حضرت سلمہ بن اکوع رضی اللہ عنہ سے روایت ہے، انہوں نے کہا کہ ہم نبی صلی اللہ علیہ وسلم کے ہمراہ خیبر کی طرف گئے۔ لوگوں میں سے ایک آدمی نے کہا: ”اے عامر! اگر تم ہمیں اپنے اشعار سناؤ تو بہت اچھا ہوگا“، چنانچہ وہ حدی پڑھنے لگے۔ انہوں نے اس کا آغاز کیا: ”اللہ کی قسم! اگر اللہ نہ ہوتا تو ہم ہدایت نہ پاتے“، اس کے بعد دوسرے اشعار بھی پڑھے لیکن وہ مجھے یاد نہیں ہیں۔ رسول اللہ صلی اللہ علیہ وسلم نے فرمایا: ”اونٹوں کو چلانے والا یہ شخص کون ہے؟“ صحابہ کرام رضی اللہ عنہم نے کہا: ”یہ عامر بن اکوع ہیں۔“ آپ صلی اللہ علیہ وسلم نے فرمایا: ”اللہ ان پر رحم کرے۔“ صحابہ کرام رضی اللہ عنہم میں سے ایک آدمی نے کہا: ”اللہ کے رسول صلی اللہ علیہ وسلم ! کاش ہمیں ان سے مزید نفع اٹھانے دیتے۔“ پھر جب صف بندی ہوئی تو مسلمانوں نے کافروں سے جنگ کی۔ (چونکہ حضرت عامر رضی اللہ عنہ کی تلوار چھوٹی تھی اس لیے وہ اپنی تلوار ہی سے زخمی ہوگئے اور ان کی موت واقع ہوگئی)۔ شام ہوئی تو لوگوں نے جگہ جگہ آگ جلائی۔ رسول اللہ صلی اللہ علیہ وسلم نے دریافت فرمایا: ”یہ آگ کیسی ہے؟ اسے کیا چیز پکانے کے لیے جلایا گیا ہے؟“ صحابہ کرام رضی اللہ عنہم نے عرض کی: ”گھریلو گدھوں کا گوشت پکانے کے لیے اسے جلایا گیا ہے۔“ آپ صلی اللہ علیہ وسلم نے فرمایا: ”جو کچھ ان ہنڈیوں میں ہے اسے پھینک دو، پھر انہیں بھی توڑ دو۔“ ایک آدمی نے عرض کی: ”اللہ کے رسول صلی اللہ علیہ وسلم ! کیا جو کچھ ان میں ہے اسے پھینک دیں اور ہنڈیاں دھولیں؟“ آپ صلی اللہ علیہ وسلم نے فرمایا: ”اچھا یہی کرلو۔“ [صحيح البخاري/كِتَاب الدَّعَوَاتِ/حدیث: 6331]

حضرت عبداللہ بن ابی اوفی رضی اللہ عنہ سے روایت ہے، انہوں نے کہا: جب نبی صلی اللہ علیہ وسلم کے پاس کوئی صدقہ لے کر آتا تو آپ صلی اللہ علیہ وسلم یوں دعا کرتے: «اللَّهُمَّ صَلِّ عَلَى آلِ فُلَانٍ» ”اے اللہ! فلاں کی آل اولاد پر رحم فرما۔“ میرے والد صدقہ لائے تو آپ صلی اللہ علیہ وسلم نے اس طرح دعا فرمائی: «اللَّهُمَّ صَلِّ عَلَى آلِ أَبِي أَوْفَى» ”اے اللہ! ابو اوفی کی آل اولاد پر رحمتیں نازل فرما۔“ [صحيح البخاري/كِتَاب الدَّعَوَاتِ/حدیث: 6332]

