سیدنا جابر رضی اللہ عنہ سے روایت ہے کہ انہوں نے فرمایا: ”ہم رسول اللہ صلی اللہ علیہ وسلم کے ساتھ (مکہ) آئے، ہم نے بیت اللہ کا طواف کیا اور (عمرہ مکمل کر کے) احرام کھول دیا، پھر جب ہم بطحاء کے مقام پر پہنچے تو آپ صلی اللہ علیہ وسلم نے ہمیں حکم دیا کہ ہم حج کا احرام باندھیں، (سیدنا جابر رضی اللہ عنہ) بیان کرتے ہیں کہ اس پر بعض لوگوں نے (تعجب سے) کہا: کیا ہم حج کا احرام اس حال میں باندھیں کہ ابھی کل ہی ہم اپنی بیویوں سے ملے ہیں؟ راوی کہتے ہیں کہ اس بارے میں لوگوں میں کچھ چہ میگوئیاں ہوئیں تو رسول اللہ صلی اللہ علیہ وسلم نے ارشاد فرمایا: ”اگر مجھے معلوم ہوتا کہ لوگ ایسا (تذبذب) کریں گے تو میں اپنے ساتھ ہدی (قربانی کا جانور) نہ لاتا“، اور آپ صلی اللہ علیہ وسلم نے ہم سے یہ بھی فرمایا: ”لوگوں کی ایک جماعت کو (ایک) ہدی میں شریک ہو جانا چاہیے“۔“ [مسند أبي يعلى الموصلي/مسند جابر/حدیث: 1897]

سیدنا جابر بن عبداللہ رضی اللہ عنہما سے روایت ہے کہ ہم رسول اللہ صلی اللہ علیہ وسلم کے ہمراہ مکہ سے مدینہ کی جانب واپس آ رہے تھے، میرا اونٹ تھک کر نڈھال ہو گیا جس کی وجہ سے میں اسے ہانکتا ہوا پیچھے رہ گیا، رسول اللہ صلی اللہ علیہ وسلم کسی ضرورت کی بناء پر قافلے کے پیچھے تشریف فرما تھے، آپ مجھ سے آ ملے اور دریافت فرمایا: ”تم پیچھے کیوں رہ گئے ہو؟“ میں نے عرض کیا: اے اللہ کے رسول! میرا اونٹ تھک کر لنگڑانے لگا ہے، میں اسے قافلے سے ملانے کی کوشش کر رہا ہوں، راوی کہتے ہیں کہ رسول اللہ صلی اللہ علیہ وسلم نے اس کی دم پکڑ کر اسے ضرب لگائی اور پھر اسے ڈانٹا تو فرمایا: ”اب سوار ہو جاؤ“، اس کے بعد میں نے خود کو دیکھا کہ میں اس اونٹ کو لوگوں سے آگے بڑھنے سے روک رہا تھا، پھر ہم مدینہ کے قریب ایک مقام پر اترے تو میں نے اپنے گھر والوں کے پاس جانے میں جلدی کرنا چاہی، جس پر رسول اللہ صلی اللہ علیہ وسلم نے مجھ سے فرمایا: ”رات کے وقت (اچانک) اپنے گھر والوں کے پاس نہ جانا“، میں نے عرض کیا: اے اللہ کے رسول! میں نے حال ہی میں شادی کی ہے، آپ صلی اللہ علیہ وسلم نے دریافت فرمایا: ”کس سے شادی کی ہے؟“ میں نے عرض کیا: ایک بیوہ عورت سے، آپ صلی اللہ علیہ وسلم نے فرمایا: ”کسی کنواری لڑکی سے کیوں نہ کی کہ تم اس سے کھیلتے اور وہ تم سے کھیلتی؟“ میں نے عرض کیا: (میرے والد) سیدنا عبداللہ رضی اللہ عنہ فوت یا شہید ہو گئے اور پیچھے میری بہنیں چھوڑ گئے ہیں، تو میں نے یہ بات ناپسند کی کہ ان کے پاس ان جیسی ہی کوئی کم عمر لڑکی لے آؤں، اس پر آپ صلی اللہ علیہ وسلم خاموش رہے اور مجھے نہ اچھا کہا اور نہ برا، پھر مجھ سے فرمایا: ”اپنا یہ اونٹ میرے ہاتھ فروخت کر دو“، میں نے عرض کیا: نہیں، بلکہ اے اللہ کے رسول! یہ آپ ہی کا ہے، آپ صلی اللہ علیہ وسلم نے فرمایا: ”نہیں، بلکہ اسے میرے ہاتھ بیچ دو“، میں نے پھر عرض کیا: نہیں، بلکہ یہ آپ ہی کا ہے، لیکن آپ صلی اللہ علیہ وسلم نے پھر فرمایا: ”نہیں، اسے میرے ہاتھ فروخت کرو“، میں نے عرض کیا: مجھ پر ایک شخص کا ایک اوقیہ سونا قرض ہے، پس اتنی قیمت کے عوض یہ اونٹ آپ کا ہوا، آپ صلی اللہ علیہ وسلم نے فرمایا: ”میں نے اسے خرید لیا، اب تم مدینہ پہنچنے تک اس پر سواری کر لو“، جب میں مدینہ پہنچا تو رسول اللہ صلی اللہ علیہ وسلم نے سیدنا بلال رضی اللہ عنہ سے فرمایا: ”اسے ایک اوقیہ سونا دے دو اور کچھ مزید بھی دینا“، انہوں نے مجھے ایک اوقیہ سونا دیا اور ایک قیراط کا اضافہ کیا، میں نے اپنے جی میں کہا کہ رسول اللہ صلی اللہ علیہ وسلم کی عطا کردہ یہ زیادتی مجھ سے کبھی جدا نہیں ہوگی، چنانچہ وہ میرے پاس ایک تھیلے میں محفوظ رہی یہاں تک کہ یومِ حرہ کے موقع پر اہل شام نے اسے چھین لیا۔ [مسند أبي يعلى الموصلي/مسند جابر/حدیث: 1898]

