سیدنا ابوہریرہ رضی اللہ عنہ سے روایت ہے کہ میں نے رسول اللہ صلی اللہ علیہ وسلم کو یہ ارشاد فرماتے ہوئے سنا: ”جس شخص نے سورج طلوع ہونے سے پہلے صبح کی نماز کا یا سورج غروب ہونے سے پہلے عصر کی نماز کا ایک سجدہ (یعنی ایک رکعت) پا لیا، تو یقیناً اس نے وہ نماز پا لی۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6284]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”ضرورت سے زائد پانی اس غرض سے نہ روکا جائے کہ اس کے ذریعے لوگوں کو چراگاہ کے چارے سے محروم کیا جائے۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6285]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”بہترین دن جس پر سورج طلوع ہوا وہ جمعہ کا دن ہے، اسی میں سیدنا آدم علیہ السلام پیدا کیے گئے، اسی میں وہ جنت سے نکالے گئے اور اسی دن وہ دوبارہ اس میں لوٹائے گئے۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6286]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”رعب (دشمن کے دلوں میں میری ہیبت) کے ذریعے میری مدد کی گئی ہے، مجھے جامع کلمات (ایسے کلمات جو لفظاً مختصر مگر معنی کے لحاظ سے نہایت وسیع ہوں) عطا کیے گئے ہیں، اور اسی دوران کہ میں سو رہا تھا، میرے پاس زمین کے خزانوں کی کنجیاں لائی گئیں اور وہ میرے ہاتھ میں تھما دی گئیں۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6287]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: «نِعْمَ الصَّدَقَةِ اللِّقْحَةُ الصَّفِيُّ مِنْحَةً، أَوِ الشَّاةُ الصَّفِيُّ تَغْدُو بِإِنَاءٍ وَتَرُوحُ بِأُخْرَى» ”بہترین صدقہ کثرت سے دودھ دینے والی وہ اونٹنی ہے جو (فائدہ اٹھانے کے لیے) بطورِ عطیہ دی جائے، یا کثرت سے دودھ دینے والی وہ بکری جو صبح کے وقت بھی ایک برتن (دودھ سے) بھر دے اور شام کے وقت بھی دوسرا برتن بھر دے۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6288]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”ایک عورت اپنے بیٹے کو دودھ پلا رہی تھی کہ اسی دوران اس کے پاس سے ایک سوار گزرا، تو اس نے (اس کی ظاہری وجاہت دیکھ کر) دعا کی: «اللَّهُمَّ لَا تُمِتِ ابْنِي حَتَّى يَكُونَ مِثْلَ هَذَا الرَّاكِبِ» ”اے اللہ! میرے بیٹے کو اس وقت تک موت نہ دینا جب تک کہ یہ اس سوار جیسا (شان و شوکت والا) نہ بن جائے“، تو اس بچے نے (کلام کرتے ہوئے) کہا: «اللَّهُمَّ لَا تَجْعَلْنِي مِثْلَهُ» ”اے اللہ! مجھے اس جیسا نہ بنانا“، پھر وہ بچہ دوبارہ دودھ پینے کی طرف متوجہ ہو گیا۔ پھر اس عورت کا گزر ایک ایسی (مظلوم) عورت پر ہوا جسے گھسیٹا جا رہا تھا اور بچے اس کے ساتھ کھیل (مذاق کر) رہے تھے، تو اس کی ماں نے کہا: «اللَّهُمَّ لَا تَجْعَلِ ابْنِي مِثْلَهَا» ”اے اللہ! میرے بیٹے کو اس عورت جیسا نہ بنانا“، تو اس بچے نے کہا: «اللَّهُمَّ اجْعَلْنِي مِثْلَهَا» ”اے اللہ! مجھے اس جیسا بنا دینا“۔“ رسول اللہ صلی اللہ علیہ وسلم نے (اس کی حقیقت) بیان فرمائی کہ: ”وہ سوار تو کافر تھا، اور رہی وہ عورت جسے لوگ (تہمت لگاتے ہوئے) کہتے تھے کہ تو نے زنا کیا ہے، تو وہ جواب میں کہتی تھی: «حَسْبِيَ اللَّهُ» ”اللہ مجھے کافی ہے“، پھر لوگ اسے کہتے کہ تو نے چوری کی ہے، تو وہ کہتی: «حَسْبِيَ اللَّهُ» ”اللہ میرے لیے کافی ہے“ (یعنی وہ ان الزامات سے بری تھی)۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6289]

