حضرت مسور بن مخرمہ رضی اللہ عنہما سے روایت ہے، انہوں نے کہا: رسول اللہ صلی اللہ علیہ وسلم نے کچھ قبائیں تقسیم کیں لیکن حضرت مخرمہ رضی اللہ عنہ کو آپ صلی اللہ علیہ وسلم نے کوئی قبا نہ دی جس پر حضرت مخرمہ رضی اللہ عنہ نے کہا: بیٹے! تم رسول اللہ صلی اللہ علیہ وسلم کے پاس میرے ہمراہ چلو۔ میں ان کے ہمراہ چلا گیا۔ پھر انہوں نے کہا: اندر جاؤ اور آپ صلی اللہ علیہ وسلم کو میرے پاس بلا لاؤ۔ حضرت مسور رضی اللہ عنہما کہتے ہیں: میں آپ صلی اللہ علیہ وسلم کو بلا لایا۔ جب آپ صلی اللہ علیہ وسلم باہر تشریف لائے تو ان قباؤں میں سے ایک قبا آپ صلی اللہ علیہ وسلم کے پاس تھی، آپ صلی اللہ علیہ وسلم نے فرمایا: ”ہم نے یہ قبا تیرے لیے چھپا رکھی تھی۔“ حضرت مسور رضی اللہ عنہما کا بیان ہے کہ حضرت مخرمہ رضی اللہ عنہ اسے دیکھ کر خوش ہو گئے۔ [صحيح البخاري/كِتَاب الْهِبَةِ وَفَضْلِهَا وَالتَّحْرِيضِ عَلَيْهَا/حدیث: 2599]