سیدہ حفصہ رضی اللہ عنہا سے روایت ہے کہ رسول اللہ صلی اللہ علیہ وسلم نے ہمیں حکم دیا کہ ہم (اپنا احرام) عمرہ کر کے کھول دیں، تو میں نے عرض کی: ”اے اللہ کے رسول صلی اللہ علیہ وسلم ! آپ کو احرام کھولنے سے کیا چیز مانع ہے؟“ تو آپ صلی اللہ علیہ وسلم نے ارشاد فرمایا: ”بے شک میں نے ہدی (قربانی کا جانور) ساتھ لی ہے اور اپنے سر کے بالوں کو (گوند وغیرہ لگا کر) جما لیا ہے۔“ [مسند أبي يعلى الموصلي/حديث حفصة أم المؤمنين رضي الله عنها/حدیث: 7052]

سیدہ حفصہ بنت عمر رضی اللہ عنہا سے روایت ہے کہ رسول اللہ صلی اللہ علیہ وسلم نے ارشاد فرمایا: ”کسی بھی ایسی عورت کے لیے جو اللہ اور اس کے رسول پر ایمان رکھتی ہو، یا اللہ اور یومِ آخرت پر یقین رکھتی ہو، یہ حلال نہیں ہے کہ وہ کسی میت پر تین دن سے زیادہ سوگ منائے، سوائے اپنے شوہر کے۔“ [مسند أبي يعلى الموصلي/حديث حفصة أم المؤمنين رضي الله عنها/حدیث: 7053]

سیدنا عبداللہ بن عمر رضی اللہ عنہما بیان کرتے ہیں کہ انہیں ام المؤمنین سیدہ حفصہ رضی اللہ عنہا نے خبر دی کہ ”نبی کریم صلی اللہ علیہ وسلم جب صبحِ صادق طلوع ہو جاتی تو (فجر کے فرض سے پہلے سنتِ فجر کی) دو مختصر رکعتیں ادا فرمایا کرتے تھے۔“ [مسند أبي يعلى الموصلي/حديث حفصة أم المؤمنين رضي الله عنها/حدیث: 7054]

سیدہ حفصہ رضی اللہ عنہا سے روایت ہے کہ انہوں نے فرمایا: ”میں نے رسول اللہ صلی اللہ علیہ وسلم کو نفل نماز بیٹھ کر پڑھتے ہوئے کبھی نہیں دیکھا، یہاں تک کہ آپ صلی اللہ علیہ وسلم کی وفات سے ایک سال قبل کا عرصہ آیا، تو آپ صلی اللہ علیہ وسلم بیٹھ کر نماز ادا فرمانے لگے؛ آپ صلی اللہ علیہ وسلم اس میں سورت کی تلاوت فرماتے تو اسے اس قدر ٹھہر ٹھہر کر اور ترتیل کے ساتھ پڑھتے کہ وہ سورت (اپنی قرات کی طوالت کی وجہ سے) اس سورت سے بھی زیادہ طویل ہو جاتی جو (آیات کی تعداد میں) اس سے بڑی ہوتی تھی“۔ [مسند أبي يعلى الموصلي/حديث حفصة أم المؤمنين رضي الله عنها/حدیث: 7055]

سیدنا ابن عمر رضی اللہ عنہما سیدہ حفصہ رضی اللہ عنہا سے روایت کرتے ہیں کہ انہوں نے نبی کریم صلی اللہ علیہ وسلم سے دریافت کیا کہ ”آخر کیا وجہ ہے کہ آپ اپنے عمرہ کی ادائیگی کے بعد (صحابہ کی طرح) احرام سے حلال نہیں ہوئے؟“ تو آپ صلی اللہ علیہ وسلم نے ارشاد فرمایا: ”یقیناً میں نے اپنے سر کے بالوں کو (گوند وغیرہ سے) جما لیا ہے اور اپنی ہدی (قربانی کے جانور) کے گلے میں پٹہ ڈال دیا ہے، اس لیے میں اس وقت تک احرام ختم نہیں کروں گا جب تک کہ (یومِ نحر کو) قربانی نہ کر لوں۔“ [مسند أبي يعلى الموصلي/حديث حفصة أم المؤمنين رضي الله عنها/حدیث: 7056]

