نبی صلی اللہ علیہ وسلم کی زوجہ محترم ام المؤمنین حضرت عائشہ رضی اللہ عنہا سے روایت ہے، انہوں نے بتایا کہ دورِ جاہلیت میں نکاح کی چار صورتیں تھیں: ”ایک صورت تو یہی تھی جیسا کہ آج کل لوگ کرتے ہیں، ایک شخص دوسرے شخص کے پاس اس کی زیرِ پرورش لڑکی یا اس کی بیٹی سے نکاح کا پیغام بھیجتا، پھر اس کا مہر دے کر اس سے نکاح کرتا۔ دوسری صورت یہ تھی کہ ایک آدمی اپنی بیوی سے کہتا جب وہ حیض سے پاک ہو جاتی کہ تو فلاں شخص کے پاس چلی جا اور اس سے منہ کالا کر لے، اس مدت میں شوہر خود اس سے جدا رہتا اور اس سے ہم بستری نہ کرتا، پھر جب اس غیر مرد سے اس کا حمل ظاہر ہو جاتا جس سے اس نے منہ کالا کیا تھا، اس کے بعد اگر خاوند کی طبیعت چاہتی تو اس سے صحبت کرتا، اور ایسا اس لیے کرتے تھے تاکہ ان کا لڑکا اچھا اور خوبصورت پیدا ہو، یہ نکاح «نِكَاحُ الِاسْتِبْضَاعِ» ”نکاحِ استبضاع“ کہلاتا تھا۔ تیسری صورت یہ تھی کہ چند آدمی، جو دس سے کم ہوتے، کسی عورت کے پاس باری باری جاتے اور ان میں سے ہر ایک اس سے ہم بستر ہوتا، پھر جب وہ عورت حاملہ ہو جاتی تو وضعِ حمل کے چند دن بعد وہ ان تمام مردوں کو بلاتی، اس موقع پر ان میں سے کوئی آدمی انکار نہیں کر سکتا تھا، چنانچہ وہ سب اس عورت کے پاس جمع ہو جاتے تو وہ ان سے کہتی کہ تم اپنے حال کو خوب جانتے ہو! اب میں نے یہ بچہ جنم دیا ہے، (پھر وہ کہتی) اے فلاں! یہ بچہ تیرا ہے، وہ جس کا چاہتی نام لے لیتی، پھر وہ اس کا لڑکا سمجھا جاتا اور وہ شخص اس سے انکار کی جرات بھی نہیں کر سکتا تھا۔ چوتھی صورت یہ تھی کہ بہت سے لوگ ایک فاحشہ عورت کے پاس آیا جایا کرتے تھے، عورت اپنے پاس کسی بھی آنے والے کو نہیں روکتی تھی، یہ فاحشہ عورتیں ہوتی تھیں جنہوں نے اپنے دروازوں پر جھنڈے لگا رکھے تھے جو ان کے لیے امتیازی نشان کی حیثیت رکھتے تھے، جو کوئی بھی ان کے پاس جانے کی خواہش رکھتا ان کے پاس چلا جاتا، جب ان میں سے کوئی عورت حاملہ ہو جاتی اور بچہ جنم دیتی تو اس کے پاس آنے جانے والے سب لوگ جمع ہو جاتے اور کسی قیافہ شناس کو بلاتے، وہ جس کے ساتھ بچے کی مشابہت دیکھتا اس کے ساتھ بچے کو لاحق کر دیتا، پھر وہ بچہ اس کا بیٹا کہا جاتا اور وہ آدمی اس کا انکار نہیں کر سکتا تھا۔ جب حضرت محمد صلی اللہ علیہ وسلم کو حق کے ساتھ مبعوث کیا گیا تو آپ صلی اللہ علیہ وسلم نے جاہلیت کے تمام طریقے کالعدم کر دیے اور صرف اس نکاح کو باقی رکھا جس کا آج کل رواج ہے۔“ [صحيح البخاري/كِتَاب النِّكَاحِ/حدیث: 5127]

