حضرت ابوقتادہ رضی اللہ عنہ سے روایت ہے کہ وہ اپنے ایک سفر میں جا رہے تھے، ان میں سے کچھ محرم تھے اور کچھ غیر محرم۔ حضرت ابوقتادہ رضی اللہ عنہ نے کہا کہ میں نے ایک جنگلی گدھا دیکھا تو میں گھوڑے پر سوار ہوا اور نیزہ پکڑا۔ میں نے ان سے مدد طلب کی مگر انہوں نے مدد کرنے سے انکار کر دیا۔ میں نے زبردستی ان میں سے کسی سے کوڑا چھینا اور گدھے پر حملہ کر دیا اور اسے شکار کر لیا۔ انہوں نے بھی اس سے کھا لیا، پھر انہیں ڈر محسوس ہوا (کہ کہیں یہ ناجائز نہ ہو) تو نبی صلی اللہ علیہ وسلم سے اس بارے میں پوچھا گیا۔ آپ صلی اللہ علیہ وسلم نے فرمایا: ”کیا تم نے (شکار کی طرف) اشارہ کیا تھا؟ کیا تم نے کوئی مدد کی تھی؟“ انہوں نے کہا: نہیں۔ آپ صلی اللہ علیہ وسلم نے فرمایا: ”کھا سکتے ہو۔“ [سنن نسائي/كتاب مناسك الحج/حدیث: 2829]

حضرت جابر رضی اللہ عنہ بیان کرتے ہیں کہ میں نے رسول اللہ صلی اللہ علیہ وسلم کو فرماتے سنا: ”تمہارے لیے خشکی کا شکار کھانا حلال ہے بشرطیکہ تم نے شکار نہ کیا ہو اور نہ تمہارے لیے شکار کیا گیا ہو۔“ ابوعبدالرحمن (امام نسائی رضی اللہ عنہ) بیان کرتے ہیں کہ راویِ حدیث عمرو بن ابی عمرو علمِ حدیث میں قوی نہیں ہیں، اگرچہ امام مالک رحمہ اللہ نے ان سے روایت لی ہے۔ [سنن نسائي/كتاب مناسك الحج/حدیث: 2830]