سیدنا جابر رضی اللہ عنہ سے روایت ہے کہ رسول اللہ صلی اللہ علیہ وسلم نے اپنی ازواجِ مطہرات سے ایک ماہ کے لیے علیحدگی اختیار فرمائی تھی، پھر آپ صلی اللہ علیہ وسلم انتیسویں رات ہی باہر تشریف لے آئے۔ ہم نے عرض کیا کہ ابھی تو صرف انتیس دن ہی گزرے ہیں، تو آپ صلی اللہ علیہ وسلم نے ارشاد فرمایا: «إِنَّمَا الشَّهْرُ هَكَذَا» ”مہینہ تو بس اتنا (یعنی انتیس دن کا بھی) ہوتا ہے“ اور آپ صلی اللہ علیہ وسلم نے (اپنے دونوں ہاتھوں کی ہتھیلیاں پھیلا کر) تین مرتبہ اشارہ فرمایا اور آخری بار ایک انگلی مبارک کو بند کر لیا۔ [مسند أبي يعلى الموصلي/مسند جابر/حدیث: 2264]

سیدنا جابر بن عبد اللہ رضی اللہ عنہما سے روایت ہے کہ سیدنا حاطب بن ابی بلتعہ رضی اللہ عنہ نے اہل مکہ کی طرف ایک خط لکھا جس میں انہوں نے تذکرہ کیا کہ رسول اللہ صلی اللہ علیہ وسلم نے ان پر حملے کا ارادہ فرمایا ہے، پھر رسول اللہ صلی اللہ علیہ وسلم کو اس عورت کے بارے میں اطلاع دے دی گئی جس کے پاس وہ خط تھا، چنانچہ آپ صلی اللہ علیہ وسلم نے اس کی طرف (اپنے قاصد) بھیجے اور اس کے سر کے بالوں سے وہ خط برآمد کر لیا، پھر آپ صلی اللہ علیہ وسلم نے دریافت فرمایا: ”اے حاطب! کیا تم نے ایسا کیا ہے؟“ انہوں نے عرض کیا: ”جی ہاں، لیکن میں نے یہ کام رسول اللہ صلی اللہ علیہ وسلم کے ساتھ کسی بدخواہی یا نفاق کی وجہ سے نہیں کیا، بلکہ میں تو یہ جانتا تھا کہ اللہ تعالیٰ اپنے رسول صلی اللہ علیہ وسلم کو ضرور غالب کرے گا اور ان کا کام مکمل فرمائے گا، مگر چونکہ میں ان کے درمیان مقیم رہا تھا اور میری والدہ بھی ان کے پاس مکہ میں تھی، تو میں نے چاہا کہ ان پر کوئی ایسا احسان کر دوں جس کی وجہ سے وہاں میری والدہ کی کوئی جائے پناہ بن جائے،“ اس پر سیدنا عمر رضی اللہ عنہ نے عرض کیا: ”کیا میں اس شخص کی گردن نہ اڑا دوں؟“ تو آپ صلی اللہ علیہ وسلم نے ارشاد فرمایا: ”کیا تم ایک ایسے شخص کو قتل کرو گے جو اہل بدر میں سے ہے؟ تمہیں کیا معلوم، شاید اللہ تعالیٰ اہل بدر کے احوال سے واقف ہو چکا ہے اور اس نے خود فرما دیا ہے: ”تم جو چاہو کرو (میں نے تمہیں بخش دیا ہے)۔““ [مسند أبي يعلى الموصلي/مسند جابر/حدیث: 2265]

سیدنا جابر رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”بلاشبہ وہ بہترین مقامات جن کی طرف سواریاں کجاوے کس کر رختِ سفر باندھیں، میری یہ مسجد اور بیتِ عتیق (خانہ کعبہ) ہیں۔“ [مسند أبي يعلى الموصلي/مسند جابر/حدیث: 2266]

سیدنا جابر بن عبداللہ رضی اللہ عنہ سے روایت ہے کہ ”سیدہ ام سلمہ رضی اللہ عنہا نے رسول اللہ صلی اللہ علیہ وسلم سے حجامہ کروانے کی اجازت طلب کی، تو آپ صلی اللہ علیہ وسلم نے سیدنا ابوطیبہ رضی اللہ عنہ کو حکم دیا اور انہوں نے ان کا حجامہ کیا“؛ امام ابو یعلیٰ رحمہ اللہ فرماتے ہیں کہ ”میرا گمان ہے کہ راوی نے یہ بھی بیان کیا تھا کہ وہ (سیدنا ابوطیبہ رضی اللہ عنہ) ان کے رضاعی بھائی تھے“۔ [مسند أبي يعلى الموصلي/مسند جابر/حدیث: 2267]

سیدنا جابر رضی اللہ عنہ سے روایت ہے کہ جب وہ لوگ رسول اللہ صلی اللہ علیہ وسلم کے ہمراہ (اپنے مقامات پر) موجود ہوتے تو آپ صلی اللہ علیہ وسلم ”ہدی (قربانی کا جانور مکہ) بھیج دیا کرتے تھے، پس ہم میں سے جو چاہتا وہ احرام باندھ لیتا اور جو چاہتا وہ (احرام باندھے بغیر) حلال رہتا۔“ [مسند أبي يعلى الموصلي/مسند جابر/حدیث: 2268]

سیدنا جابر رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”جو شخص جس حالت پر فوت ہوا، اللہ تعالیٰ اسے (قیامت کے دن) اسی حالت پر دوبارہ زندہ فرما کر اٹھائے گا۔“ [مسند أبي يعلى الموصلي/مسند جابر/حدیث: 2269]

سیدنا جابر رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”اہلِ جنت اس میں کھائیں گے اور پیئیں گے، وہ نہ تو وہاں پاخانہ کریں گے، نہ پیشاب کریں گے اور نہ ہی ناک صاف کریں گے، بلکہ ان کا وہ کھانا پینا کستوری کی طرح خوشبودار پسینے کی صورت میں خارج ہو جائے گا“۔ [مسند أبي يعلى الموصلي/مسند جابر/حدیث: 2270]

سیدنا جابر رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ” «أَيُّمَا مُؤْمِنٍ سَبَبْتُهُ أَوْ لَعَنْتُهُ فَاجْعَلْهَا لَهُ زَكَاةً وَأَجْرًا» جس کسی مومن کو میں نے برا بھلا کہا ہو یا اس پر لعنت کی ہو، تو (اے اللہ!) تو اسے اس کے حق میں پاکیزگی اور اجر و ثواب کا ذریعہ بنا دے۔“ [مسند أبي يعلى الموصلي/مسند جابر/حدیث: 2271]

سیدنا جابر رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”لوگ خیر اور شر (یعنی ہر معاملے) میں قریش کے پیروکار ہیں۔“ [مسند أبي يعلى الموصلي/مسند جابر/حدیث: 2272]

سیدنا جابر رضی اللہ عنہ سے روایت ہے کہ ایک شخص نبی کریم صلی اللہ علیہ وسلم کی خدمتِ اقدس میں حاضر ہوا اور دریافت کیا کہ ”مسلمانوں میں سب سے افضل کون ہے؟“ تو آپ صلی اللہ علیہ وسلم نے ارشاد فرمایا: ”وہ شخص جس کی زبان اور ہاتھ (کی اذیت) سے دوسرے مسلمان محفوظ رہیں۔“ [مسند أبي يعلى الموصلي/مسند جابر/حدیث: 2273]