سیدنا عبد اللہ بن عمر رضی اللہ عنہما سے روایت ہے کہ انہوں نے فرمایا: ”میں نے خواب میں دیکھا گویا میرے ہاتھ میں ریشم (استبرق) کا ایک ٹکڑا ہے، اور میں جنت کے جس مقام کی طرف بھی اس کے ذریعے اشارہ کرتا ہوں، وہ مجھے اڑا کر وہیں لے جاتا ہے۔“ راوی بیان کرتے ہیں کہ پھر سیدہ حفصہ رضی اللہ عنہا نے یہ خواب نبی کریم صلی اللہ علیہ وسلم کے سامنے بیان کیا، تو آپ صلی اللہ علیہ وسلم نے ارشاد فرمایا: ”بلا شبہ تمہارا بھائی ایک صالح انسان ہے“ یا فرمایا: ”بے شک عبد اللہ ایک نیک بخت مرد ہے۔“ [مسند أبي يعلى الموصلي/حديث حفصة أم المؤمنين رضي الله عنها/حدیث: 7057]

سیدہ حفصہ بنت عمر رضی اللہ عنہا سے روایت ہے کہ ”رسول اللہ صلی اللہ علیہ وسلم جب آرام فرمانے کے لیے اپنے بستر پر تشریف لاتے تو اپنا دایاں ہاتھ اپنے رخسارِ مبارک کے نیچے رکھتے اور تین مرتبہ یہ دعا مانگتے: «رَبِّ قِنِي عَذَابَكَ يَوْمَ تَبْعَثُ عِبَادَكَ» ”اے میرے رب! مجھے اپنے اس عذاب سے بچا لینا جس دن تو اپنے بندوں کو دوبارہ زندہ کر کے اٹھائے گا۔“” [مسند أبي يعلى الموصلي/حديث حفصة أم المؤمنين رضي الله عنها/حدیث: 7058]

سیدہ حفصہ رضی اللہ عنہا سے روایت ہے کہ نبی کریم صلی اللہ علیہ وسلم ہر ماہ تین دن کے روزے رکھا کرتے تھے، جن میں آپ صلی اللہ علیہ وسلم ”پیر، جمعرات اور پھر دوسرے ہفتے کا پیر“ روزہ رکھتے تھے۔ [مسند أبي يعلى الموصلي/حديث حفصة أم المؤمنين رضي الله عنها/حدیث: 7059]

سیدنا حارثہ بن وہب رضی اللہ عنہ بیان کرتے ہیں کہ مجھے نبی کریم صلی اللہ علیہ وسلم کی زوجہ مطہرہ سیدہ حفصہ رضی اللہ عنہا نے بتایا کہ ”رسول اللہ صلی اللہ علیہ وسلم اپنا دایاں ہاتھ کھانے اور پینے کے لیے استعمال فرماتے تھے، جبکہ اس کے علاوہ دیگر کاموں کے لیے اپنا بایاں ہاتھ استعمال فرماتے تھے۔“ [مسند أبي يعلى الموصلي/حديث حفصة أم المؤمنين رضي الله عنها/حدیث: 7060]

نافع (رحمہ اللہ) سے روایت ہے کہ سیدنا ابن عمر (رضی اللہ عنہما) نے مدینہ منورہ کی کسی گلی میں ابن صیاد کو دیکھا تو سیدنا ابن عمر (رضی اللہ عنہما) نے اسے برا بھلا کہا اور اس کی تذلیل کی، جس پر وہ (غصے سے) اس قدر پھول گیا کہ اس نے راستہ بند کر دیا، سیدنا ابن عمر (رضی اللہ عنہما) نے اسے ایک لاٹھی ماری تو وہ پرسکون ہو گیا، پھر وہ دوبارہ اسی طرح پھول گیا یہاں تک کہ راستہ رک گیا، تو سیدنا ابن عمر (رضی اللہ عنہما) نے اپنے پاس موجود لاٹھی سے اسے اس قدر مارا کہ وہ اس پر ٹوٹ گئی، اس پر سیدہ حفصہ (رضی اللہ عنہا) نے ان سے فرمایا: ”آپ کا اس سے کیا معاملہ ہے؟ آپ کو اس (سے الجھنے) پر کس بات نے اکسا رکھا ہے؟ کیا آپ نے رسول اللہ صلی اللہ علیہ وسلم کو یہ فرماتے ہوئے نہیں سنا کہ: «إِنَّمَا يَخْرُجُ الدَّجَّالُ مِنْ غَضْبَةٍ يَغْضَبُهَا» ”دجال کا خروج تو محض اس کے ایک غصے کی وجہ سے ہو گا جو اسے (کسی بات پر) آئے گا“۔“ [مسند أبي يعلى الموصلي/حديث حفصة أم المؤمنين رضي الله عنها/حدیث: 7061]