سیدنا جابر بن عبد اللہ رضی اللہ عنہما سے روایت ہے کہ میں نے رسول اللہ صلی اللہ علیہ وسلم کو یہ فرماتے ہوئے سنا: ”اگر ابنِ آدم کے پاس کھجوروں کا ایک باغ ہو تو وہ اس کے ساتھ ویسے ہی ایک اور باغ کی تمنا کرے گا، اور ابنِ آدم کے پیٹ کو مٹی کے سوا کوئی چیز نہیں بھر سکتی۔“ [مسند أبي يعلى الموصلي/مسند جابر/حدیث: 1899]

سیدنا جابر رضی اللہ عنہ سے روایت ہے کہ سیدنا حاطب رضی اللہ عنہ کا ایک غلام رسول اللہ صلی اللہ علیہ وسلم کی خدمتِ اقدس میں حاضر ہوا اور عرض گزار ہوا کہ ”اے اللہ کے رسول! حاطب تو یقیناً دوزخ میں داخل ہوگا“، تو آپ صلی اللہ علیہ وسلم نے ارشاد فرمایا: ”تو نے غلط بیانی کی ہے، کیا وہ غزوۂ بدر اور (بیعتِ) حدیبیہ میں حاضر نہیں ہوا تھا؟“ [مسند أبي يعلى الموصلي/مسند جابر/حدیث: 1900]

سیدنا جابر رضی اللہ عنہ سے روایت ہے کہ میں نے نبی کریم صلی اللہ علیہ وسلم کو یہ فرماتے ہوئے سنا کہ ”ہر بندے کو (قیامت کے دن) اسی حالت پر دوبارہ زندہ کر کے اٹھایا جائے گا جس پر اس کی موت واقع ہوئی تھی۔“ [مسند أبي يعلى الموصلي/مسند جابر/حدیث: 1901]

