عبداللہ بن شقیق رحمہ اللہ سے روایت ہے کہ انہوں نے بیان کیا کہ میں نے سیدہ عائشہ رضی اللہ عنہا سے دریافت کیا کہ ”رسول اللہ صلی اللہ علیہ وسلم کو اپنے اصحاب میں سے سب سے زیادہ محبت کس سے تھی؟“ انہوں نے جواب دیا ”سیدنا ابوبکر رضی اللہ عنہ سے“، میں نے عرض کی ”پھر کس سے؟“ انہوں نے فرمایا ”پھر سیدنا عمر رضی اللہ عنہ سے“، میں نے پھر عرض کی ”پھر کس سے؟“ انہوں نے فرمایا ”پھر سیدنا ابو عبیدہ بن جراح رضی اللہ عنہ سے“، وہ بیان کرتے ہیں کہ میں نے پھر پوچھا کہ ”پھر کس سے؟“ تو وہ خاموش ہو گئیں۔ [مسند أبي يعلى الموصلي/مسند عائشة/حدیث: 4887]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم (نفل) نماز ادا فرماتے تھے اور میں گھر میں آپ صلی اللہ علیہ وسلم کے سامنے عرض میں لیٹی ہوئی ہوتی تھی، پھر جب آپ صلی اللہ علیہ وسلم وتر پڑھنے کا ارادہ فرماتے تو مجھے اپنے پاؤں مبارک سے ٹٹولتے (یا اشارہ فرماتے) اور فرماتے: «تَنَحَّيْ» ”تم پرے ہٹ جاؤ“۔ [مسند أبي يعلى الموصلي/مسند عائشة/حدیث: 4888]

سیدہ عائشہ رضی اللہ عنہا سے روایت ہے کہ ”رسول اللہ صلی اللہ علیہ وسلم نے ایک مرتبہ بیت اللہ کی طرف بطورِ ہدی بکریاں بھیجیں اور آپ صلی اللہ علیہ وسلم نے ان کے گلے میں (بطورِ علامت) قلادہ پہنایا۔“ [مسند أبي يعلى الموصلي/مسند عائشة/حدیث: 4889]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے ارشاد فرمایا: «اسْتَأْمِرُوا النِّسَاءَ فِي أَبْضَاعِهِنَّ» ”عورتوں سے ان کے نکاح کے معاملے میں ان کی رائے اور اجازت طلب کیا کرو۔“ صحابہ کرام رضی اللہ عنہم نے عرض کی: ”اے اللہ کے رسول صلی اللہ علیہ وسلم ! کنواری لڑکی تو (جواب دینے میں) شرم محسوس کرتی ہے؟“ آپ صلی اللہ علیہ وسلم نے فرمایا: «سُكُوتُهَا إِقْرَارُهَا» ”اس کی خاموشی ہی اس کا اقرار و رضامندی ہے۔“ [مسند أبي يعلى الموصلي/مسند عائشة/حدیث: 4890]

سیدہ عائشہ رضی اللہ عنہا سے روایت ہے کہ نبی کریم صلی اللہ علیہ وسلم ”جب جنابت کی حالت میں سونے کا ارادہ فرماتے تو ویسا ہی وضو کرتے جیسا نماز کے لیے کیا جاتا ہے، اور جب کھانے کا ارادہ فرماتے تو اپنے دونوں ہاتھ دھوتے اور پھر کھانا تناول فرماتے۔“ [مسند أبي يعلى الموصلي/مسند عائشة/حدیث: 4891]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم کو ”حلوا (میٹھا) اور شہد نہایت مرغوب تھا“۔ [مسند أبي يعلى الموصلي/مسند عائشة/حدیث: 4892]

سیدہ عائشہ رضی اللہ عنہا سے روایت ہے کہ نبی صلی اللہ علیہ وسلم نے مجھ سے فرمایا: ”میں یقیناً پہچان لیتا ہوں جب تم مجھ سے ناراض ہوتی ہو اور جب تم مجھ سے راضی ہوتی ہو۔ جب تم مجھ سے ناراض ہوتی ہو تو کہتی ہو: نہیں، ابراہیم (علیہ السلام) کے رب کی قسم! اور جب تم مجھ سے راضی ہوتی ہو تو کہتی ہو: نہیں، محمد ( صلی اللہ علیہ وسلم ) کے رب کی قسم!“ سیدہ عائشہ رضی اللہ عنہا نے عرض کی: ”جی ہاں (اے اللہ کے رسول!)، اللہ کی قسم! میں (ناراضی کی صورت میں) محض آپ کا نام مبارک ہی زبان سے لینا چھوڑتی ہوں (مگر آپ کی محبت تو میرے دل میں ہی رہتی ہے)۔“ [مسند أبي يعلى الموصلي/مسند عائشة/حدیث: 4893]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے مجھ سے فرمایا: ”میں بخوبی جان لیتا ہوں جب تم مجھ سے خوش ہوتی ہو اور جب تم مجھ سے ناراض ہوتی ہو۔“ وہ بیان کرتی ہیں کہ میں نے عرض کی: آپ کو یہ بات کیسے معلوم ہوجاتی ہے؟ آپ صلی اللہ علیہ وسلم نے ارشاد فرمایا: ”جب تم مجھ سے خوش ہوتی ہو تو کہتی ہو: «لَا، وَرَبِّ مُحَمَّدٍ» ”نہیں، محمد ( صلی اللہ علیہ وسلم ) کے رب کی قسم“ اور جب تم مجھ سے ناراض ہوتی ہو تو کہتی ہو: «لَا، وَرَبِّ إِبْرَاهِيمَ» ”نہیں، ابراہیم (علیہ السلام) کے رب کی قسم“۔“ میں نے عرض کی: جی ہاں، اے اللہ کے رسول! اللہ کی قسم، میں (ناراضی میں) صرف آپ کا نام لینا چھوڑتی ہوں (مگر آپ کی محبت تو میرے دل میں ہی رہتی ہے)۔ [مسند أبي يعلى الموصلي/مسند عائشة/حدیث: 4894]

