حضرت عائشہ رضی اللہ عنہا ہی سے روایت ہے، انہوں نے کہا کہ رسول اللہ صلی اللہ علیہ وسلم تندرستی کی حالت میں فرماتے تھے: ”نبی اس وقت تک فوت نہیں ہوتا حتی کہ وہ اپنی جگہ جنت میں نہ دیکھ لے، پھر اسے زندگی یا موت کا اختیار دیا جاتا ہے۔“ جب آپ صلی اللہ علیہ وسلم بیمار ہوئے اور آپ کی وفات کا وقت قریب آیا تو آپ میری ران پر سر رکھے ہوئے تھے۔ پہلے آپ پر غشی طاری ہوئی، پھر کچھ افاقہ ہوا تو چھت کی طرف دیکھ کر فرمایا: «اللَّهُمَّ الرَّفِيقَ الْأَعْلَىٰ» ”اے اللہ! مجھے رفیق اعلیٰ سے ملا دے۔“ اس وقت میں نے (دل میں) کہا کہ اب آپ ہمارے پاس رہنا پسند نہیں کریں گے۔ تب مجھے آپ کی اس حدیث کی تصدیق ہو گئی جو آپ بحالت صحت فرمایا کرتے تھے۔ [صحيح البخاري/كِتَاب الْمَغَازِي/حدیث: 4437]

حضرت عائشہ رضی اللہ عنہا ہی سے ایک اور روایت ہے کہ حضرت عبدالرحمن بن ابی بکر رضی اللہ عنہ نبی صلی اللہ علیہ وسلم کے پاس آئے جبکہ میں آپ صلی اللہ علیہ وسلم کو اپنے سینے کا سہارا دے کر بیٹھی تھی۔ حضرت عبدالرحمن رضی اللہ عنہ کے پاس تازہ مسواک تھی جس سے وہ اپنے دانتوں کو صاف کر رہے تھے۔ رسول اللہ صلی اللہ علیہ وسلم اسے دیر تک دیکھتے رہے۔ میں نے وہ مسواک (ان سے) لے کر چبائی اور اسے جھاڑ کر صاف اور نرم کیا، پھر نبی صلی اللہ علیہ وسلم کو پیش کی تو آپ صلی اللہ علیہ وسلم نے اس سے اپنے دانتوں کو صاف کیا۔ میں نے اس سے پہلے کبھی رسول اللہ صلی اللہ علیہ وسلم کو اس طرح اچھی مسواک کرتے نہیں دیکھا۔ پھر مسواک سے فارغ ہوتے ہی رسول اللہ صلی اللہ علیہ وسلم نے اپنا ہاتھ یا انگلی اٹھائی اور تین مرتبہ فرمایا: ”اے اللہ! میں اچھے رفقاء کی رفاقت چاہتا ہوں۔“ پھر آپ صلی اللہ علیہ وسلم وفات پا گئے۔ حضرت عائشہ رضی اللہ عنہا فرمایا کرتی تھیں کہ آپ صلی اللہ علیہ وسلم کی وفات میرے سینے اور ٹھوڑی کے درمیان ہوئی۔ [صحيح البخاري/كِتَاب الْمَغَازِي/حدیث: 4438]

حضرت عائشہ رضی اللہ عنہا سے روایت ہے، انہوں نے بتایا کہ ”رسول اللہ صلی اللہ علیہ وسلم جب بیمار ہوتے تو «الْمُعَوِّذَاتِ» ”معوذات“ سے اپنے بدن پر دم کرتے اور اپنا ہاتھ اپنے بدن پر پھیرتے تھے۔ جب آپ صلی اللہ علیہ وسلم اس بیماری میں مبتلا ہوئے جس میں آپ کی وفات ہوئی تو میں «الْمُعَوِّذَاتِ» ”معوذات“ پڑھ کر آپ صلی اللہ علیہ وسلم پر دم کرتی تھی جس طرح آپ صلی اللہ علیہ وسلم کرتے تھے۔ پھر نبی صلی اللہ علیہ وسلم کا ہاتھ آپ صلی اللہ علیہ وسلم کے جسم پر پھیرتی تھی۔“ [صحيح البخاري/كِتَاب الْمَغَازِي/حدیث: 4439]

