حضرت جبیر بن مطعم فرماتے ہیں کہ نبی کریم صلی اللہ علیہ وآلہ وسلم کے پاس کچھ لوگوں کا غسل جنابت کے بارے میں اختلاف ہوگیا۔ ایک آدمی نے کہا کہ میں اپنے سر کو اتنا اتنا دھوتا ہوں حضور صلی اللہ علیہ وآلہ وسلم نے فرمایا کہ میں اپنے سر پر تین ہتھیلی پانی ڈالتا ہوں۔ [مصنف ابن ابي شيبه/كتاب الطهارة/حدیث: 700]

حضرت ابوہریرہ سے کسی نے پوچھا کہ اگر میں نے حال جنابت کا غسل کرنا ہو تو میں اپنے سر پر کتنا پانی ڈالوں؟ انہوں نے فرمایا کہ نبی کریم صلی اللہ علیہ وآلہ وسلم اپنے سر مبارک پر تین ہتھیلیاں پانی ڈالا کرتے تھے۔ اس نے کہا کہ میرے بال لمبے ہیں۔ حضرت ابوہریرہ نے فرمایا حضور صلی اللہ علیہ وآلہ وسلم کے بال تم سے زیادہ لمبے اور اچھے تھے۔ [مصنف ابن ابي شيبه/كتاب الطهارة/حدیث: 701]

حضرت جابر فرماتے ہیں کہ میں نے عرض کیا یا رسول اللہ! ہمارا علاقہ ٹھنڈا ہے، ہم غسل جنابت کیسے کریں؟ آپ نے فرمایا میں تو اپنے سر پر تین مرتبہ پانی بہاتا ہوں۔ [مصنف ابن ابي شيبه/كتاب الطهارة/حدیث: 702]

حضرت عائشہ رضی اللہ عنہا فرماتی ہیں کہ حضور صلی اللہ علیہ وآلہ وسلم نے غسل جنابت فرماتے ہوئے اپنے سر پر تین مرتبہ پانی بہایا۔ [مصنف ابن ابي شيبه/كتاب الطهارة/حدیث: 703]

حضرت عمر فرماتے ہیں کہ میں اپنے سر پر تین مرتبہ پانی بہاتا ہوں۔ [مصنف ابن ابي شيبه/كتاب الطهارة/حدیث: 704]

حضرت ابن عباس رضی اللہ عنہما فرماتے ہیں کہ جنبی اپنے سر پر تین مرتبہ پانی بہائے گا۔ [مصنف ابن ابي شيبه/كتاب الطهارة/حدیث: 705]

حضرت جابر فرماتے ہیں کہ جنبی اپنے سر پر تین مرتبہ پانی بہائے گا۔ [مصنف ابن ابي شيبه/كتاب الطهارة/حدیث: 706]

حضرت علی رضی اللہ عنہ غسل جنابت کرتے ہوئے سر کو دومرتبہ دھوتے تھے۔ [مصنف ابن ابي شيبه/كتاب الطهارة/حدیث: 707]

حضرت حسن فرماتے ہیں کہ ایک مرتبہ طائف کے لوگوں نے حضور صلی اللہ علیہ وآلہ وسلم سے عرض کیا کہ ہمارا علاقہ ٹھنڈا ہے۔ ہم غسل جنابت کیسے کریں؟ حضور صلی اللہ علیہ وآلہ وسلم نے فرمایا ”میں تو سر پر تین مرتبہ پانی ڈالتا ہوں“۔ [مصنف ابن ابي شيبه/كتاب الطهارة/حدیث: 708]

حضرت ام ھانی فرماتی ہیں کہ جب تم غسل جنابت کرو تو اپنے ہر عضو کو تین تین مرتبہ دھوؤ۔ [مصنف ابن ابي شيبه/كتاب الطهارة/حدیث: 709]