سیدنا جابر رضی اللہ عنہ سے روایت ہے کہ نبی کریم صلی اللہ علیہ وسلم نے ارشاد فرمایا: ”ایک آدمی کا کھانا دو افراد کے لیے کافی ہوتا ہے، دو آدمیوں کا کھانا چار کے لیے اور چار افراد کا کھانا آٹھ کے لیے کفایت کرتا ہے“۔ [مسند أبي يعلى الموصلي/مسند جابر/حدیث: 1902]

سیدنا جابر رضی اللہ عنہ سے روایت ہے کہ نبی کریم صلی اللہ علیہ وسلم نے ارشاد فرمایا: ”جب تم میں سے کوئی کھانا کھائے تو اسے چاہیے کہ وہ اپنی انگلیوں کو چاٹ لے، کیونکہ تم نہیں جانتے کہ کھانے کے کس حصے میں برکت نازل ہوتی ہے۔“ [مسند أبي يعلى الموصلي/مسند جابر/حدیث: 1903]

سیدنا جابر رضی اللہ عنہ سے روایت ہے کہ نبی کریم صلی اللہ علیہ وسلم نے ارشاد فرمایا: ”شیطان تمہارے ہر معاملے میں تمہارے پاس حاضر ہوتا ہے، یہاں تک کہ وہ تمہارے کھانے اور پینے کے وقت بھی موجود ہوتا ہے، لہذا جب تم میں سے کسی کا لقمہ گر جائے تو اسے چاہیے کہ اسے اٹھا لے اور اس پر جو گندگی یا مٹی لگ جائے اسے صاف کر کے اسے کھا لے اور اسے شیطان کے لیے نہ چھوڑے۔“ [مسند أبي يعلى الموصلي/مسند جابر/حدیث: 1904]

سیدنا جابر رضی اللہ عنہ سے روایت ہے، وہ فرماتے ہیں کہ میں نے نبی کریم صلی اللہ علیہ وسلم کو یہ فرماتے ہوئے سنا: ”جس شخص کو یہ اندیشہ ہو کہ وہ رات کے آخری حصے میں بیدار نہیں ہو سکے گا تو اسے چاہیے کہ وہ رات کے ابتدائی حصے میں ہی وتر پڑھ کر سو جائے، اور جسے یہ قوی امید ہو کہ وہ رات کے آخری پہر بیدار ہو جائے گا تو اسے چاہیے کہ وہ رات کے آخری حصے میں وتر ادا کرے کیونکہ رات کے آخری پہر کی قرأت (فرشتوں کی) حاضری کا وقت ہوتا ہے اور یہ عمل زیادہ فضیلت والا ہے۔“ [مسند أبي يعلى الموصلي/مسند جابر/حدیث: 1905]

سیدنا جابر رضی اللہ عنہ سے روایت ہے کہ انہوں نے نبی کریم صلی اللہ علیہ وسلم کو یہ فرماتے ہوئے سنا: ”بے شک اہل جنت جنت میں کھائیں گے اور پیئیں گے، لیکن وہاں نہ وہ تھوکیں گے، نہ پیشاب کریں گے، نہ ناک صاف کریں گے اور نہ ہی قضائے حاجت کریں گے۔“ (راوی کہتے ہیں کہ) عرض کیا گیا: پھر اس کھانے کا کیا معاملہ ہوگا؟ آپ صلی اللہ علیہ وسلم نے فرمایا: ”وہ ایک ڈکار اور کستوری کی خوشبو جیسے پسینے کی صورت میں (جسم سے خارج ہو جائے گا)، اور ان (اہل جنت) کو تسبیح و تحمید کا الہام اسی طرح کیا جائے گا جس طرح تمہیں سانس لینے کا الہام کیا جاتا ہے (یعنی یہ ذکر ان کی غذا اور سانس کی طرح فطری و دائمی ہوگا)۔“ [مسند أبي يعلى الموصلي/مسند جابر/حدیث: 1906]