حضرت ابوسعید خدری رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”جب تم اذان سنو تو وہی کلمات کہو جو مؤذن کہتا ہے۔“ [صحيح البخاري/كِتَاب الْأَذَانِ/حدیث: 611]

عیسیٰ بن طلحہ رحمہ اللہ سے روایت ہے، انہوں نے ایک دن حضرت معاویہ رضی اللہ عنہ کو یہ کہتے ہوئے سنا کہ انہوں نے «وَأَشْهَدُ أَنَّ مُحَمَّدًا رَسُولُ اللَّهِ» ”اور میں گواہی دیتا ہوں کہ محمد صلی اللہ علیہ وسلم اللہ کے رسول ہیں“ تک اسی طرح کہا جس طرح مؤذن نے کہا تھا۔ پھر امام بخاری رحمہ اللہ نے اسحاق بن راہویہ کے طریق سے اسی طرح کی ایک روایت بیان کی ہے۔ [صحيح البخاري/كِتَاب الْأَذَانِ/حدیث: 612]

حضرت یحییٰ بن ابوکثیر رحمہ اللہ سے روایت ہے، انہوں نے کہا: مجھ سے میرے بعض بھائیوں نے بیان کیا کہ مؤذن نے جب «حَيَّ عَلَى الصَّلَاةِ» ”نماز کے لیے آؤ“ کہا تو حضرت معاویہ رضی اللہ عنہ نے «لَا حَوْلَ وَلَا قُوَّةَ إِلَّا بِاللَّهِ» ”اللہ کی مدد کے بغیر نہ کسی برائی سے ٹلنے کی طاقت ہے نہ نیکی کرنے کی قوت“ کہا اور فرمایا: میں نے تمہارے نبی صلی اللہ علیہ وسلم کو اسی طرح کہتے سنا ہے۔ [صحيح البخاري/كِتَاب الْأَذَانِ/حدیث: 613]