سیدنا جابر بن سمرہ رضی اللہ عنہ سے روایت ہے کہ انہوں نے فرمایا: ”میں نے رسول اللہ صلی اللہ علیہ وسلم کو دیکھا کہ آپ صلی اللہ علیہ وسلم منبر پر کھڑے ہو کر خطبہ ارشاد فرماتے، پھر آپ صلی اللہ علیہ وسلم (تھوڑی دیر کے لیے) بیٹھ جاتے اور اس دوران کوئی گفتگو نہ فرماتے، پھر دوبارہ کھڑے ہو کر دوسرا خطبہ ارشاد فرماتے، پس جو شخص بھی تم سے یہ بیان کرے کہ اس نے آپ صلی اللہ علیہ وسلم کو بیٹھ کر خطبہ دیتے ہوئے دیکھا ہے تو اس کی ہرگز تصدیق نہ کرنا۔“ [مسند أبي يعلى الموصلي/حديث جابر بن سمرة السوائي، عن النبي صلى الله عليه وسلم/حدیث: 7441]

سیدنا جابر رضی اللہ عنہ سے روایت ہے کہ میں نے رسول اللہ صلی اللہ علیہ وسلم کو یہ فرماتے ہوئے سنا کہ ”بے شک قیامت سے پہلے بہت سے کذاب (انتہائی جھوٹے لوگ) ظاہر ہوں گے۔“ [مسند أبي يعلى الموصلي/حديث جابر بن سمرة السوائي، عن النبي صلى الله عليه وسلم/حدیث: 7442]

سیدنا جابر بن سمرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”بلاشبہ میں حوضِ (کوثر) پر تمہارا پیش رو ہوں گا، اور یقیناً اس کے دونوں کناروں کا درمیانی فاصلہ اتنا (طویل) ہے جتنا صنعاء اور ایلہ کے درمیان ہے، اور وہاں موجود (پانی پینے کے) کوزے (تعداد اور چمک میں) آسمان کے ستاروں کی مانند ہیں۔“ [مسند أبي يعلى الموصلي/حديث جابر بن سمرة السوائي، عن النبي صلى الله عليه وسلم/حدیث: 7443]

سیدنا جابر بن سمرہ رضی اللہ عنہ سے روایت ہے کہ میں نے رسول اللہ صلی اللہ علیہ وسلم کو یہ ارشاد فرماتے ہوئے سنا: «لَتَفْتَحَنَّ عِصَابَةٌ مِنَ الْمُسْلِمِينَ أَوْ مِنَ الْمُؤْمِنِينَ كَنْزَ آلِ كِسْرَى الَّذِي فِي الْبِيضِ» ”مسلمانوں یا (راوی کو شک ہے کہ آپ صلی اللہ علیہ وسلم نے فرمایا) مومنوں کی ایک جماعت آلِ کسریٰ کے اس خزانے کو ضرور فتح کر لے گی جو سفید محل میں واقع ہے،“ نیز میں نے آپ صلی اللہ علیہ وسلم کو یہ بھی فرماتے ہوئے سنا: «إِنَّ اللَّهَ سَمَّى الْمَدِينَةَ طَابَةَ» ”بے شک اللہ تعالیٰ نے مدینہ منورہ کا نام ’طابہ‘ (پاکیزہ) رکھا ہے۔“ [مسند أبي يعلى الموصلي/حديث جابر بن سمرة السوائي، عن النبي صلى الله عليه وسلم/حدیث: 7444]

سیدنا جابر بن سمرہ رضی اللہ عنہ سے روایت ہے کہ ایک شخص کا خچر مر گیا، تو وہ رسول اللہ صلی اللہ علیہ وسلم کی خدمت میں اس کا شرعی حکم دریافت کرنے کے لیے حاضر ہوا؛ سیدنا جابر رضی اللہ عنہ کا بیان ہے کہ رسول اللہ صلی اللہ علیہ وسلم نے اس کے مالک سے دریافت فرمایا: «مَا لَكَ مَا يُغْنِيكَ عَنْهَا؟» ”کیا تیرے پاس کوئی ایسی چیز نہیں ہے جو تجھے اس (مردار) سے بے نیاز کر دے؟“ اس نے عرض کی: نہیں، تو آپ صلی اللہ علیہ وسلم نے ارشاد فرمایا: ”پھر جاؤ اور اسے کھا لو۔“ [مسند أبي يعلى الموصلي/حديث جابر بن سمرة السوائي، عن النبي صلى الله عليه وسلم/حدیث: 7445]