حضرت عائشہ رضی اللہ عنہا سے ایک اور روایت ہے کہ انہوں نے نبی صلی اللہ علیہ وسلم سے سنا اور موت سے پہلے آپ صلی اللہ علیہ وسلم کی طرف کان لگایا جبکہ آپ صلی اللہ علیہ وسلم نے اپنی پیٹھ کا میرے ساتھ سہارا لیا ہوا تھا، آپ صلی اللہ علیہ وسلم فرما رہے تھے: «اللَّهُمَّ اغْفِرْ لِي، وَارْحَمْنِي، وَأَلْحِقْنِي بِالرَّفِيقِ الْأَعْلَى» ”اے اللہ! میری مغفرت فرما، مجھ پر رحم فرما اور مجھے رفیقِ اعلیٰ سے ملا دے۔“ [صحيح البخاري/كِتَاب الْمَغَازِي/حدیث: 4440]

حضرت عائشہ رضی اللہ عنہا سے روایت ہے، انہوں نے کہا: نبی صلی اللہ علیہ وسلم نے اپنی اس بیماری میں فرمایا جس سے دوبارہ نہ اٹھ سکے: ”اللہ تعالیٰ یہود پر لعنت کرے، انہوں نے اپنے انبیاء کی قبروں کو سجدہ گاہ بنایا۔“ حضرت عائشہ رضی اللہ عنہا نے فرمایا: ”اگر یہ اندیشہ نہ ہوتا کہ آپ کی قبر کو سجدہ گاہ بنا لیا جائے گا تو آپ کی قبر کو برسرِ عام ظاہر کر دیا جاتا۔“ [صحيح البخاري/كِتَاب الْمَغَازِي/حدیث: 4441]

نبی صلی اللہ علیہ وسلم کی زوجہ محترمہ ام المومنین حضرت عائشہ رضی اللہ عنہا سے روایت ہے، انہوں نے فرمایا: ”جب رسول اللہ صلی اللہ علیہ وسلم بیمار ہوئے اور آپ کا مرض شدت اختیار کر گیا تو آپ نے اپنی بیویوں سے اجازت طلب کی کہ میرے گھر میں آپ کی تیمارداری کی جائے۔ ازواجِ مطہرات نے (بخوشی) اجازت دے دی۔ آپ دو مردوں کے سہارے باہر تشریف لائے جبکہ آپ کے قدم زمین پر لکیر کھینچ رہے تھے۔ آپ حضرت عباس بن عبدالمطلب رضی اللہ عنہ اور ایک دوسرے شخص کے درمیان تھے۔“ (راویِ حدیث) عبیداللہ نے کہا: ”میں نے ام المومنین حضرت عائشہ رضی اللہ عنہا کے ارشاد کا حضرت عبداللہ بن عباس رضی اللہ عنہما سے ذکر کیا تو حضرت عبداللہ بن عباس رضی اللہ عنہما نے کہا: ”تم جانتے ہو کہ دوسرا شخص کون تھا جس کا ام المومنین نے نام نہیں لیا؟“ میں نے کہا: ”نہیں۔“ حضرت ابن عباس رضی اللہ عنہما نے کہا: ”وہ حضرت علی بن ابی طالب رضی اللہ عنہ تھے۔““ نبی صلی اللہ علیہ وسلم کی زوجہ محترمہ حضرت عائشہ رضی اللہ عنہا نے بیان فرمایا: ”جب رسول اللہ صلی اللہ علیہ وسلم میرے گھر تشریف لائے تو آپ کا مرض شدت اختیار کر گیا۔ آپ نے فرمایا: ”میرے اوپر سات مشکیزے بہاؤ جن کے تسمے نہ کھولے گئے ہوں، ممکن ہے کہ میں لوگوں کو وصیت کروں۔“ چنانچہ ہم نے آپ کو نبی صلی اللہ علیہ وسلم کی زوجہ محترمہ ام المومنین حضرت حفصہ رضی اللہ عنہا کے ایک بڑے برتن میں بٹھا دیا۔ پھر ہم نے آپ پر سات مشکیزوں کا پانی بہانا شروع کیا، حتیٰ کہ آپ نے اپنے دست مبارک سے ہماری طرف اشارہ فرمایا کہ تم نے تعمیل کر دی ہے۔“ حضرت عائشہ رضی اللہ عنہا نے فرمایا: ”پھر آپ لوگوں کی طرف تشریف لے گئے اور انہیں نماز پڑھا کر خطبہ دیا۔“ [صحيح البخاري/كِتَاب الْمَغَازِي/حدیث: 4442]

