حضرت سعد فرماتے ہیں کہ رسول اللہ صلی اللہ علیہ وآلہ وسلم اپنے دائیں طرف سلام پھیرتے تھے اور بائیں طرف بھی سلام پھیرتے تھے یہاں تک کہ آپ کے رخسار کی سفیدی نظر آنے لگتی۔ [مصنف ابن ابي شيبه/كتاب الصلوات/حدیث: 3070]

حضرت وائل حضرمی کہتے ہیں کہ میں نے نبی کریم صلی اللہ علیہ وآلہ وسلم کے ساتھ نماز پڑھی، آپ اوپر اٹھتے وقت اور نیچے جاتے وقت تکبیر کہتے تھے اور تکبیر کے وقت ہاتھ اٹھاتے تھے اور دائیں جانب اور بائیں جانب سلام پھیرتے تھے۔ حضرت شعبہ فرماتے ہیں کہ مجھ سے ابان بن تغلب نے بیان کیا کہ حدیث میں یہ بھی ہے کہ حضور صلی اللہ علیہ وآلہ وسلم کے چہرہ مبارک کی سفیدی نظر آنے لگتی تھی۔ میں نے عمرو سے کہا کہ حدیث میں یہ بھی ہے کہ یہاں تک کہ حضور صلی اللہ علیہ وآلہ وسلم کے چہرہ مبارک کی سفیدی نظر آنے لگتی تھی یا اس سے ملتا جلتا کوئی جملہ ہے۔ [مصنف ابن ابي شيبه/كتاب الصلوات/حدیث: 3071]

حضرت عبد اللہ فرماتے ہیں کہ رسول اللہ صلی اللہ علیہ وآلہ وسلم دائیں طرف سلام پھیرتے یہاں تک کہ آپ کے رخسار مبارک کی سفیدی نظر آنے لگتی اور آپ السَّلاَمُ عَلَیْکُمْ وَرَحْمَۃُ اللہِ کہتے اسی طرح بائیں طرف بھی سلام پھیرتے۔ [مصنف ابن ابي شيبه/كتاب الصلوات/حدیث: 3072]

حضرت عبد اللہ فرماتے ہیں کہ نبی کریم صلی اللہ علیہ وآلہ وسلم نماز میں دائیں اور بائیں جانب سلام پھیرتے یہاں تک کہ آپ کے چہرے مبارک کی سفیدی نظر آنے لگتی اور آپ دونوں جانب السَّلاَمُ عَلَیْکُمْ وَرَحْمَۃُ اللہِ کہتے۔ [مصنف ابن ابي شيبه/كتاب الصلوات/حدیث: 3073]

حضرت براء کہتے ہیں کہ نبی کریم صلی اللہ علیہ وآلہ وسلم دائیں اور بائیں جانب سلام پھیرتے اور السَّلاَمُ عَلَیْکُمْ وَرَحْمَۃُ اللہِ کہتے یہاں تک کہ آپ کے رخسار مبارک کی سفیدی نظر آنے لگتی۔ [مصنف ابن ابي شيبه/كتاب الصلوات/حدیث: 3074]

حضرت عبد اللہ فرماتے ہیں کہ حضور صلی اللہ علیہ وآلہ وسلم، حضرت ابوبکر اور حضرت عمر دائیں اور بائیں جانب سلام پھیرا کرتے تھے۔ [مصنف ابن ابي شيبه/كتاب الصلوات/حدیث: 3075]

حضرت وائل بن حجر کہتے ہیں کہ میں نے نبی کریم صلی اللہ علیہ وآلہ وسلم کے پیچھے نماز پڑھی، جب آپ نے سورة فاتحہ پڑھی تو اونچی آواز سے آمین کہا اور نماز کے آخر میں دائیں اور بائیں جانب سلام پھیرا یہاں تک کہ آپ کے رخسار مبارک کی سفیدی نظر آنے لگی۔ [مصنف ابن ابي شيبه/كتاب الصلوات/حدیث: 3076]

حضرت حسن بن عمرو کہتے ہیں کہ حضرت شقیق کے پاس سلام پھیرنے کا ذکر کیا گیا تو انہوں نے فرمایا کہ میں نے حضرت عمر اور حضرت عبد اللہ کے پیچھے نماز پڑھی ہے وہ دونوں سلام پھیرتے وقت یوں کہا کرتے تھے: السَّلاَمُ عَلَیْکُمْ وَرَحْمَۃُ اللہِ، السَّلاَمُ عَلَیْکُمْ وَرَحْمَۃُ اللہِ۔ [مصنف ابن ابي شيبه/كتاب الصلوات/حدیث: 3077]

حضرت حارثہ بن مضرب کہتے ہیں کہ میں نے حضرت عمار کے پیچھے نماز پڑھی انہوں نے اپنے دائیں اور بائیں جانب سلام پھیرا اور یوں کہا السَّلاَمُ عَلَیْکُمْ وَرَحْمَۃُ اللہِ۔ [مصنف ابن ابي شيبه/كتاب الصلوات/حدیث: 3078]

حضرت عبد اللہ فرماتے ہیں کہ اس وقت بھی وہ منظر میرے سامنے ہے کہ میں سلام پھیرتے ہوئے رسول اللہ صلی اللہ علیہ وآلہ وسلم کے رخسار مبارک کو دیکھ رہا ہوں اور آپ زبان سے کہہ رہے تھے: السَّلاَمُ عَلَیْکُمْ وَرَحْمَۃُ اللہِ، السَّلاَمُ عَلَیْکُمْ وَرَحْمَۃُ اللہِ۔ [مصنف ابن ابي شيبه/كتاب الصلوات/حدیث: 3079]