عیسیٰ بن ابی طلحہ کہتے ہیں کہ ہم حضرت معاویہ کی خدمت میں حاضر تھے کہ اتنے میں موذن آیا اور اس نے اللَّہُ أَکْبَرُ، اللَّہُ أَکْبَرُ کہا۔ حضرت معاویہ نے جواب میں یونہی کہا۔ پھر اس نے أَشْہَدُ أَنْ لاَ إِلَہَ إِلاَّ اللَّہُ کہا تو حضرت معاویہ نے بھی یونہی کہا۔ پھر اس نے أَشْہَدُ أَنَّ مُحَمَّدًا رَسُولُ اللہِ کہا تو حضرت معاویہ نے بھی یونہی کہا۔ پھر فرمایا کہ میں نے تمہارے نبی صلی اللہ علیہ وآلہ وسلم کو بھی یونہی فرماتے سنا تھا۔ [مصنف ابن ابي شيبه/كتاب الأذان والإقامة/حدیث: 2376]

حضرت عبداللہ بن عمرو سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ جب تم موذن کو سنو تو وہی کہو جو وہ کہتا ہے۔ [مصنف ابن ابي شيبه/كتاب الأذان والإقامة/حدیث: 2377]

حضرت ابو سعید خدری سے روایت ہے کہ رسول اللہ صلی اللہ علیہ وآلہ وسلم وہی کلمات کہا کرتے تھے جو موذن کہتا ہے۔ [مصنف ابن ابي شيبه/كتاب الأذان والإقامة/حدیث: 2378]

حضرت ام حبیبہ سے بھی یونہی منقول ہے۔ [مصنف ابن ابي شيبه/كتاب الأذان والإقامة/حدیث: 2379]

حضرت ام حبیبہ فرماتی ہیں کہ رسول اللہ صلی اللہ علیہ وآلہ وسلم جب مؤذن کی آواز سنتے تو وہی کلمات کہا کرتے تھے جو مؤذن کہتا ہے یہاں تک کہ وہ خاموش ہوجائے۔ [مصنف ابن ابي شيبه/كتاب الأذان والإقامة/حدیث: 2380]

حضرت عبداللہ بن حارث فرماتے ہیں کہ رسول اللہ صلی اللہ علیہ وآلہ وسلم وہی کلمات کہا کرتے تھے جو مؤذن کہتا ہے، البتہ حَیَّ عَلَی الصَّلاَۃِ اور حَیَّ عَلَی الْفَلاَحِ کی جگہ لاَ حَوْلَ وَلاَ قُوَّۃَ إِلاَّ بِاللَّہِ کہا کرتے تھے۔ [مصنف ابن ابي شيبه/كتاب الأذان والإقامة/حدیث: 2381]

حضرت ابو جعفر محمد بن علی رضی اللہ عنہ کہتے ہیں کہ حضور صلی اللہ علیہ وآلہ وسلم جب مؤذن کی آواز سنتے تو أَشْہَدُ أَنْ لاَ إلَہَ إِلاَّ اللَّہُ اور أَشْہَدُ أَنَّ مُحَمَّدًا رَسُولُ اللہِ کے جواب میں وانا، وانا کہا کرتے تھے۔ [مصنف ابن ابي شيبه/كتاب الأذان والإقامة/حدیث: 2382]

حضرت عروہ فرماتے ہیں کہ حضور صلی اللہ علیہ وآلہ وسلم موذن کی آواز سن کر وَأَنَا، وَأَنَا کہا کرتے تھے۔ [مصنف ابن ابي شيبه/كتاب الأذان والإقامة/حدیث: 2383]

حضرت اوزاعی کہتے ہیں کہ حضرت مجاہد جب حَیَّ عَلَی الصَّلاَۃِ سنتے تو الْمُسْتَعَانُ اللَّہُ (مدد تو اللہ سے طلب کی جاتی ہے) کہتے اور جب موذن حَیَّ عَلَی الْفَلاَحِ کہتا تو لاَ حَوْلَ وَلاَ قُوَّۃَ إِلاَّ بِاللَّہِ کہا کرتے تھے۔ [مصنف ابن ابي شيبه/كتاب الأذان والإقامة/حدیث: 2384]

حضرت ابراہیم فرماتے ہیں کہ جس نے وہ کلمات کہے جو موذن کہتا ہے تو اس کے لیے موذن کے برابر اجر ہے۔ [مصنف ابن ابي شيبه/كتاب الأذان والإقامة/حدیث: 2385]