سیدہ عائشہ رضی اللہ عنہا اور سیدنا ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے ارشاد فرمایا: ”ولی (سرپرست) کی موجودگی کے بغیر نکاح (شرعاً منعقد) نہیں ہوتا۔“ [مسند أبي يعلى الموصلي/أول مسند ابن عباس/حدیث: 2507]

سیدہ عائشہ رضی اللہ عنہا سے مروی عروہ بن زبیر رحمہ اللہ کی حدیث میں ہے کہ رسول اللہ صلی اللہ علیہ وسلم نے ارشاد فرمایا: ”اور جس کا کوئی سرپرست (ولی) نہ ہو، اس کا سرپرست سلطانِ وقت (حکمران) ہے“۔ [مسند أبي يعلى الموصلي/أول مسند ابن عباس/حدیث: 2508]

سیدنا ابن عباس رضی اللہ عنہما سے روایت ہے کہ ”رسول اللہ صلی اللہ علیہ وسلم نے جانوروں کو ایک دوسرے کے خلاف اکسا کر آپس میں لڑانے سے منع فرمایا ہے۔“ [مسند أبي يعلى الموصلي/أول مسند ابن عباس/حدیث: 2509]

سیدنا عبداللہ بن عباس رضی اللہ عنہما سے روایت ہے کہ ”رسول اللہ صلی اللہ علیہ وسلم نے جانوروں کو آپس میں لڑانے (یعنی ان کے مابین جنگ و جدل کی ترغیب دینے) سے منع فرمایا ہے۔“ [مسند أبي يعلى الموصلي/أول مسند ابن عباس/حدیث: 2510]

سیدنا ابن عباس رضی اللہ عنہما سے روایت ہے کہ نبی اکرم صلی اللہ علیہ وسلم نے ”ایک گواہ اور (مدعی کی) قسم کی بنیاد پر فیصلہ صادر فرمایا۔“ [مسند أبي يعلى الموصلي/أول مسند ابن عباس/حدیث: 2511]

سیدنا ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے ”نماز کی ادائیگی کے فوراً بعد (حج یا عمرہ کا) تلبیہ پکارا تھا۔“ [مسند أبي يعلى الموصلي/أول مسند ابن عباس/حدیث: 2512]

سعید بن جبیر رحمہ اللہ بیان کرتے ہیں کہ میں نے سیدنا عبد اللہ بن عباس رضی اللہ عنہما کے سامنے رسول اللہ صلی اللہ علیہ وسلم کے بلند آواز سے تلبیہ پکارنے (اہلال) کا تذکرہ کیا تو انہوں نے فرمایا: ”رسول اللہ صلی اللہ علیہ وسلم نے اپنی نماز سے فارغ ہوتے ہی احرام واجب فرما لیا تھا، پھر آپ صلی اللہ علیہ وسلم باہر تشریف لائے اور جب اپنی سواری پر سوار ہوئے اور وہ آپ صلی اللہ علیہ وسلم کو لے کر سیدھی کھڑی ہو گئی تو آپ صلی اللہ علیہ وسلم نے پھر بلند آواز سے تلبیہ پکارا، چنانچہ لوگوں کے ایک گروہ نے آپ صلی اللہ علیہ وسلم کو اسی حالت میں دیکھا تو انہوں نے یہ گمان کیا کہ آپ صلی اللہ علیہ وسلم نے تلبیہ اسی وقت پکارنا شروع کیا ہے جب آپ کی سواری آپ کو لے کر کھڑی ہوئی تھی، اور اس کی وجہ یہ تھی کہ ان لوگوں نے صرف وہی منظر دیکھا تھا، پھر آپ صلی اللہ علیہ وسلم آگے بڑھے یہاں تک کہ جب بیداء کی بلندی پر چڑھے تو آپ صلی اللہ علیہ وسلم نے پھر تلبیہ پکارا، تو وہاں موجود لوگوں نے اسے سن کر کہا کہ آپ صلی اللہ علیہ وسلم نے اس وقت تلبیہ پکارا ہے جب آپ صلی اللہ علیہ وسلم بیداء کی بلندی پر چڑھے تھے۔“ [مسند أبي يعلى الموصلي/أول مسند ابن عباس/حدیث: 2513]

