سیدنا عبد اللہ بن عمر رضی اللہ عنہما بیان کرتے ہیں کہ سیدنا عمر رضی اللہ عنہ نے ہمیں منبر رسول اللہ صلی اللہ علیہ وسلم پر خطبہ دیا، اللہ کی حمد وثنا کی اور وعظ و نصیحت کرتے ہوئے فرمایا: اما بعد! جس روز شراب کی حرمت کا حکم نازل ہوا اس وقت وہ انگور، کھجور، گندم، جو اور شہد پانچ چیزوں سے بنائی جاتی تھی اور خمر (شراب) ہر اس چیز کو کہتے ہیں، جو عقل کو ڈھانپ لے (زائل کر دے)۔ [المنتقى ابن الجارود/كِتَابُ الطَّلَاقِ/حدیث: 852]

سیدنا ابوسعید رضی اللہ عنہ بیان کرتے ہیں کہ جب شراب حرام کی گئی، تو ہم نے عرض کی: اللہ کے رسول! ہمارے پاس یتیم (بچے) کی شراب ہے (اس کا کیا کریں؟) آپ نے ہمیں حکم دیا، تو ہم نے اسے [المنتقى ابن الجارود/كِتَابُ الطَّلَاقِ/حدیث: 853]

سیدنا انس بن مالک رضی اللہ عنہ بیان کرتے ہیں کہ نبی کریم صلی اللہ علیہ وسلم سے شراب کا سرکہ بنانے کے متعلق پوچھا گیا، تو آپ نے اسے ناپسند کیا۔ [المنتقى ابن الجارود/كِتَابُ الطَّلَاقِ/حدیث: 854]

سیدہ عائشہ رضی اللہ عنہا بیان کرتی ہیں کہ نبی کریم صلی اللہ علیہ وسلم نے فرمایا: ہر نشہ آور مشروب حرام ہے۔ [المنتقى ابن الجارود/كِتَابُ الطَّلَاقِ/حدیث: 855]

سیدنا ابوموسی اشعری رضی اللہ عنہ بیان کرتے ہیں کہ میں نے عرض کیا: اللہ کے رسول! ہمارے پاس کچھ مشروبات ہیں جو تبع یعنی شہد کی شراب، اور مزر یعنی مکئی اور جو کی نبیذ ہے، تو آپ ہمیں کیا حکم فرماتے ہیں؟ آپ صلی اللہ علیہ وسلم نے فرمایا: میں تمہیں ہر نشہ آور چیز سے روکتا ہوں۔ [المنتقى ابن الجارود/كِتَابُ الطَّلَاقِ/حدیث: 856]

سیدنا عبد اللہ بن عمر رضی اللہ عنہما بیان کرتے ہیں کہ نبی کریم صلی اللہ علیہ وسلم نے فرمایا: ہر نشہ آور چیز خمر (شراب) ہے اور ہر خمر حرام ہے۔ [المنتقى ابن الجارود/كِتَابُ الطَّلَاقِ/حدیث: 857]

سیدنا ابو ہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے مقیر (تارکول لگا ہوا برتن) مزفت (روغنی برتن) دبا (کدو سے بنا ہوا برتن) حنتمہ (پرانا سبز مٹکا) اور نقیر (لکڑی کا برتن) میں نبیذ بنانے سے منع فرمایا ہے، نیز فرمایا: ہر نشہ آور چیز حرام ہے۔ [المنتقى ابن الجارود/كِتَابُ الطَّلَاقِ/حدیث: 858]

سیدنا عبداللہ بن عمر رضی اللہ عنہما بیان کرتے ہیں کہ رسول اللہ صلی اللہ علیہ وسلم نے فرمایا: ہر نشہ آور چیز خمر (شراب) ہے اور ہر نشہ آور چیز حرام ہے۔ [المنتقى ابن الجارود/كِتَابُ الطَّلَاقِ/حدیث: 859]

سیدنا جابر بن عبد الله رضی اللہ عنہما بیان کرتے ہیں کہ رسول اللہ صلی اللہ علیہ وسلم نے فرمایا: جس چیز کی زیادہ مقدار نشہ آور ہو، تو اس کی تھوڑی سی مقدار بھی حرام ہے۔ [المنتقى ابن الجارود/كِتَابُ الطَّلَاقِ/حدیث: 860]

سیدہ عائشہ رضی اللہ عنہا بیان کرتی ہیں کہ رسول اللہ صلی اللہ علیہ وسلم نے فرمایا: جس چیز کا ایک فرق (16 رطل وزن) نشہ پیدا کرے، اس کا ایک چلو بھی حرام ہے۔ [المنتقى ابن الجارود/كِتَابُ الطَّلَاقِ/حدیث: 861]