سیدنا جابر رضی اللہ عنہ سے روایت ہے کہ ”میں نے سیدنا ماعز بن مالک رضی اللہ عنہ کو دیکھا جب انہیں نبی اکرم صلی اللہ علیہ وسلم کی خدمت میں لایا گیا، اس وقت وہ ننگے سر تھے اور ان کے جسم پر چادر نہیں تھی، پھر انہوں نے اپنے خلاف چار مرتبہ یہ اعتراف و گواہی دی کہ انہوں نے یقیناً زنا کیا ہے، تو رسول اللہ صلی اللہ علیہ وسلم نے دریافت فرمایا: «فَلَعَلَّكَ؟» ”شاید تم نے محض بوس و کنار کیا ہو گا؟“ انہوں نے عرض کیا: ”نہیں اللہ کی قسم! اس بدبخت نے یقیناً زنا ہی کیا ہے“، راوی کہتے ہیں کہ پھر آپ صلی اللہ علیہ وسلم نے انہیں رجم کروا دیا، اس کے بعد آپ صلی اللہ علیہ وسلم نے خطبہ ارشاد فرماتے ہوئے فرمایا: ”خبردار! جب بھی کچھ لوگ اللہ کی راہ میں نکلتے ہیں تو ان کے پیچھے رہ جانے والوں میں سے کوئی شخص بکرے کی طرح منمنانے (شہوت آلود آوازیں نکالنے) لگتا ہے اور ان (پیچھے رہ جانے والی خواتین) میں سے کسی کو تھوڑا سا دودھ دے کر بہلاتا ہے، سن لو! اگر اللہ عزوجل نے مجھے ان میں سے کسی پر قدرت عطا فرمائی تو میں اسے ان عورتوں کے معاملے میں دوسروں کے لیے عبرت بنا دوں گا“۔ [مسند أبي يعلى الموصلي/حديث جابر بن سمرة السوائي، عن النبي صلى الله عليه وسلم/حدیث: 7446]

سیدنا جابر بن سمرہ رضی اللہ عنہ سے روایت ہے کہ ”رسول اللہ صلی اللہ علیہ وسلم (عمومی طور پر) تمہاری ان نمازوں کی طرح ہی نماز ادا فرماتے تھے، البتہ آپ صلی اللہ علیہ وسلم عشاء کی نماز کو تمہاری (معمول کی) نماز کی نسبت کچھ تاخیر سے ادا فرماتے تھے، اور آپ صلی اللہ علیہ وسلم نماز میں اختصار (تخفیف) فرمایا کرتے تھے۔“ [مسند أبي يعلى الموصلي/حديث جابر بن سمرة السوائي، عن النبي صلى الله عليه وسلم/حدیث: 7447]

سیدنا جابر بن سمرہ رضی اللہ عنہ سے روایت ہے کہ بنو سلیم یا اس بستی کے کسی دوسرے لوگوں کی ایک اونٹنی مر گئی، اور وہ ایک حاجت مند گھرانے کے لوگ تھے، چنانچہ انہوں نے نبی کریم صلی اللہ علیہ وسلم سے اسے کھانے کے متعلق دریافت کیا تو ”نبی کریم صلی اللہ علیہ وسلم نے انہیں اسے کھانے کی رخصت عطا فرما دی، پس وہ ان کی پوری سردیوں کی ضرورت کے لیے کافی ہو گئی۔“ [مسند أبي يعلى الموصلي/حديث جابر بن سمرة السوائي، عن النبي صلى الله عليه وسلم/حدیث: 7448]

سیدنا جابر بن سمرہ رضی اللہ عنہ سے روایت ہے کہ انہوں نے فرمایا: ”میں نبی کریم صلی اللہ علیہ وسلم کی مجلسِ اقدس میں سو سے زائد مرتبہ شریک رہا ہوں، (عموماً) آپ صلی اللہ علیہ وسلم کے صحابہ (رضی اللہ عنہم) ایک دوسرے کو اشعار سناتے اور زمانۂ جاہلیت کے احوال و واقعات کا تذکرہ کیا کرتے تھے، تو بسا اوقات آپ صلی اللہ علیہ وسلم بھی ان کی ان باتوں پر تبسم فرمایا کرتے تھے۔“ [مسند أبي يعلى الموصلي/حديث جابر بن سمرة السوائي، عن النبي صلى الله عليه وسلم/حدیث: 7449]

سیدنا جابر بن سمرہ رضی اللہ عنہ سے روایت ہے کہ انہوں نے فرمایا: ”سیدنا بلال رضی اللہ عنہ ظہر کی اذان اس وقت دیا کرتے تھے جب سورج (نصف النہار سے) ڈھل جاتا تھا، اور کبھی کبھار وہ اقامت کہنے میں تو کچھ تاخیر کر لیتے تھے، لیکن وہ اذان کو اس کے مقررہ ابتدائی وقت سے ہرگز مؤخر نہیں کرتے تھے۔“ [مسند أبي يعلى الموصلي/حديث جابر بن سمرة السوائي، عن النبي صلى الله عليه وسلم/حدیث: 7450]