حضرت عائشہ رضی اللہ عنہا اور حضرت ابن عباس رضی اللہ عنہما سے روایت ہے، انہوں نے کہا: ”جب رسول اللہ صلی اللہ علیہ وسلم بیمار ہوئے تو آپ اپنے چہرے پر چادر ڈالتے تھے۔ پھر جب سانس گھٹنے لگتا تو اسے چہرے سے ہٹا دیتے۔ پھر اسی حالت میں آپ نے فرمایا: ”اللہ تعالیٰ یہود و نصاریٰ پر لعنت فرمائے، انہوں نے اپنے انبیاء کی قبروں کو سجدہ گاہ بنا لیا۔“ آپ اپنی امت کو اس (فعل) سے ڈراتے تھے جو یہود و نصاریٰ نے کیا تھا۔“ [صحيح البخاري/كِتَاب الْمَغَازِي/حدیث: 4443]

حضرت عائشہ رضی اللہ عنہا اور حضرت ابن عباس رضی اللہ عنہما سے روایت ہے، انہوں نے کہا: ”جب رسول اللہ صلی اللہ علیہ وسلم بیمار ہوئے تو آپ صلی اللہ علیہ وسلم اپنے چہرے پر چادر ڈالتے تھے، پھر جب سانس گھٹنے لگتا تو اسے چہرے سے ہٹا دیتے، پھر اسی حالت میں آپ صلی اللہ علیہ وسلم نے فرمایا: «لَعْنَةُ اللّٰهِ عَلَى الْيَهُودِ وَالنَّصَارَى اتَّخَذُوا قُبُورَ أَنْبِيَائِهِمْ مَسَاجِدَ» ”اللہ تعالیٰ یہود و نصاریٰ پر لعنت فرمائے، انہوں نے اپنے انبیاء کی قبروں کو سجدہ گاہ بنا لیا۔“ آپ صلی اللہ علیہ وسلم اپنی امت کو اس (فعل) سے ڈراتے تھے جو یہود و نصاریٰ نے کیا تھا۔“ [صحيح البخاري/كِتَاب الْمَغَازِي/حدیث: 4444]

حضرت عائشہ رضی اللہ عنہا سے روایت ہے، انہوں نے کہا: ”میں نے رسول اللہ صلی اللہ علیہ وسلم سے (مرض کے دوران میں حضرت ابوبکر رضی اللہ عنہ کو امام بنانے کے معاملے میں) بار بار پوچھا، آپ صلی اللہ علیہ وسلم سے بار بار پوچھنے پر مجھے اس بات نے آمادہ کیا کہ مجھے یقین تھا کہ جو شخص بھی امامت میں رسول اللہ صلی اللہ علیہ وسلم کے قائم مقام ہو گا لوگ اس سے بدفالی لیں گے، اس لیے میں چاہتی تھی کہ رسول اللہ صلی اللہ علیہ وسلم حضرت ابوبکر رضی اللہ عنہ کو اس کا حکم نہ دیں۔“ اس روایت کو حضرت عبداللہ بن عمر، حضرت ابوموسیٰ اور حضرت عبداللہ بن عباس رضی اللہ عنہم نے بھی نبی صلی اللہ علیہ وسلم سے بیان کیا ہے۔ [صحيح البخاري/كِتَاب الْمَغَازِي/حدیث: 4445]

حضرت عائشہ رضی اللہ عنہا ہی سے روایت ہے، انہوں نے فرمایا کہ ”نبی صلی اللہ علیہ وسلم کا سر مبارک وفات کے وقت میری ٹھوڑی اور سینے کے درمیان تھا۔ اور جب سے میں نے نبی صلی اللہ علیہ وسلم پر موت کی سختی دیکھی ہے، اس کے بعد موت کی سختی کو کسی کے لیے برا نہیں سمجھتی۔“ [صحيح البخاري/كِتَاب الْمَغَازِي/حدیث: 4446]