حضرت ابن عباس رضی اللہ عنہما فرماتے ہیں کہ ہمیں مسواک کا حکم اس تسلسل اور اہتمام سے دیا جاتا تھا کہ ہمیں خیال ہوا کہ مسواک کے بارے میں کوئی حکم نازل ہوجائے گا۔ [مصنف ابن ابي شيبه/كتاب الطهارة/حدیث: 1809]

حضرت صالح بن کیسان فرماتے ہیں کہ حضرت عبادہ بن صامت اور نبی کریم صلی اللہ علیہ وآلہ وسلم کے صحابہ کے کانوں پر ہر وقت مسواک لگی رہتی تھی۔ [مصنف ابن ابي شيبه/كتاب الطهارة/حدیث: 1810]

حضرت عبداللہ بن زبیر سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ اگر مجھے اپنی امت پر مشقت کا خوف نہ ہوتا تو میں ہر نماز کے لیے ان پر مسواک کو لازم کردیتا۔ [مصنف ابن ابي شيبه/كتاب الطهارة/حدیث: 1811]

حضرت شعبی فرماتے ہیں کہ مسواک منہ کو صاف کرنے والی اور نگاہ کو تیز کرنے والی ہے۔ [مصنف ابن ابي شيبه/كتاب الطهارة/حدیث: 1812]

ایک صحابی روایت کرتے ہیں کہ حضور صلی اللہ علیہ وآلہ وسلم نے ارشاد فرمایا کہ اگر مجھے اپنی امت پر مشقت کا خوف نہ ہوتا تو میں وضو کی طرح ہر نماز کے لیے مسواک کو بھی فرض قرار دے دیتا۔ [مصنف ابن ابي شيبه/كتاب الطهارة/حدیث: 1813]

حضرت ابو ایوب فرماتے ہیں کہ رسول اللہ صلی اللہ علیہ وآلہ وسلم نے ایک رات میں کئی مرتبہ مسواک فرماتے تھے۔ [مصنف ابن ابي شيبه/كتاب الطهارة/حدیث: 1814]

حضرت علی رضی اللہ عنہ فرماتے ہیں کہ جب تم میں سے کوئی رات کو اٹھے تو مسواک کرے۔ کیونکہ آدمی جب رات کو اٹھے، اور مسواک کرے پھر وضو کرے پھر نماز کے لیے کھڑا ہوجائے تو ایک فرشتہ اس کے پیچھے کھڑا ہو کر اس کا قرآن سنتا ہے۔ پھر وہ آہستہ آہستہ اس کے اتنا قریب ہوجاتا ہے کہ اپنا منہ اس کے منہ کے ساتھ لگا لیتا ہے۔ پس وہ جب بھی کوئی آیت پڑھتا ہے تو وہ آیت فرشتے کے پیٹ میں چلی جاتی ہے۔ [مصنف ابن ابي شيبه/كتاب الطهارة/حدیث: 1815]

حضرت حکم فرماتے ہیں کہ میں حضرت مجاہد کے پاس مہمان بن کر ٹھہرا، وہ سب سے زیادہ پابندی مسواک کی کیا کرتے تھے۔ [مصنف ابن ابي شيبه/كتاب الطهارة/حدیث: 1816]

حضرت یزید بن اصم فرماتے ہیں کہ ام المؤمنین حضرت میمونہ بنت حارث کی مسواک پانی میں ڈوبی رہتی تھی۔ جب وہ نماز یا کسی اور کام میں مشغولیت سے فارغ ہوتیں تو مسواک کرتی تھیں۔ [مصنف ابن ابي شيبه/كتاب الطهارة/حدیث: 1817]

حضرت ابو ایوب انصاری سے روایت ہے کہ حضور صلی اللہ علیہ وآلہ وسلم نے ارشاد فرمایا کہ چار چیزیں رسولوں کی سنتوں میں سے ہیں خوشبو لگانا نکاح کرنا مسواک کرنا مہندی لگانا۔ [مصنف ابن ابي شيبه/كتاب الطهارة/حدیث: 1818]