حضرت ابن عمر رضی اللہ عنہما فرماتے ہیں کہ حضور صلی اللہ علیہ وآلہ وسلم کے دو مؤذن تھے جو اذان دیتے تھے۔ ابن نمیر نے یہ اضافہ نقل کیا ہے: حضرت ابن اُمّ مکتوم اور حضرت بلال۔ [مصنف ابن ابي شيبه/كتاب الأذان والإقامة/حدیث: 2330]

حضرت سائب بن یزید کہتے ہیں کہ حضور صلی اللہ علیہ وآلہ وسلم کے صرف ایک مؤذن تھے جو اس وقت اذان کہتے جب آپ صلی اللہ علیہ وآلہ وسلم منبر پر بیٹھتے اور اس وقت اقامت کہتے جب آپ صلی اللہ علیہ وآلہ وسلم منبر سے اترتے۔ حضرت ابوبکر اور حضرت عمر کا بھی یہی معاملہ تھا۔ جب حضرت عثمان کا زمانہ آیا تو لوگ زیادہ ہوگئے اور ادھر ادھر پھیل گئے لہٰذا انہوں نے زوال کے وقت تیسری اذان کا اضافہ کردیا۔ [مصنف ابن ابي شيبه/كتاب الأذان والإقامة/حدیث: 2331]