حضرت حسان بن عطیہ سے روایت ہے (کہ حضور صلی اللہ علیہ وآلہ وسلم نے ارشاد فرمایا) وضو ایمان کا حصہ ہے اور مسواک وضو کا حصہ ہے۔ اگر مجھے اپنی امت پر مشقت کا خوف نہ ہوتا تو میں ہر نماز میں انہیں مسواک کا حکم دے دیتا۔ وہ دو رکعتیں جو مسواک کر کے پڑھی جائیں وہ ان رکعات سے ستر گنا افضل ہیں جو بغیر مسواک کے پڑھی جائیں۔ [مصنف ابن ابي شيبه/كتاب الطهارة/حدیث: 1819]

حضرت ابن عمر رضی اللہ عنہما فرماتے ہیں کہ مسواک میں مشغول رہنا مجھے دو خادم غلاموں سے زیادہ محبوب ہے۔ حضرت عبداللہ بن دینار فرماتے ہیں کہ حضرت ابن عمر رضی اللہ عنہما جب بھی کھانا کھاتے تو مسواک کیا کرتے تھے۔ [مصنف ابن ابي شيبه/كتاب الطهارة/حدیث: 1820]

حضرت مجاہد فرماتے ہیں کہ ایک مرتبہ حضرت جبرائیل نے حضور صلی اللہ علیہ وآلہ وسلم کے پاس آنے میں دیر کردی، جب آئے تو کہنے لگے کہ ہم ان لوگوں کے پاس کیسے آئیں جو ناخن نہیں کاٹتے، انگلیوں کے پورے صاف نہیں کرتے اور مسواک نہیں کرتے؟! [مصنف ابن ابي شيبه/كتاب الطهارة/حدیث: 1821]

حضرت سلیمان بن سعد سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ مسواک کرو اور صفائی اختیار کرو۔ اور وتر پڑھو کیونکہ اللہ تعالیٰ وتر (طاق) ہے اور طاق کو پسند کرتا ہے۔ [مصنف ابن ابي شيبه/كتاب الطهارة/حدیث: 1822]

حضرت عبداللہ بن بریدہ اسلمی فرماتے ہیں کہ نبی کریم صلی اللہ علیہ وآلہ وسلم جب اپنے گھر والوں سے بیدار ہوتے تو اپنی ایک باندی جن کا نام بریرہ تھا، ان سے مسواک منگواتے تھے۔ [مصنف ابن ابي شيبه/كتاب الطهارة/حدیث: 1823]

حضرت شعبی فرماتے ہیں کہ مسواک نگاہ کو تیز کرنے والی اور منہ کو پاک کرنے والی ہے۔ [مصنف ابن ابي شيبه/كتاب الطهارة/حدیث: 1824]

حضرت تمیمی کہتے ہیں کہ میں نے حضرت ابن عباس رضی اللہ عنہما سے مسواک کے بارے میں سوال کیا تو آپ نے فرمایا کہ رسول اللہ صلی اللہ علیہ وآلہ وسلم ہمیں مسواک کا حکم اس کثرت سے دیا کرتے تھے کہ ہم سمجھنے لگے کہ اس کے بارے کوئی حکم نازل ہوجائے گا۔ [مصنف ابن ابي شيبه/كتاب الطهارة/حدیث: 1825]

حضرت صالح بن کیسان فرماتے ہیں کہ مسواک صحابہ کرام میں سے ہر ایک کے کان پر لگی ہوتی تھی۔ [مصنف ابن ابي شيبه/كتاب الطهارة/حدیث: 1826]

حضرت انس سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ میں نے تمہیں مسواک کے بارے میں بہت تاکید کردی ہے۔ [مصنف ابن ابي شيبه/كتاب الطهارة/حدیث: 1827]