سیدنا جابر بن عبداللہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”بلاشبہ اللہ تعالیٰ نہایت حیا فرمانے والا اور صاحبِ کرم ہے، وہ اپنے بندے سے اس بات پر حیا فرماتا ہے کہ جب وہ اس کی بارگاہ میں اپنے ہاتھ (دعا کے لیے) بلند کرے تو وہ انہیں خالی لوٹا دے کہ ان میں کچھ بھی (خیر و مراد) نہ ہو۔“ [مسند أبي يعلى الموصلي/مسند جابر/حدیث: 1867]

سیدنا جابر رضی اللہ عنہ سے روایت ہے کہ ہم رسول اللہ صلی اللہ علیہ وسلم کے ہمراہ بازار میں موجود تھے کہ اچانک ایک خاتون نے آپ صلی اللہ علیہ وسلم کی سواری کی لگام تھام لی، جبکہ آپ صلی اللہ علیہ وسلم ایک گدھے پر سوار تھے، اس خاتون نے عرض کیا: ”اے اللہ کے رسول صلی اللہ علیہ وسلم ! میرا شوہر میرے قریب نہیں آتا، لہٰذا آپ میرے اور اس کے درمیان جدائی فرما دیں“، اسی دوران اس کا شوہر وہاں سے گزرا تو نبی کریم صلی اللہ علیہ وسلم نے اسے بلا لیا اور دریافت فرمایا: ”تمہارا اور اس کا کیا معاملہ ہے؟ یہ تمہاری بے رخی اور اپنے قریب نہ آنے کی شکایت کر رہی ہے؟“، اس نے عرض کیا: ”اے اللہ کے رسول صلی اللہ علیہ وسلم ! اس ذات کی قسم جس نے آپ کو معزز بنایا ہے، میرا تو اس کے ساتھ (تعلق کا) عہد اسی گزشتہ رات کا ہے“، یہ سن کر وہ عورت رونے لگی اور کہنے لگی: ”اس نے جھوٹ بولا ہے، آپ میرے اور اس کے درمیان علیحدگی کر دیں کیونکہ یہ اللہ کی مخلوق میں مجھے سب سے زیادہ ناپسند ہے“، یہ دیکھ کر رسول اللہ صلی اللہ علیہ وسلم تبسم فرمانے لگے، پھر آپ صلی اللہ علیہ وسلم نے ان دونوں کے سروں کو پکڑ کر ایک دوسرے کے قریب کیا اور دعا فرمائی: «اللَّهُمَّ أَدْنِ كُلَّ وَاحِدٍ مِنْ صَاحِبِهِ» ”اے اللہ! ان میں سے ہر ایک کو اپنے ساتھی کے قریب کر دے“، سیدنا جابر رضی اللہ عنہ بیان کرتے ہیں کہ پھر جتنا عرصہ اللہ نے چاہا ہم ٹھہرے رہے، اس کے بعد ایک بار پھر رسول اللہ صلی اللہ علیہ وسلم کا بازار سے گزر ہوا تو ہم نے وہی خاتون دیکھی جو چمڑا اٹھائے ہوئے تھی، جب اس نے آپ صلی اللہ علیہ وسلم کو دیکھا تو چمڑا ڈال دیا اور نبی کریم صلی اللہ علیہ وسلم کی جانب متوجہ ہو کر عرض کرنے لگی: ”اے اللہ کے رسول صلی اللہ علیہ وسلم ! اس ذات کی قسم جس نے آپ کو حق کے ساتھ مبعوث فرمایا ہے، اب اللہ کی مخلوق میں آپ کے علاوہ کوئی بشر مجھے ان سے زیادہ محبوب نہیں ہے“۔ عبید اللہ رحمہ اللہ کا بیان ہے کہ میرا خیال ہے کہ میں نے یہ روایت اپنے والد سے نہیں سنی۔ [مسند أبي يعلى الموصلي/مسند جابر/حدیث: 1868]

سیدنا جابر بن عبداللہ رضی اللہ عنہ سے روایت ہے کہ ”نبی کریم صلی اللہ علیہ وسلم نے اپنی وفات کے وقت ایک کاغذ طلب فرمایا تاکہ اس پر اپنی امت کے لیے ایک ایسی تحریر لکھ دیں جس کے متعلق آپ صلی اللہ علیہ وسلم نے فرمایا: ”وہ (اس کے بعد) نہ کبھی خود گمراہ ہوں گے اور نہ ہی انہیں گمراہ کیا جا سکے گا“، لیکن اس دوران گھر میں شور و غل ہوا اور سیدنا عمر بن خطاب رضی اللہ عنہ نے کچھ گفتگو کی، جس پر نبی کریم صلی اللہ علیہ وسلم نے اس (لکھنے کے ارادے) کو ترک فرما دیا۔“ [مسند أبي يعلى الموصلي/مسند جابر/حدیث: 1869]

