شبِ قدر کے بارے میں بتانے کے ارادے سے نکلا تھا، مگر دو آدمی آپس میں جھگڑ پڑے تو یہ علم مجھ سے اٹھا لیا گیا، پس اسے آخری عشرے میں تلاش کرو: باقی رہ جانے والی ساتویں، نویں یا پانچویں رات میں۔“ [صحيح الجامع الصغير وزيادته/حرف الخاء./حدیث: 3226]

(نبی کریم صلی اللہ علیہ وسلم نے فرمایا:)
”قیامت کی نشانیوں کا ایک کے بعد ایک ظاہر ہونا اسی طرح لگاتار ہو گا جیسے مالا میں موتی ایک دوسرے کے پیچھے پروئے ہوتے ہیں۔“ [صحيح الجامع الصغير وزيادته/حرف الخاء./حدیث: 3227]

(نبی کریم صلی اللہ علیہ وسلم نے فرمایا:)
”میری امت کے لیے خواہشات پر قابو پانے کا ذریعہ روزہ اور قیام ہے۔“ [صحيح الجامع الصغير وزيادته/حرف الخاء./حدیث: 3228]

(نبی کریم صلی اللہ علیہ وسلم نے فرمایا:)
”منافق میں دو خصلتیں اکٹھی نہیں ہوتیں: اچھی سیرت اور دین کی سمجھ۔“ [صحيح الجامع الصغير وزيادته/حرف الخاء./حدیث: 3229]

(نبی کریم صلی اللہ علیہ وسلم نے فرمایا:)
”دو خصلتیں ایسی ہیں کہ جو مسلمان بندہ ان کی پابندی کرے وہ جنت میں داخل ہو گا، خبردار! یہ آسان ہیں مگر ان پر عمل کرنے والے کم ہیں: ہر نماز کے بعد دس بار سبحان اللہ کہے، دس بار الحمدللہ کہے اور دس بار اللہ اکبر کہے، یہ زبان سے ایک سو پچاس اور میزان میں پندرہ سو بنتے ہیں، اور جب اپنے بستر پر جائے تو چونتیس بار اللہ اکبر کہے، تینتیس بار الحمدللہ کہے اور تینتیس بار سبحان اللہ کہے، یہ زبان سے سو اور میزان میں ایک ہزار بنتے ہیں، تو تم میں سے کون ہے جو ایک دن رات میں ڈھائی ہزار گناہ کرتا ہو؟“ [صحيح الجامع الصغير وزيادته/حرف الخاء./حدیث: 3230]

(نبی کریم صلی اللہ علیہ وسلم نے فرمایا:)
”داؤد علیہ السلام پر قرآن (زبور) کی تلاوت آسان کر دی گئی تھی، وہ اپنی سواریوں کو زین کسنے کا حکم دیتے اور سواریوں کے زین کسے جانے سے پہلے ہی قرآن (زبور) پڑھ چکے ہوتے، اور وہ اپنے ہاتھ کی کمائی کے سوا کچھ نہیں کھاتے تھے۔“ [صحيح الجامع الصغير وزيادته/حرف الخاء./حدیث: 3231]

(نبی کریم صلی اللہ علیہ وسلم نے فرمایا:)
”میں نے تمہارے پیچھے دو چیزیں چھوڑی ہیں، ان کے بعد تم کبھی گمراہ نہیں ہو گے: اللہ کی کتاب اور میری سنت، اور یہ دونوں کبھی جدا نہیں ہوں گی یہاں تک کہ حوض پر میرے پاس آ پہنچیں۔“ [صحيح الجامع الصغير وزيادته/حرف الخاء./حدیث: 3232]

(نبی کریم صلی اللہ علیہ وسلم نے فرمایا:)
”اللہ تعالیٰ نے آدم علیہ السلام کو اپنی خاص صورت پر پیدا کیا، اور ان کا قد ساٹھ ہاتھ تھا، پھر فرمایا: جاؤ اور ان لوگوں کو سلام کرو - اور وہ فرشتوں کی ایک جماعت بیٹھی ہوئی تھی - اور سنو کہ وہ تمہیں کس طرح جواب دیتے ہیں، کیونکہ یہی تمہارا اور تمہاری اولاد کا سلام ہو گا۔ چنانچہ وہ گئے اور کہا: السلام علیکم، تو انہوں نے جواب دیا: السلام علیک ورحمۃ اللہ، تو انہوں نے ورحمۃ اللہ کا اضافہ کیا۔ پس جو بھی جنت میں داخل ہو گا وہ آدم علیہ السلام کی صورت پر ساٹھ ہاتھ قد کا ہو گا، اور اس کے بعد سے اب تک مخلوق کا قد مسلسل کم ہوتا رہا ہے۔“ [صحيح الجامع الصغير وزيادته/حرف الخاء./حدیث: 3233]

(نبی کریم صلی اللہ علیہ وسلم نے فرمایا:)
”اللہ تعالیٰ نے آدم علیہ السلام کو پیدا کیا، پھر ان کے دائیں کندھے پر ہاتھ مارا تو اس میں سے ایک سفید نسل نکالی جیسے وہ دودھ ہوں، پھر ان کے بائیں کندھے پر ہاتھ مارا تو اس میں سے ایک سیاہ نسل نکالی جیسے وہ کوئلہ ہوں، پھر فرمایا: یہ جنت میں جانے والے ہیں مجھے کوئی پروا نہیں، اور یہ جہنم میں جانے والے ہیں مجھے کوئی پروا نہیں۔“ [صحيح الجامع الصغير وزيادته/حرف الخاء./حدیث: 3234]