حضرت ابی معمر فرماتے ہیں کہ ھم لوگ بیٹھے ہوئے تھے کہ جنازہ گذرا ہم کھڑے ہوگئے، حضرت علی رضی اللہ عنہ نے فرمایا یہ کیا ہے؟ ھم نے عرض کیا حضرت ابو موسیٰ نے ہمیں اس کا حکم فرمایا ہے، آپ نے فرمایا نبی کریم صلی اللہ علیہ وآلہ وسلم صرف ایک بار کھڑے ہوئے تھے پھر آپ صلی اللہ علیہ وآلہ وسلم نے کھڑے ہونے کا اعادہ نہ فرمایا۔ [مصنف ابن ابي شيبه/كتاب الجنائز/حدیث: 12281]

حضرت عبد الرحمن بن ابی لیلیٰ فرماتے ہیں کہ ھم حضرت علی رضی اللہ عنہ کرم اللہ وجہہ کے پاس تھے کہ ہمارے پاس سے ایک جنازہ گذرا، ایک شخص کھڑا ہوگیا، حضرت علی رضی اللہ عنہ کرم اللہ وجہہ نے فرمایا یہ کیا ہے؟ یہ تو یہود کے طریقوں میں سے ہے۔ [مصنف ابن ابي شيبه/كتاب الجنائز/حدیث: 12282]

حضرت محمد فرماتے ہیں کہ حضرت حسن بن علی رضی اللہ عنہ اور حضرت عبد اللہ بن عباس رضی اللہ عنہما نے جنازہ دیکھا تو ان میں سے ایک کھڑے ہوگئے اور دوسرے بیٹھے رہے، جو کھڑے ہوئے تھے انہوں نے ان سے پوچھا جو کھڑے نہ ہوئے تھے کہ کیا نبی کریم صلی اللہ علیہ وآلہ وسلم کھڑے نہ ہوتے تھے؟ انہوں کہا کیوں نہیں پھر بیٹھ گئے۔ [مصنف ابن ابي شيبه/كتاب الجنائز/حدیث: 12283]

حضرت ابو اسحاق فرماتے ہیں کہ حضرت علی رضی اللہ عنہ اور حضرت عبد اللہ کے اصحاب کے پاس سے جب جنازہ گذرتا تو کھڑے نہ ہوتے۔ [مصنف ابن ابي شيبه/كتاب الجنائز/حدیث: 12284]

حضرت ابراہیم فرماتے ہیں کہ حضرت عبد اللہ کے اصحاب کے پاس سے جنازہ گزرا تو ان میں سے کوئی بھی کھڑا نہ ہوا۔ [مصنف ابن ابي شيبه/كتاب الجنائز/حدیث: 12285]

حضرت ابراہیم فرماتے ہیں کہ (صحابہ کرام) کے پاس سے جب جنازہ گزرتا تو وہ کھڑے نہ ہوتے تھے۔ [مصنف ابن ابي شيبه/كتاب الجنائز/حدیث: 12286]

حضرت لیث فرماتے ہیں کہ حضرت عطاء اور حضرت مجاہد نے جنازہ دیکھا لیکن کھڑے نہ ہوئے۔ [مصنف ابن ابي شيبه/كتاب الجنائز/حدیث: 12287]

حضرت علی رضی اللہ عنہ کرم اللہ وجہہ فرماتے ہیں کہ نبی کریم صلی اللہ علیہ وآلہ وسلم جنازے کے لئے کھڑے ہوئے تو ھم بھی کھڑے ہوگئے، پھر آپ صلی اللہ علیہ وآلہ وسلم تشریف فرما ہوئے تو ھم بھی بیٹھ گئے۔ [مصنف ابن ابي شيبه/كتاب الجنائز/حدیث: 12288]