اسماعیل بن علیہ، جریری سے روایت کرتے ہیں کہ ابوالعلاء رحمہ اللہ جمعہ کے دن بیٹھے بیٹھے (حالتِ قعود میں) سو جایا کرتے تھے۔ [مصنف ابن ابي شيبه/كتاب الجمعة/حدیث: 5361]

مالک بن دینار رحمہ اللہ سے روایت ہے، انہوں نے کہا: ”ابو العالیہ اور خلاص بن عمرو رحمہما اللہ جمعہ کے دن طویل نیند سوتے تھے، پھر بیدار ہوتے اور نماز ادا کرتے تھے۔“ [مصنف ابن ابي شيبه/كتاب الجمعة/حدیث: 5362]

سیدنا عبداللہ بن عمر رضی اللہ عنہما کے مولیٰ نافع رحمہ اللہ سے روایت ہے، انہوں نے کہا: ”سیدنا عبداللہ بن عمر رضی اللہ عنہما جمعہ کے دن اس وقت «يحتبي» ”احتباء“ (گھٹنوں کو پیٹ کے ساتھ لگا کر ہاتھوں یا کپڑے سے باندھ کر بیٹھنا) کیا کرتے تھے جب امام خطبہ ارشاد فرما رہا ہوتا تھا، پس اگر خطبہ طویل ہو جاتا تو وہ اپنا سر میری گود میں رکھ لیتے۔“ [مصنف ابن ابي شيبه/كتاب الجمعة/حدیث: 5363]