سیدنا ابوہریرہ رضی اللہ عنہ سے روایت ہے کہ ”رسول اللہ صلی اللہ علیہ وسلم نے ایک لشکر روانہ فرمایا، پس ان مجاہدین نے بہت زیادہ مالِ غنیمت حاصل کیا اور نہایت تیزی کے ساتھ واپس لوٹ آئے، تو ایک شخص نے عرض کیا...“ (پھر راوی نے بقیہ) حدیث (ذکر کی ہے)۔ [مسند أبي يعلى الموصلي/تابع مسند أبي هريرة رضي الله عنه/حدیث: 6473]

سیدنا ابو طلحہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”فرشتے اس گھر میں داخل نہیں ہوتے جس میں کتا یا مورتیاں ہوں۔“ (سیدنا زید بن خالد رضی اللہ عنہ کے شاگرد سعید بن یسار رحمہ اللہ کہتے ہیں کہ) ہم نے کہا کہ ہمیں سیدہ عائشہ رضی اللہ عنہا کے پاس لے چلو، چنانچہ ہم نے انہیں وہ بات بتائی جو سیدنا ابو طلحہ رضی اللہ عنہ نے بیان کی تھی، تو انہوں نے فرمایا: ”مجھے اس (فرمان) کا تو علم نہیں، البتہ میں تمہیں وہ واقعہ سناتی ہوں جو میں نے خود آپ صلی اللہ علیہ وسلم کو کرتے ہوئے دیکھا؛ رسول اللہ صلی اللہ علیہ وسلم اپنے کسی غزوے کے لیے تشریف لے گئے اور میں آپ صلی اللہ علیہ وسلم کی واپسی کی منتظر تھی، میں نے ایک اونی منقش چادر لی جو ہمارے پاس تھی اور اس سے گھر کے سائبان پر پردہ لٹکا دیا، جب آپ صلی اللہ علیہ وسلم تشریف لائے تو میں نے استقبال کرتے ہوئے عرض کیا: «السَّلَامُ عَلَيْكَ يَا رَسُولَ اللَّهِ، الْحَمْدُ لِلَّهِ الَّذِي أَعَزَّكَ وَنَصَرَكَ وَأَكْرَمَكَ» ”اے اللہ کے رسول! آپ پر سلامتی ہو، تمام تعریفیں اس اللہ کے لیے ہیں جس نے آپ کو غلبہ عطا فرمایا، آپ کی مدد فرمائی اور آپ کو سرفراز فرمایا۔“ سیدہ عائشہ رضی اللہ عنہا فرماتی ہیں کہ آپ صلی اللہ علیہ وسلم نے اپنا سرِ مبارک اٹھایا اور اس چادر کو دیکھا مگر مجھے کوئی جواب نہ دیا، اور میں نے آپ صلی اللہ علیہ وسلم کے چہرہِ انور پر ناپسندیدگی کے آثار پہچان لیے، آپ صلی اللہ علیہ وسلم آگے بڑھے اور اس چادر کو پھاڑ کر اتار دیا، پھر ارشاد فرمایا: ”اللہ نے ہمیں یہ حکم نہیں دیا ہے کہ ہم اس کی عطا کی ہوئی چیزوں میں سے پتھر اور اینٹ کو کپڑے پہنائیں“۔ سیدہ عائشہ رضی اللہ عنہا فرماتی ہیں کہ پھر میں نے اس کپڑے کو کاٹ کر اس کا ایک تکیہ بنا لیا اور اس میں کھجور کی چھال بھر دی، تو آپ صلی اللہ علیہ وسلم نے مجھ پر اس کا کوئی عیب نہیں نکالا۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6474]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”اگر لوگوں کو اس (اجر و فضیلت) کا علم ہو جائے جو پہلی صف میں (شامل ہونے میں) ہے، تو (وہاں جگہ پانے کے لیے) قرعہ اندازی کرنے کی نوبت آ جائے۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6475]

ابورافع رحمہ اللہ سے روایت ہے کہ انہوں نے بیان کیا کہ میں نے سیدنا ابوہریرہ رضی اللہ عنہ کے ہمراہ عشاء کی نماز پڑھی تو انہوں نے سورہ ﴿إِذَا السَّمَاءُ انْشَقَّتْ﴾ کی تلاوت فرمائی (اور سجدہ تلاوت کیا)، میں نے ان سے اس کے بارے میں دریافت کیا تو انہوں نے فرمایا: ”ابوالقاسم صلی اللہ علیہ وسلم نے اس سورت میں سجدہ کیا تھا اور میں آپ صلی اللہ علیہ وسلم کے ساتھ تھا“ - سلیمان تیمی رحمہ اللہ کہتے ہیں کہ یا انہوں نے یہ الفاظ کہے: ”میں نے اس سورت میں ابوالقاسم صلی اللہ علیہ وسلم کے ساتھ سجدہ کیا تھا، چنانچہ میں ہمیشہ اس میں سجدہ کرتا رہوں گا یہاں تک کہ ابوالقاسم صلی اللہ علیہ وسلم سے جا ملوں“۔ [مسند أبي يعلى الموصلي/تابع مسند أبي هريرة رضي الله عنه/حدیث: 6476]

