حضرت ابو قتادہ سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ جب تم مسجد میں داخل ہو تو بیٹھنے سے پہلے دو رکعات نماز پڑھ لو۔ [مصنف ابن ابي شيبه/كتاب الصلوات/حدیث: 3454]

حضرت عبد اللہ فرماتے ہیں کہ کہا جاتا تھا کہ قیامت کی علامات میں سے ہے کہ مسجدوں کو راستہ بنالیا جائے گا۔ [مصنف ابن ابي شيبه/كتاب الصلوات/حدیث: 3455]

حضرت مالک بن اوس کہتے ہیں کہ حضرت ابو ذرمسجد میں داخل ہوئے اور ایک ستون کے پاس دورکعات نماز ادا فرمائی۔ [مصنف ابن ابي شيبه/كتاب الصلوات/حدیث: 3456]

حضرت ابو قتادہ سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ مسجدوں کو ان کا حق ادا کرو۔ کسی نے پوچھا ان کا حق کیا ہے؟ آپ صلی اللہ علیہ وآلہ وسلم نے فرمایا بیٹھنے سے پہلے دو رکعات نماز پڑھنا۔ [مصنف ابن ابي شيبه/كتاب الصلوات/حدیث: 3457]

حضرت ابو ذر غفاری فرماتے ہیں کہ میں نبی کریم صلی اللہ علیہ وآلہ وسلم کی خدمت میں حاضر ہوا آپ مسجد میں تھے، آپ نے مجھ سے فرمایا کہ اے ابو ذر! کیا تم نے نماز پڑھ لی؟ میں نے عرض کیا نہیں۔ آپ نے فرمایا کہ اٹھو اور دو رکعات نماز پڑھو۔ [مصنف ابن ابي شيبه/كتاب الصلوات/حدیث: 3458]

حضرت عروہ فرماتے ہیں کہ حضرت عمار بن یاسر مسجد میں داخل ہوئے اور دو ہلکی رکعتیں ادا کیں۔ [مصنف ابن ابي شيبه/كتاب الصلوات/حدیث: 3459]

حضرت عطاء سے سوال کیا گیا کہ کیا آدمی جب بھی مسجد میں سے گذرے دو رکعات نماز ادا کرے؟ آپ نے فرمایا نہیں، ایک مرتبہ دو رکعات پڑھ لے پھر اس کے بعد سارا دن گذرتا رہے۔ [مصنف ابن ابي شيبه/كتاب الصلوات/حدیث: 3460]

حضرت ابو خلدہ کہتے ہیں کہ میں نے حضرت عکرمہ کو دیکھا کہ وہ مسجد میں د اخل ہوئے اور انہوں نے دو رکعات نماز ادا کی۔ پھر فرمایا کہ یہ مسجد کا حق ہے۔ [مصنف ابن ابي شيبه/كتاب الصلوات/حدیث: 3461]

حضرت جابر بن عبد اللہ رضی اللہ عنہ کہتے ہیں کہ میں مسجد میں حضور صلی اللہ علیہ وآلہ وسلم کی خدمت میں حاضر ہوا تو آپ نے فرمایا کہ دورکعات نماز پڑھ لو۔ [مصنف ابن ابي شيبه/كتاب الصلوات/حدیث: 3462]