سیدنا جابر رضی اللہ عنہ سے روایت ہے کہ نبی کریم صلی اللہ علیہ وسلم نے ارشاد فرمایا: «مَنْ يَصْعَدِ الثَّنِيَّةَ ثَنِيَّةَ الْمُرَارِ فَإِنَّهُ يُحَطُّ عَنْهُ مَا حُطَّ عَنْ بَنِي إِسْرَائِيلَ» ”جو شخص بھی ثنیہ (پہاڑی راستے) یعنی ثنیہ مرار پر چڑھے گا، تو اس کے گناہ اس طرح مٹا دیے جائیں گے جس طرح بنی اسرائیل کے گناہ مٹائے گئے تھے“، چنانچہ اس گھاٹی پر سب سے پہلے چڑھنے والے ہمارے یعنی بنو خزرج کے گھڑ سوار تھے، پھر باقی لوگ بھی پے در پے اس پر چڑھ گئے، تو رسول اللہ صلی اللہ علیہ وسلم نے فرمایا: «كُلُّكُمْ مَغْفُورٌ لَهُ إِلَّا صَاحِبَ الْجَمَلِ الْأَحْمَرِ» ”تم سب کی مغفرت کر دی گئی ہے سوائے اس سرخ اونٹ والے کے“، سیدنا جابر رضی اللہ عنہ فرماتے ہیں کہ ہم نے اس شخص سے کہا: آؤ! تاکہ رسول اللہ صلی اللہ علیہ وسلم تمہارے لیے دعائے مغفرت فرمائیں، تو اس نے جواب دیا: اللہ کی قسم! مجھے اپنی گمشدہ چیز کا مل جانا اس بات سے زیادہ محبوب ہے کہ تمہارے یہ صاحب میرے لیے مغفرت طلب کریں؛ دراصل وہ شخص اپنی کسی گمشدہ چیز کی تلاش میں سرگرداں تھا۔ [مسند أبي يعلى الموصلي/مسند جابر/حدیث: 1870]

سیدنا جابر رضی اللہ عنہ سے روایت ہے کہ ”رسول اللہ صلی اللہ علیہ وسلم نے اپنے وصال کے وقت ایک کاغذ طلب فرمایا تاکہ اس پر ایسی تحریر لکھوا دیں جس کے بعد وہ (امت کے لوگ) نہ خود گمراہ ہوں اور نہ ہی انہیں گمراہ کیا جا سکے، اس وقت گھر میں کچھ شور و غل ہوا اور سیدنا عمر بن خطاب رضی اللہ عنہ نے بھی کچھ کلام کیا، جس پر رسول اللہ صلی اللہ علیہ وسلم نے اس تحریر کو لکھوانے کا ارادہ ترک فرما دیا۔“ [مسند أبي يعلى الموصلي/مسند جابر/حدیث: 1871]

سیدنا جابر رضی اللہ عنہ سے روایت ہے کہ ”رسول اللہ صلی اللہ علیہ وسلم نے اس بات سے منع فرمایا کہ کھجور اور کشمش کو ایک ساتھ ملا کر (نبیذ وغیرہ تیار کرنے کے لیے) استعمال کیا جائے۔“ [مسند أبي يعلى الموصلي/مسند جابر/حدیث: 1872]

سیدنا جابر بن عبد اللہ رضی اللہ عنہ سے روایت ہے کہ میں نے رسول اللہ صلی اللہ علیہ وسلم کو فتح مکہ کے دن یہ فرماتے ہوئے سنا: ”بے شک اللہ اور اس کے رسول نے شراب، خنزیر، مردار اور بتوں کی تجارت کو حرام قرار دیا ہے“، تو ایک شخص نے عرض کیا: ”اے اللہ کے رسول صلی اللہ علیہ وسلم ! مردار کی چربی کے متعلق آپ کا کیا حکم ہے؟ کیونکہ اس سے کشتیوں پر روغن کیا جاتا ہے، کھالوں کو چکنا کیا جاتا ہے اور لوگ اس سے چراغ روشن کرتے ہیں“، اس پر آپ صلی اللہ علیہ وسلم نے ارشاد فرمایا: «قَاتَلَ اللَّهُ الْيَهُودَ» ”اللہ یہودیوں کو غارت کرے، بے شک اللہ تعالیٰ نے جب ان پر (مردار کی) چربی حرام کی تو انہوں نے اسے پگھلا کر صاف کیا، پھر اسے فروخت کیا اور اس کی قیمت کھا گئے“۔ [مسند أبي يعلى الموصلي/مسند جابر/حدیث: 1873]

سیدنا جابر رضی اللہ عنہ سے روایت ہے کہ انہوں نے فرمایا: ”جس شخص کو یہ بات مسرور کرے کہ وہ کسی ایسے شخص کو دیکھے جو اہلِ جنت میں سے ہو، تو اسے چاہیے کہ وہ سیدنا حسین بن علی رضی اللہ عنہما کو دیکھ لے“، کیونکہ یقیناً میں نے رسول اللہ صلی اللہ علیہ وسلم کو ان کے متعلق یہی فرماتے ہوئے سنا ہے۔ [مسند أبي يعلى الموصلي/مسند جابر/حدیث: 1874]

سیدنا جابر رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”صرف ایک انگلی کے اشارے سے سلام کرنا یہودیوں کا شیوہ ہے“۔ [مسند أبي يعلى الموصلي/مسند جابر/حدیث: 1875]

سیدنا جابر رضی اللہ عنہ سے روایت ہے کہ ”جب سیدنا جعفر رضی اللہ عنہ حبشہ سے واپس تشریف لائے تو نبی کریم صلی اللہ علیہ وسلم نے ان سے معانقہ فرمایا (انہیں گلے لگایا)۔“ [مسند أبي يعلى الموصلي/مسند جابر/حدیث: 1876]