حضرت عائشہ رضی اللہ عنہا سے روایت ہے، انہوں نے درج ذیل آیتِ کریمہ ﴿وَمَا يُتْلَىٰ عَلَيْكُمْ فِي الْكِتَابِ فِي يَتَامَى النِّسَاءِ اللَّاتِي لَا تُؤْتُونَهُنَّ مَا كُتِبَ لَهُنَّ وَتَرْغَبُونَ أَن تَنكِحُوهُنَّ﴾ [سورة النساء: 127] ”وہ آیات جو کتاب میں یتیم لڑکیوں کے بارے میں تمہیں پڑھ کر سنائی جاتی ہیں جنہیں تم وہ چاہتے ہو کہ ان سے نکاح کرلو۔“ کی تفسیر کرتے ہوئے فرمایا: ”یہ آیت ایسی لڑکی کے متعلق نازل ہوئی تھی جو کسی شخص کے زیرِ پرورش ہوتی شاید وہ اس کے مال و جائیداد میں شریک ہوتی اور وہی آدمی لڑکی کا زیادہ حقدار ہوتا جبکہ وہ اس سے روگردانی کرتا، چنانچہ اس کے مال کے باعث کسی اور سے اس کا نکاح کرنے سے بھی پہلو تہی کرتا، مبادا کوئی دوسرا اس کے مال میں شریک ہو جائے، اس لیے وہ کسی مرد سے اس کی شادی نہیں ہونے دیتا تھا کیونکہ وہ نہیں چاہتا تھا کہ کوئی دوسرا اس کے مال میں حصہ دار بنے۔“ [صحيح البخاري/كِتَاب النِّكَاحِ/حدیث: 5128]

حضرت ابن عمر رضی اللہ عنہما سے روایت ہے، انہوں نے بتایا کہ جب حضرت حفصہ بنت عمر رضی اللہ عنہا، حضرت خنیس بن حذافہ سہمی رضی اللہ عنہ سے بیوہ ہوئیں (وہ نبی صلی اللہ علیہ وسلم کے اصحاب سے تھے اور غزوہ بدر میں شریک تھے، ان کی وفات مدینہ طیبہ میں ہوئی تھی) تو حضرت عمر بن خطاب رضی اللہ عنہ نے کہا: ”میں عثمان بن عفان رضی اللہ عنہ سے ملا اور انہیں حضرت حفصہ رضی اللہ عنہا سے نکاح کی پیش کش کی اور ان سے کہا: اگر آپ چاہیں تو حفصہ کا نکاح آپ سے کردوں؟“ حضرت عثمان بن عفان رضی اللہ عنہ نے جواب دیا: ”میں اس معاملے کے متعلق غور کروں گا۔“ چند دن میں نے انتظار کیا، اس کے بعد وہ مجھ سے ملے اور کہا: ”میرے لیے یہ ظاہر ہوا ہے کہ میں ابھی نکاح نہ کروں۔“ حضرت عمر بن خطاب رضی اللہ عنہ نے کہا: ”پھر میں حضرت ابوبکر صدیق رضی اللہ عنہ سے ملا اور ان سے کہا: اگر آپ چاہیں تو میں حفصہ رضی اللہ عنہا کا نکاح آپ سے کردوں۔“ [صحيح البخاري/كِتَاب النِّكَاحِ/حدیث: 5129]

حضرت معقل بن یسار رضی اللہ عنہ سے روایت ہے، انہوں نے کہا: یہ آیت ﴿فَلَا تَعْضُلُوهُنَّ أَنْ يَنْكِحْنَ أَزْوَاجَهُنَّ﴾ ”عورتوں کو (نکاح کرنے سے) مت روکو“ [سورة البقرة: 232] میرے متعلق نازل ہوئی۔ ہوا یوں کہ میں نے اپنی بہن کا نکاح ایک آدمی سے کر دیا، اس نے اسے طلاق دے دی۔ جب عدت ختم ہو گئی تو وہی شخص میری بہن سے دوبارہ نکاح کرنے کا پیغام لے کر آیا۔ میں نے اسے کہا: ”میں نے تیرے ساتھ (اپنی بہن کا) نکاح کر دیا، اسے تیری بیوی بنایا اور تمہیں عزت دی لیکن تم نے اسے طلاق دے دی، اب پھر تم اس سے نکاح کا پیغام لے کر آئے ہو، اللہ کی قسم! اب ایسا ہرگز نہیں ہوگا، میں تمہیں وہ کسی صورت میں نہیں دوں گا۔“ وہ شخص کوئی برا آدمی نہ تھا اور عورت کی بھی خواہش تھی کہ وہ اس کے پاس چلی جائے۔ اس پر اللہ تعالیٰ نے یہ آیت نازل فرمائی: ﴿فَلَا تَعْضُلُوهُنَّ أَنْ يَنْكِحْنَ أَزْوَاجَهُنَّ﴾ ”تم عورتوں کو (نکاح کرنے سے) مت روکو۔“ [سورة البقرة: 232] ۔ میں نے کہا: ”اے اللہ کے رسول صلی اللہ علیہ وسلم ! میں ابھی اس پر عمل درآمد کرتا ہوں،“ چنانچہ انہوں نے اپنی ہمشیرہ کا نکاح اس سے کر دیا۔ [صحيح البخاري/كِتَاب النِّكَاحِ/حدیث: 5130]