ابویحییٰ الکلاعی بیان کرتے ہیں کہ میں مسجد میں سیدنا مقدام بن معدیکرب رضی اللہ عنہ کی خدمت میں حاضر ہوا اور عرض کیا: اے ابویزید! لوگ یہ گمان کرتے ہیں کہ آپ نے رسول اللہ صلی اللہ علیہ وسلم کی زیارت نہیں فرمائی، انہوں نے (حیرت و تعجب سے) کہا: ”سبحان اللہ! اللہ کی قسم، میں نے یقیناً آپ صلی اللہ علیہ وسلم کو دیکھا ہے، اس وقت میں اپنے چچا کے ہمراہ چل رہا تھا، تو آپ صلی اللہ علیہ وسلم نے میرے اس کان کو (محبت سے) پکڑا اور میرے چچا سے دریافت فرمایا: ”کیا تم خیال کرتے ہو کہ یہ (بچہ بڑا ہو کر) اپنی ماں یا اپنے باپ کو یاد رکھے گا؟“ ہم نے ان سے عرض کیا کہ ہمیں کوئی ایسی حدیث سنائیے جو آپ نے خود نبی کریم صلی اللہ علیہ وسلم سے سنی ہو، انہوں نے کہا کہ میں نے رسول اللہ صلی اللہ علیہ وسلم کو یہ ارشاد فرماتے ہوئے سنا: ”ناقص الخلقت بچہ (جو وضع حمل سے پہلے گر جائے) ہو یا انتہائی ضعیف بوڑھا، سب کو (قیامت کے دن) تینتیس سال کی عمر کے جوانوں کی صورت میں اٹھایا جائے گا، وہ سیدنا آدم علیہ السلام کی (طویل القامت) تخلیق، سیدنا یوسف علیہ السلام جیسے حسن و جمال اور سیدنا ایوب علیہ السلام جیسے (صابر و شاکر) دل کے حامل ہوں گے، ان کے جسم (فطری طور پر) بالوں سے پاک اور آنکھیں سرمگیں ہوں گی“، میں نے دریافت کیا: تو پھر کافر کا کیا معاملہ ہوگا؟ انہوں نے فرمایا: ”کافر کے جسم کو جہنم کی آگ کے لیے اتنا عظیم بنا دیا جائے گا کہ اس کی کھال (کی موٹائی) چالیس ہاتھ ہو جائے گی اور اس کی داڑھوں میں سے ہر ایک داڑھ احد پہاڑ کی مانند (بڑی) ہو جائے گی“۔
مسند ابویعلیٰ: 4626، اس کی سند میں یزید بن سنان الرہاوی ضعیف راوی ہے، تاہم اس حدیث کے بعض اجزاء دیگر صحیح شواہد سے ثابت ہیں۔ [المطالب العالية بزوائد المسانيد الثمانية/كتاب الفتوح/حدیث: 4626]