سیدنا عبد اللہ بن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے عجلانی اور اس کی بیوی کے درمیان لعان کرایا، اس روز اس عورت کے شوہر نے عرض کی: ”یا رسول اللہ! اللہ کی قسم! جب سے ہم نے کھجوروں کی جڑوں میں مٹی ڈالی تھی (یعنی ایک طویل عرصہ سے) میں اس کے قریب بھی نہیں گیا“، اس موقع پر رسول اللہ صلی اللہ علیہ وسلم مسلسل یہ فرما رہے تھے: «اللَّهُمَّ بَيِّنْ» ”اے اللہ! حقیقت کو واضح فرما دے“، اس عورت کا شوہر سرخی مائل بالوں والا اور دبلی پتلی کلائیوں اور پنڈلیوں والا شخص تھا، جبکہ جس شخص کے ساتھ اسے متہم کیا گیا تھا وہ ایک سیاہ فام عورت کا بیٹا تھا، چنانچہ اس عورت کے ہاں ایک سیاہ رنگت والا، سخت گھنگھریالے بالوں والا، پرگوشت کلائیوں اور بھری ہوئی پنڈلیوں والا بچہ پیدا ہوا، اس پر ایک شخص نے ان سے سوال کیا: اے ابوعباس! آپ نے کیا بات کہی؟ انہوں نے جواب دیا: ”میں نے کہا کہ وہ بچہ اسی ناپسندیدہ مشابہت پر پیدا ہوا جس کا خدشہ تھا“، پھر ابن شداد بن الہاد رحمہ اللہ نے ان سے پوچھا: کیا یہ وہی عورت ہے جس کے بارے میں رسول اللہ صلی اللہ علیہ وسلم نے فرمایا تھا: ”اگر میں بغیر کسی گواہی کے کسی کو سنگسار کرنے والا ہوتا (تو اسے کرتا)؟“ انہوں نے جواب دیا: ”نہیں، وہ تو ایک ایسی عورت تھی جس نے اسلام لانے کے بعد کھلم کھلا (بے حیائی کا) مظاہرہ کیا تھا“۔ [مسند أبي يعلى الموصلي/أول مسند ابن عباس/حدیث: 2514]

سیدنا ابن عباس رضی اللہ عنہما سے روایت ہے کہ ایک شخص نے عرض کیا: ”اے اللہ کے رسول صلی اللہ علیہ وسلم ! میری والدہ وفات پا چکی ہیں اور انہوں نے کوئی وصیت نہیں کی تھی، تو کیا اگر میں ان کی طرف سے صدقہ و خیرات کروں تو یہ عمل انہیں نفع پہنچائے گا؟“ آپ صلی اللہ علیہ وسلم نے ارشاد فرمایا: ”جی ہاں۔“ [مسند أبي يعلى الموصلي/أول مسند ابن عباس/حدیث: 2515]

سیدنا ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے خطبہ ارشاد فرمایا تو اس میں یہ حکم دیا کہ ”کوئی عورت ہرگز سفر نہ کرے مگر اس حال میں کہ اس کے ساتھ اس کا محرم موجود ہو“، تو ایک شخص کھڑا ہوا اور عرض کی کہ اے اللہ کے رسول! میرا نام فلاں غزوے کے لیے لکھ لیا گیا ہے جبکہ میں اپنی اہلیہ کے ساتھ حج پر جانے کا ارادہ رکھتا ہوں، تو نبی کریم صلی اللہ علیہ وسلم نے ارشاد فرمایا: ”تم اپنی اہلیہ کے ساتھ ہی حج کرو“۔ [مسند أبي يعلى الموصلي/أول مسند ابن عباس/حدیث: 2516]