حضرت ابوذر غفاری رضی اللہ عنہ سے روایت ہے، انہوں نے فرمایا: ہم کسی سفر میں نبی صلی اللہ علیہ وسلم کے ہمراہ تھے، مؤذن نے (ظہر کی) اذان کہنے کا ارادہ کیا تو آپ صلی اللہ علیہ وسلم نے اس سے فرمایا: ”ذرا ٹھنڈا ہو جانے دو۔“ اس نے پھر اذان کہنے کا ارادہ کیا تو آپ صلی اللہ علیہ وسلم نے پھر فرمایا: ”ذرا اور ٹھنڈا ہو جانے دو۔“ اس نے تیسری مرتبہ اذان کہنے کا ارادہ کیا تو آپ صلی اللہ علیہ وسلم نے اس سے فرمایا: ”ذرا مزید ٹھنڈا ہونے دو۔“ یہاں تک کہ جب سایہ ٹیلوں کے برابر ہو گیا تو نبی صلی اللہ علیہ وسلم نے فرمایا: ”گرمی کی شدت، جہنم کی بھاپ سے ہوتی ہے۔“ [صحيح البخاري/كِتَاب الْأَذَانِ/حدیث: 629]

حضرت مالک بن حویرث رضی اللہ عنہ سے روایت ہے، انہوں نے کہا: دو آدمی نبی صلی اللہ علیہ وسلم کی خدمت میں حاضر ہوئے جو سفر کا ارادہ رکھتے تھے۔ نبی صلی اللہ علیہ وسلم نے فرمایا: ”جب تم سفر پر روانہ ہو جاؤ تو دورانِ سفر میں اذان دو اور تکبیر کہو، پھر تم میں سے جو عمر میں بڑا ہو، وہ امامت کرائے۔“ [صحيح البخاري/كِتَاب الْأَذَانِ/حدیث: 630]

حضرت مالک بن حویرث رضی اللہ عنہ سے روایت ہے، انہوں نے فرمایا کہ ہم چند ایک ہم عمر نوجوان ساتھی نبی صلی اللہ علیہ وسلم کی خدمت میں حاضر ہوئے اور بیس دن تک آپ کے ہاں قیام کیا۔ آپ انتہائی نرم دل اور بڑے مہربان تھے۔ جب آپ نے خیال کیا کہ ہمیں اپنے گھر والوں کا شوق بےچین کر رہا ہے تو آپ نے ہم سے ان کی احوال پرسی فرمائی جنہیں ہم اپنے پیچھے چھوڑ آئے تھے۔ ہم نے آپ کو ان کے حالات سے آگاہ کیا تو آپ نے فرمایا: ”واپس اپنے اہل خانہ کے پاس لوٹ جاؤ اور انھی کے پاس رہو، انہیں دین کی تعلیم دو اور انہیں اچھی باتوں کی تلقین کرو۔“ آپ صلی اللہ علیہ وسلم نے مزید باتیں بیان فرمائیں جن میں سے کچھ مجھے یاد ہیں اور کچھ یاد نہیں، نیز آپ صلی اللہ علیہ وسلم نے فرمایا: ”جس طرح تم نے مجھے نماز پڑھتے دیکھا ہے اسی طرح نماز پڑھا کرو، اور جب نماز کا وقت آ جائے تو تم میں سے کوئی شخص اذان کہہ دے، البتہ تم میں سے عمر کے اعتبار سے بڑا جماعت کرائے۔“ [صحيح البخاري/كِتَاب الْأَذَانِ/حدیث: 631]

حضرت نافع رحمہ اللہ سے روایت ہے کہ حضرت عبداللہ بن عمر رضی اللہ عنہما نے ایک مرتبہ سخت سردی کی رات میں ضجنان پہاڑی پر اذان دی، پھر فرمایا: ”اپنے اپنے ٹھکانوں میں نماز پڑھ لو۔“ انہوں نے ہمیں بتایا کہ رسول اللہ صلی اللہ علیہ وسلم دورانِ سفر میں سخت سردی یا بارش کی رات میں اپنے مؤذن کو حکم دیتے تھے کہ وہ اذان کہنے کے بعد یوں کہہ دے: «أَلَا صَلُّوا فِي الرِّحَالِ» ”توجہ سے سنو! اپنے اپنے ٹھکانوں میں نماز پڑھ لو۔“ [صحيح البخاري/كِتَاب الْأَذَانِ/حدیث: 632]

حضرت ابوجحیفہ رضی اللہ عنہ سے روایت ہے، انہوں نے فرمایا: میں نے رسول اللہ صلی اللہ علیہ وسلم کو وادی ابطح میں دیکھا کہ آپ کے پاس حضرت بلال رضی اللہ عنہ آئے اور آپ کو نماز کی اطلاع دی، پھر نیزہ لے کر چلے گئے تاآنکہ اسے رسول اللہ صلی اللہ علیہ وسلم کے سامنے وادی ابطح میں گاڑ دیا، پھر انہوں نے نماز کے لیے تکبیر کہی۔ [صحيح البخاري/كِتَاب الْأَذَانِ/حدیث: 633]