سیدنا ابوہریرہ رضی اللہ عنہ سے روایت ہے کہ میں نے رسول اللہ صلی اللہ علیہ وسلم کو یہ فرماتے ہوئے سنا: ”جنت اور دوزخ نے باہم تکرار کی، تو آگ نے کہا: ”مجھے متکبرین اور جابر و سرکش لوگوں کے لیے خاص کیا گیا ہے“، جبکہ جنت نے عرض کیا: ”مجھے کیا ہوا کہ مجھ میں صرف وہی لوگ داخل ہو رہے ہیں جو لوگوں کی نظر میں کمزور، معاشرے کے گرے پڑے اور عاجز و ناتواں ہیں؟“ اس پر اللہ عزوجل نے جنت سے ارشاد فرمایا: ”بے شک تو میری رحمت ہے، تیرے ذریعے میں اپنے بندوں میں سے جس پر چاہوں گا رحم کروں گا“، اور دوزخ سے ارشاد فرمایا: ”بے شک تو میرا عذاب ہے، تیرے ذریعے میں جس کو چاہوں گا عذاب دوں گا، اور تم دونوں میں سے ہر ایک کو (اس کے مکینوں سے) بھرنا میرے ذمہ ہے“۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6290]

سیدنا ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”ابنِ آدم کے (جسم کے) تمام حصوں کو زمین کھا جاتی ہے سوائے ریڑھ کی ہڈی کے آخری مہرے (عجب الذنب) کے، کہ اسی سے انسان کی تخلیق ہوئی ہے اور اسی سے (دوبارہ) اس کی جسد سازی کی جائے گی۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6291]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”تم ضرور بالضرور وہی راستہ اختیار کرو گے جو تم سے پہلی امتوں نے اختیار کیا تھا؛ ہاتھ کے بدلے ہاتھ، بالشت کے بدلے بالشت اور ہاتھ کے پھیلاؤ کے بدلے پھیلاؤ، یہاں تک کہ اگر ان میں سے کوئی گوہ کے سوراخ میں داخل ہوا تھا تو تم بھی اس میں ضرور داخل ہو گے“، سیدنا ابوہریرہ رضی اللہ عنہ نے فرمایا: ”اگر تم چاہو تو قرآن کی یہ آیت پڑھ لو: ﴿كَالَّذِينَ مِنْ قَبْلِكُمْ كَانُوا أَشَدَّ مِنْكُمْ قُوَّةً﴾ آخرِ آیت تک“، صحابہ کرام رضی اللہ عنہم نے عرض کیا: ”اے اللہ کے رسول صلی اللہ علیہ وسلم ! کیا (پہلی امتوں سے مراد وہی لوگ ہیں) جیسے اہل فارس اور روم نے کیا تھا؟“ تو آپ صلی اللہ علیہ وسلم نے ارشاد فرمایا: ”تو پھر ان کے علاوہ اور لوگ کون ہیں؟“۔ [مسند أبي يعلى الموصلي/تابع مسند أبي هريرة رضي الله عنه/حدیث: 6292]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”قیامت اس وقت تک قائم نہیں ہوگی جب تک کہ «الْهَرْجُ» کی کثرت نہ ہو جائے۔“ صحابہ کرام رضی اللہ عنہم نے دریافت کیا: یا رسول اللہ صلی اللہ علیہ وسلم ! ہرج سے کیا مراد ہے؟ آپ صلی اللہ علیہ وسلم نے تین مرتبہ ارشاد فرمایا: ”قتل و غارت۔“ انہوں نے عرض کی: (یا رسول اللہ صلی اللہ علیہ وسلم !) ہم تو ہر سال ایک یا دو ہزار مشرکین کو قتل کرتے ہیں، آپ صلی اللہ علیہ وسلم نے فرمایا: ”میں وہ (جہاد) مراد نہیں لے رہا، بلکہ (ہرج سے مراد) تمہارا آپس میں ایک دوسرے کو قتل کرنا ہے۔“ انہوں نے (حیرت سے) عرض کی: کیا ہم ہوش و حواس میں ہوتے ہوئے ایسا کریں گے؟ آپ صلی اللہ علیہ وسلم نے ارشاد فرمایا: ”اللہ تعالیٰ اس زمانے کے لوگوں کے دلوں کو اسی طرح مردہ کر دے گا جس طرح وہ ان کے بدنوں کو موت دیتا ہے۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6293]