حضرت سفینہ فرماتے ہیں کہ حضور صلی اللہ علیہ وآلہ وسلم ایک صاع پانی سے غسل اور ایک مد پانی سے وضو فرماتے تھے۔ [مصنف ابن ابي شيبه/كتاب الطهارة/حدیث: 711]

حضرت عائشہ رضی اللہ عنہا فرماتی ہیں کہ حضور صلی اللہ علیہ وآلہ وسلم فرق نامی برتن سے غسل فرماتے تھے۔ [مصنف ابن ابي شيبه/كتاب الطهارة/حدیث: 712]

حضرت جابر روایت کرتے ہیں کہ رسول اللہ صلی اللہ علیہ وآلہ وسلم نے ارشاد فرمایا کہ وضو کے لئے ایک مد اور غسل کے لئے ایک صاع پانی کافی ہے۔ ایک آدمی نے پوچھا اے جابر! ہمارے لئے کتنا کافی ہے۔ انہوں نے فرمایا کہ جتنا تم سے بہتر اور تم سے زیادہ بالوں والے یعنی حضور صلی اللہ علیہ وآلہ وسلم کے لئے کافی تھا۔ [مصنف ابن ابي شيبه/كتاب الطهارة/حدیث: 713]

ایک شخص روایت کرتے ہیں کہ میں نے حضرت عائشہ رضی اللہ عنہا سے پوچھا کہ حضور صلی اللہ علیہ وآلہ وسلم غسل کے لئے کتنا پانی استعمال فرماتے تھے؟ حضرت عائشہ رضی اللہ عنہا نے ایک برتن دکھایا جو تقریبا ایک صاع کے برابر تھا، [مصنف ابن ابي شيبه/كتاب الطهارة/حدیث: 714]

حضرت انس رضی اللہ عنہ فرماتے ہیں کہ تم ایک مد پانی سے وضو کرو اور ایک صاع سے پانچ مد پانی تک غسل کرو۔ [مصنف ابن ابي شيبه/كتاب الطهارة/حدیث: 715]

حضرت جابر سے غسل جنابت کے بارے میں پوچھا گیا کہ اس کے لئے کتنا پانی کافی ہے؟ فرمایا ایک صاع۔ پھر پوچھا گیا کہ میرے خیال میں اتنا کافی نہ ہوگا۔ فرمایا کافی ہوجائے گا۔ [مصنف ابن ابي شيبه/كتاب الطهارة/حدیث: 716]

حضرت ابن عباس رضی اللہ عنہما فرماتے ہیں کہ جنبی کے لئے ایک صاع پانی کافی ہے عبید اللہ فرماتے ہیں کہ میں نہیں جانتا کہ یہ ایک صاع وضو سے پہلے مراد ہے یا بعد میں۔ [مصنف ابن ابي شيبه/كتاب الطهارة/حدیث: 717]

حضرت ابو جعفر فرماتے ہیں کہ رسول اللہ صلی اللہ علیہ وآلہ وسلم ایک مد پانی سے وضو اور ایک صاع پانی سے غسل فرمایا کرتے تھے۔ [مصنف ابن ابي شيبه/كتاب الطهارة/حدیث: 718]

حضرت عائشہ رضی اللہ عنہا سے بھی یونہی منقول ہے۔ [مصنف ابن ابي شيبه/كتاب الطهارة/حدیث: 719]

حضرت عطیہ فرماتی ہیں کہ میں نے حضرت ابن عمر رضی اللہ عنہما کو لوٹے کے پانی سے وضو کرتے دیکھا، انہوں نے اس میں سے بچا دیا تھا۔ کسی نے پوچھا وہ ایک مد پانی ہوگا۔ فرمایا اس سے زیادہ تھا۔ [مصنف ابن ابي شيبه/كتاب الطهارة/حدیث: 720]