ابنِ عطاء اپنے والد سے روایت کرتے ہیں کہ سیدنا ابوہریرہ رضی اللہ عنہ اپنے قبیلے کے لوگوں سے ملاقات کے لیے تشریف لے گئے تو وہ ان کی خدمت میں ابتدائی دور کی نہایت عمدہ اور باریک روٹیاں لے کر آئے، جب آپ رضی اللہ عنہ نے ان روٹیوں کو دیکھا تو بے اختیار رو پڑے، آپ رضی اللہ عنہ سے پوچھا گیا کہ اے ابوہریرہ! آپ کو کس بات نے رلایا ہے؟ تو آپ رضی اللہ عنہ نے ارشاد فرمایا: ”رسول اللہ صلی اللہ علیہ وسلم نے اپنی چشمِ مبارک سے کبھی ایسی روٹی نہیں دیکھی تھی۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6477]

سیدنا ابو ہریرہ رضی اللہ عنہ سے روایت ہے کہ انہوں نے فرمایا: ”رسول اللہ صلی اللہ علیہ وسلم کے اہل خانہ پر کئی کئی چاند (یعنی مہینے) اس حال میں گزر جاتے تھے کہ ان کے گھروں میں سے کسی کے گھر میں نہ تو کوئی چراغ جلایا جاتا تھا اور نہ ہی (سالن وغیرہ پکانے کے لیے) آگ روشن کی جاتی تھی، اور اگر انہیں کبھی زیتون کا تیل میسر آجاتا تو وہ اسے (بدن پر) مل لیتے تھے اور اگر کبھی چربی دستیاب ہوتی تو اسے کھا لیتے تھے۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6478]

عبید بن ابی عبید رحمہ اللہ بیان کرتے ہیں کہ میں سیدنا ابوہریرہ رضی اللہ عنہ کے ہمراہ مسجد کی طرف جا رہا تھا کہ ایک معطر خاتون ان کے پاس سے گزری جس سے خوشبو کے جھونکے مہک رہے تھے، تو سیدنا ابوہریرہ رضی اللہ عنہ نے اس سے دریافت فرمایا: ”اے جبار کی بندی! تو کہاں جا رہی ہے؟“ اس نے جواب دیا: ”مسجد جا رہی ہوں“، آپ نے پوچھا: ”کیا تو نے اسی (مسجد) کی خاطر خوشبو لگائی ہے؟“ اس نے عرض کیا: ”جی ہاں“، تو آپ رضی اللہ عنہ نے فرمایا: ”بے شک میں نے رسول اللہ صلی اللہ علیہ وسلم کو یہ ارشاد فرماتے ہوئے سنا ہے: «أَيُّمَا امْرَأَةٍ تَطَيَّبَتْ لِهَذَا الْمَسْجِدِ لِتَخْرُجَ إِلَيْهِ، لَمْ تُقْبَلْ لَهَا صَلَاةٌ حَتَّى تَغْتَسِلَ مِنْهُ غُسْلَهَا مِنَ الْجَنَابَةِ» ”جو عورت بھی اس مسجد (میں آنے) کے لیے خوشبو لگائے تاکہ وہ اس کی طرف نکلے، تو اس کی کوئی نماز قبول نہیں کی جائے گی یہاں تک کہ وہ اس (خوشبو) کی وجہ سے ویسا ہی غسل کرے جیسا غسلِ جنابت کیا جاتا ہے“۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6479]

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”جھوٹی قسم سامانِ تجارت کو بکوانے کا ذریعہ تو ہے لیکن یہ نفع کو مٹا دینے والی ہے۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6480]

سیدنا ابوہریرہ رضی اللہ عنہ سے مروی ہے کہ رسول اللہ صلی اللہ علیہ وسلم نے ارشاد فرمایا: ”آپس میں گالی گلوچ کرنے والے دو افراد جو کچھ بھی کہیں، اس کا سارا وبال پہل کرنے والے پر ہی ہے، جب تک کہ مظلوم (بدلہ لیتے ہوئے) حد سے تجاوز نہ کرے۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6481]

سیدنا ابوہریرہ رضی اللہ عنہ سے روایت ہے کہ سیدنا ابی بن کعب رضی اللہ عنہ نے رسول اللہ صلی اللہ علیہ وسلم کے سامنے ام القرآن (سورہ فاتحہ) کی تلاوت کی تو آپ صلی اللہ علیہ وسلم نے ارشاد فرمایا: ”اس ذات کی قسم جس کے قبضۂ قدرت میں میری جان ہے! اللہ تعالیٰ نے نہ تورات میں، نہ انجیل میں، نہ زبور میں اور نہ ہی فرقان (قرآن) میں اس جیسی کوئی سورت نازل فرمائی ہے، بلاشبہ یہی وہ بار بار دہرائی جانے والی سات آیات ﴿السَّبْعُ الْمَثَانِي﴾ اور وہ قرآنِ عظیم ہے جو مجھے عطا کیا گیا ہے۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6482]