حضرت عمار سے اسی کے مثل منقول ہے۔ [مصنف ابن ابي شيبه/كتاب الجنائز/حدیث: 11324]

حضرت ابراہیم فرماتے ہیں کہ جب مقتول (میدان جہاد) سے اٹھایا جائے گا تو اس کو انہی کپڑوں میں دفن کیا جائے گا، اور اگر اس کو اٹھایا اور اس میں زندگی کی کچھ رمق باقی ہے تو اس کے ساتھ وہی طریقہ اختیار کیا جائے گا جو دوسروں کے ساتھ کیا جاتا ہے۔ [مصنف ابن ابي شيبه/كتاب الجنائز/حدیث: 11325]

حضرت عامر سے دریافت کیا گیا کہ ایک شخص کو چوروں نے قتل کردیا ہے؟ آپ نے فرمایا: اس کو انہی کپڑوں میں دفن کیا جائے گا اور غسل نہیں دیا جائے گا۔ [مصنف ابن ابي شيبه/كتاب الجنائز/حدیث: 11326]

حضرت ثابت بن عمارہ فرماتے ہیں کہ میں نے حضرت غنیم ابن قیس سے سنا وہ فرماتے ہیں: شہید کو انہی کپڑوں میں دفن کیا جائے گا اور اسکو غسل نہیں دیا جائے گا۔ [مصنف ابن ابي شيبه/كتاب الجنائز/حدیث: 11327]

حضرت حسن فرماتے ہیں کہ مقتول پر اگر پیپ وغیرہ ہو تو اسکو غسل دیا جائے گا۔ [مصنف ابن ابي شيبه/كتاب الجنائز/حدیث: 11328]

حضرت حماد فرماتے ہیں کہ جب کوئی شخص معرکہ میں مرے تو اس کو دفن کردیا جائے گا اور اس کے موزے اور جوتے اتار دیئے جائیں گے، اور اگر اس کو میدان سے اٹھایا گیا اور اس میں زندگی کی رمق باقی تھی، پھر وہ مرگیا تو اس کے ساتھ عام مردوں والا معاملہ کریں گے (غسل وغیرہ دیں گے)۔ [مصنف ابن ابي شيبه/كتاب الجنائز/حدیث: 11329]

حضرت حسن فرماتے ہیں کہ جب حضرت حمزہ شھید ہوئے تو حضور صلی اللہ علیہ وآلہ وسلم نے ان کو غسل دینے کا حکم فرمایا چناچہ انہیں غسل دیا گیا۔ [مصنف ابن ابي شيبه/كتاب الجنائز/حدیث: 11330]

حضرت جابر بن عبد اللہ رضی اللہ عنہ سے مروی ہے کہ نبی کریم صلی اللہ علیہ وآلہ وسلم نے غروہ احد کے شھداء کی نہ نماز جنازہ پڑھی اور نہ ہی ان کو غسل دیا۔ [مصنف ابن ابي شيبه/كتاب الجنائز/حدیث: 11331]

حضرت عبد اللہ بن عمر رضی اللہ عنہما فرماتے ہیں کہ حضرت عمر کو کفن دیا گیا غسل دیا گیا اور خوشبو لگائی گی۔ [مصنف ابن ابي شيبه/كتاب الجنائز/حدیث: 11332]

حضرت عبد اللہ بن عمر رضی اللہ عنہما سے اسی طرح منقول ہے، اور آخر میں فرماتے ہیں کہ آپ افضل الشھداء میں سے ہیں۔ [مصنف ابن ابي شيبه/كتاب الجنائز/حدیث: 11333]