سیدہ عائشہ رضی اللہ عنہا سے روایت ہے کہ ”وہ اور رسول اللہ صلی اللہ علیہ وسلم ایک ہی برتن سے غسل فرمایا کرتے تھے۔“ [مسند أبي يعلى الموصلي/مسند عائشة/حدیث: 4895]

سیدہ عائشہ رضی اللہ عنہا سے روایت ہے کہ ”رسول اللہ صلی اللہ علیہ وسلم حلوہ اور شہد پسند فرماتے تھے، اور آپ صلی اللہ علیہ وسلم کا معمول تھا کہ جب عصر کی نماز پڑھ لیتے تو اپنی ازواجِ مطہرات کے پاس تشریف لے جاتے اور ان سے قریب ہوتے، ایک مرتبہ آپ صلی اللہ علیہ وسلم سیدہ حفصہ رضی اللہ عنہا کے پاس تشریف لے گئے اور وہاں معمول سے زیادہ دیر تک ٹھہر گئے، میں نے اس کے بارے میں دریافت کیا تو مجھے بتایا گیا کہ ان کی قوم کی ایک خاتون نے انہیں شہد کی ایک کپی ہدیہ کی تھی، چنانچہ انہوں نے نبی کریم صلی اللہ علیہ وسلم کو اس کا شربت پلایا ہے، میں نے (اپنے جی میں) کہا: اللہ کی قسم! ہم اس شہد کے معاملے میں ضرور کوئی تدبیر کریں گی، چنانچہ میں نے اس کا ذکر سیدہ سودہ رضی اللہ عنہا سے کیا اور ان سے کہا کہ جب آپ صلی اللہ علیہ وسلم تمہارے پاس تشریف لائیں اور تمہارے قریب ہوں تو تم ان سے کہنا کہ اے اللہ کے رسول! کیا آپ نے مغافیر (ایک قسم کا بدبودار گوند) کھایا ہے؟ تو وہ آپ سے کہیں گے کہ ”مجھے حفصہ نے شہد کا شربت پلایا ہے“، تب تم کہنا کہ شاید اس کی مکھی نے عرفط (بدبودار جھاڑی) کا رس چوسا ہوگا، اور میں بھی آپ صلی اللہ علیہ وسلم سے یہی کہوں گی اور اے صفیہ رضی اللہ عنہا! تم بھی یہی کہنا۔ سیدہ سودہ رضی اللہ عنہا بیان کرتی ہیں کہ «وَاللَّهِ الَّذِي لَا إِلَهَ إِلَّا هُوَ» ”قسم ہے اس اللہ کی جس کے سوا کوئی معبود نہیں“ تمہارے رعب کی وجہ سے میرا یہ حال تھا کہ جب آپ صلی اللہ علیہ وسلم ابھی دروازے ہی پر پہنچے تھے تو میرا جی چاہا کہ وہی بات کہہ دوں جو تم نے کہی تھی، پھر جب آپ صلی اللہ علیہ وسلم ان کے قریب ہوئے تو انہوں نے عرض کی: اے اللہ کے رسول! کیا آپ نے مغافیر کھایا ہے؟ آپ صلی اللہ علیہ وسلم نے فرمایا: ”نہیں“، انہوں نے عرض کی: پھر یہ کیسی بو ہے؟ آپ صلی اللہ علیہ وسلم نے فرمایا: ”مجھے حفصہ نے شہد کا شربت پلایا تھا“، انہوں نے کہا: پھر شاید اس کی مکھی نے عرفط کا رس چوسا ہوگا۔ پھر جب آپ صلی اللہ علیہ وسلم میرے پاس تشریف لائے تو میں نے بھی آپ صلی اللہ علیہ وسلم سے اسی طرح کی بات کہی، پھر جب سیدہ صفیہ رضی اللہ عنہا کے پاس گئے تو انہوں نے بھی یہی کہا، اس کے بعد جب آپ صلی اللہ علیہ وسلم دوبارہ سیدہ حفصہ رضی اللہ عنہا کے ہاں تشریف لے گئے تو انہوں نے عرض کی: اے اللہ کے رسول! کیا میں آپ کو وہ شربت نہ پلاؤں؟ آپ صلی اللہ علیہ وسلم نے فرمایا: ”مجھے اس کی اب کوئی حاجت نہیں ہے“۔ سیدہ سودہ رضی اللہ عنہا کہتی ہیں کہ (یہ دیکھ کر) میں نے کہا: «سُبْحَانَ اللَّهِ» ”اللہ پاک ہے“ ہم نے تو آپ صلی اللہ علیہ وسلم کو اس شہد سے محروم کر دیا، تو میں (عائشہ) نے ان سے کہا: ابھی خاموش رہو۔“ [مسند أبي يعلى الموصلي/مسند عائشة/حدیث: 4896]