حضرت حذیفہ رضی اللہ عنہ سے روایت ہے کہ رسول اللہ صلی اللہ علیہ وآلہ وسلم رکوع میں یہ کلمات کہتے تھے: میرا رب پاک ہے عظمت والا ہے۔ اور سجود میں یہ کلمات کہتے تھے: میرارب پاک ہے، بلند ہے۔ ابن ابی لیلیٰ کہتے ہیں کہ میں نے حضرت حفص سے کہا کہ ساتھ ”وبحمدہ“ بھی کہا کرتے تھے، انہوں نے فرمایا ہاں، اگر اللہ چاہتاتوتین مرتبہ کہا کرتے تھے۔: میرا رب پاک ہے عظمت والا ہے: میرارب پاک ہے، بلند ہے۔ [مصنف ابن ابي شيبه/كتاب الصلوات/حدیث: 2578]

حضرت حذیفہ رضی اللہ عنہ فرماتے ہیں کہ میں نے رسول اللہ صلی اللہ علیہ وآلہ وسلم کے ساتھ نماز پڑھی ہے، جب آپ رکوع میں جاتے تو یہ کلمات کہتے: میرا رب پاک ہے عظمت والا ہے۔ اور جب سجدے میں جاتے تو یہ کلمات کہتے: میرارب پاک ہے، بلند ہے۔ [مصنف ابن ابي شيبه/كتاب الصلوات/حدیث: 2579]

حضرت ابن عباس رضی اللہ عنہما فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا جب تم رکوع کرو تو اس میں اپنے رب کی تعظیم بیان کرو اور جب سجدہ کرو تو خوب دعا کرو۔ بہت امکان ہے کہ تمہاری یہ دعا قبول ہوجائے۔ [مصنف ابن ابي شيبه/كتاب الصلوات/حدیث: 2580]

حضرت علی رضی اللہ عنہ سے روایت ہے، رسول اللہ صلی اللہ علیہ وآلہ وسلم نے فرمایا کہ مجھے اس بات سے منع کیا گیا ہے میں رکوع اور سجدوں میں قرآن کی تلاوت کروں۔ جب تم رکوع کرو تو اللہ تعالیٰ کی تعظیم بیان کرو اور جب سجدہ کرو تو خوب دعاکرو ہوسکتا ہے کہ تمہاری یہ دعا قبول ہوجائے۔ [مصنف ابن ابي شيبه/كتاب الصلوات/حدیث: 2581]

حضرت ابن مسعود فرماتے ہیں کہ رکوع اور سجود میں تین تین تسبیحات ہیں۔ [مصنف ابن ابي شيبه/كتاب الصلوات/حدیث: 2582]

حضرت ابراہیم بن میسرہ فرماتے ہیں کہ حضرت عمررکوع اور سجود میں پانچ تسبیحات کے برابر سبحان اللہ وبحمدہ کہا کرتے تھے۔ [مصنف ابن ابي شيبه/كتاب الصلوات/حدیث: 2583]

حضرت علی رضی اللہ عنہ فرماتے ہیں کہ جب تم میں سے کوئی رکوع کرے تو تین مرتبہ یہ کلمات کہے: اے اللہ! میں نے تیرے لئے رکوع کیا، میں تیرے لئے جھکا، میں تجھ پر ایمان لایا، میں نے تجھ پر بھروسہ کیا، میرا رب پاک ہے، عظمت والا ہے۔ پھر جب سجدہ کرتے تو تین مرتبہ یہ کلمات کہتے: میرا رب پاک ہے بلند ہے۔ اگر انہیں جلدی ہوتی تو صرف اس جملہ پر اکتفاء کرلیتے ”میرا رب پاک ہے، عظمت والا ہے“ ان کلمات پر اکتفاء کرنا بھی جائز ہے۔ [مصنف ابن ابي شيبه/كتاب الصلوات/حدیث: 2584]

حضرت اسحاق بن عبد اللہ کہتے ہیں کہ حضرت اسماعیل بن عبید اللہ نے حضرت ابوہریرہ سے سوال کیا کہ میں ایک کانا آدمی ہوں، ہم سجدوں کی تسبیح میں کیا کہیں؟ فرمایا تین تسبیحات پڑھا کرو۔ [مصنف ابن ابي شيبه/كتاب الصلوات/حدیث: 2585]

حضرت مجاہد فرماتے ہیں کہ میں نے حضرت عمر بن عبد العزیز کے پیچھے نماز پڑھی، میں نے گنا کہ انہوں نے رکوع میں چار یا پانچ مرتبہ تسبیحات پڑھیں اور سجدے میں پانچ یا چھ مرتبہ۔ [مصنف ابن ابي شيبه/كتاب الصلوات/حدیث: 2586]

حضرت جعفر اپنے والد سے روایت کرتے ہیں کہ ایندھن اکٹھا کرنے والوں کی ایک جماعت حضور صلی اللہ علیہ وآلہ وسلم کی خدمت میں حاضر ہوئی اور عرض کیا ”یارسول اللہ! ہم ہمیشہ سفر میں رہتے ہیں ہم نماز کیسے ادا کریں؟ آپ صلی اللہ علیہ وآلہ وسلم نے فرمایا ”رکوع میں تین تسبیحات پڑھو اور سجدوں میں بھی تین تسبیحات پڑھو۔ [مصنف ابن ابي شيبه/كتاب الصلوات/حدیث: 2587]