حضرت ابوموسیٰ رضی اللہ عنہ سے روایت ہے، انہوں نے فرمایا کہ میرے پاس کچھ اشعری لوگ آئے اور کہا: ہمارے ساتھ رسول اللہ صلی اللہ علیہ وسلم کے پاس چلیں کیونکہ ہمیں (آپ صلی اللہ علیہ وسلم سے) ایک کام ہے، میں ان کے ساتھ چل پڑا، وہ آپ صلی اللہ علیہ وسلم سے کہنے لگے: اے اللہ کے رسول! ہمیں کسی کام پر مقرر فرمائیے، حضرت ابوموسیٰ رضی اللہ عنہ نے کہا: میں نے ان کی اس بات پر (آپ صلی اللہ علیہ وسلم سے) معذرت کی اور آپ صلی اللہ علیہ وسلم کو بتلایا کہ مجھے علم نہیں تھا کہ انہیں کیا کام ہے؟ (ورنہ میں ان کے ساتھ نہ آتا) آپ صلی اللہ علیہ وسلم نے مجھے سچا جانتے ہوئے میری معذرت کو تسلیم فرمایا اور ارشاد فرمایا: ”ہم کسی ایسے شخص کو اپنے کسی کام پر مقرر نہیں کرتے جو خود طلب کرے۔“ [سنن نسائي/كتاب آداب القضاة/حدیث: 5384]

حضرت اسید بن حضیر رضی اللہ عنہ سے روایت ہے کہ ایک انصاری رسول اللہ صلی اللہ علیہ وسلم کے پاس آیا اور عرض کیا: کیا آپ مجھے عامل مقرر نہیں فرمائیں گے جس طرح آپ نے فلاں کو مقرر فرمایا ہے؟ آپ صلی اللہ علیہ وسلم نے فرمایا: ”میرے بعد تم محسوس کرو گے کہ دوسروں کو تم پر ترجیح دی جا رہی ہے، تو تم صبر کرنا حتیٰ کہ مجھے حوض پر ملو۔“ [سنن نسائي/كتاب آداب القضاة/حدیث: 5385]