حضرت جریر رضی اللہ عنہ سے روایت ہے، انہوں نے کہا کہ رسول اللہ صلی اللہ علیہ وسلم نے مجھ سے فرمایا: «أَلَا تُرِيحُنِي مِنْ ذِي الْخَلَصَةِ؟» ”کیا تم مجھے ذی الخلصہ سے آرام نہیں پہنچاتے؟“ وہ ایک ایسا بت تھا جس کی زمانہ جاہلیت میں لوگ پوجا کرتے تھے، اسے کعبہ یمانیہ کہا جاتا تھا۔۔۔ میں نے عرض کی: ”اللہ کے رسول! میں اس خدمت کے لیے حاضر ہوں لیکن میں گھوڑے پر جم کر نہیں بیٹھ سکتا۔“ آپ صلی اللہ علیہ وسلم نے میرے سینے پر تھپکی دیتے ہوئے دعا فرمائی: «اللَّهُمَّ ثَبِّتْهُ، وَاجْعَلْهُ هَادِيًا مَهْدِيًّا» ”اے اللہ! اسے ثابت قدمی عطا فرما، اسے ہدایت کرنے والا اور ہدایت یافتہ بنا۔“ حضرت جریر رضی اللہ عنہ نے فرمایا: ”پھر میں اپنی قوم احمس کے پچاس آدمی لے کر نکلا۔۔۔۔۔“ بسا اوقات سفیان بن عیینہ نے یوں نقل کیا: ”میں اپنی قوم کی ایک جماعت لے کر نکلا۔۔۔ اور وہاں گیا۔ پھر اس بت کو جلا کر راکھ کر دیا۔“ اس کے بعد میں نبی صلی اللہ علیہ وسلم کی خدمت میں حاضر ہوا اور عرض کی: ”اللہ کے رسول! اللہ کی قسم! میں آپ کے پاس نہیں آیا جب تک میں نے اسے جلے ہوئے خارشی اونٹ کی طرح سیاہ نہیں کر دیا۔“ آپ صلی اللہ علیہ وسلم نے قبیلہ احمس اور ان گھوڑ سواروں کے لیے دعا فرمائی۔ [صحيح البخاري/كِتَاب الدَّعَوَاتِ/حدیث: 6333]

حضرت انس رضی اللہ عنہ سے روایت ہے، انہوں نے کہا کہ حضرت ام سلیم رضی اللہ عنہا نے نبی صلی اللہ علیہ وسلم سے عرض کی: ”یہ انس آپ کا خادم ہے (اس کے حق میں دعا فرمائیں)۔“ آپ صلی اللہ علیہ وسلم نے بایں الفاظ فرمائی: ”اے اللہ! اس کا مال زیادہ کر دے اور جو کچھ تو نے اسے دیا ہے اس میں برکت عطا فرما۔“ [صحيح البخاري/كِتَاب الدَّعَوَاتِ/حدیث: 6334]

حضرت عائشہ رضی اللہ عنہا سے روایت ہے، انہوں نے کہا کہ نبی صلی اللہ علیہ وسلم نے ایک صحابی کو مسجد میں قرآن کریم پڑھتے ہوئے سنا تو فرمایا: ”اللہ اس پر رحم کرے! اس نے مجھے فلاں فلاں آیت یاد دلا دی ہے جو میں فلاں فلاں سورت سے بھول گیا تھا۔“ [صحيح البخاري/كِتَاب الدَّعَوَاتِ/حدیث: 6335]

حضرت عبداللہ بن مسعود رضی اللہ عنہ سے روایت ہے، انہوں نے کہا کہ نبی صلی اللہ علیہ وسلم نے کوئی چیز تقسیم فرمائی تو ایک شخص بولا: ”اس تقسیم سے اللہ کی رضا مقصود نہیں۔“ میں نے نبی صلی اللہ علیہ وسلم کو اس کی خبر دی تو آپ صلی اللہ علیہ وسلم بہت ناراض ہوئے، حتیٰ کہ میں نے خفگی کے اثرات آپ صلی اللہ علیہ وسلم کے چہرہ انور پر دیکھے۔ آپ صلی اللہ علیہ وسلم نے فرمایا: ”اللہ تعالیٰ موسیٰ علیہ السلام پر رحم فرمائے! انہیں اس سے بھی زیادہ اذیت پہنچائی گئی لیکن انہوں نے صبر سے کام لیا۔“ [صحيح البخاري/كِتَاب الدَّعَوَاتِ/حدیث: 6336]