حضرت عطاء سے مروی ہے کہ ایک شخص نے کبوتر اور اس کے بچوں پر دروازہ بند کیا اور منیٰ اور عرفات چلا گیا پھر جب واپس لوٹا تو وہ کبوتر اور بچے مرچکے تھے، وہ شخص حضرت ابن عمر رضی اللہ عنہما کی خدمت میں حاضر ہوا اور ان سے ذکر کیا آپ نے اس پر تین بکریوں کا دینا لازم قرار دیا اور ایک اور شخص نے ان کے ساتھ حکم لگایا۔ [مصنف ابن ابي شيبه/كتاب الحج/حدیث: 13688]

حضرت عطاء بن السائب سے مروی ہے کہ ہم لوگ ایک گھر میں آئے اور گھر میں ایک کبوتر کو قید کردیا جس سے کبوتر مرگیا، ہم نے حضرت عطاء سے دریافت کیا تو آپ نے فرمایا اس میں بکری دیناپڑے گی۔ [مصنف ابن ابي شيبه/كتاب الحج/حدیث: 13689]

حضرت سعید بن المسیب فرماتے ہیں کہ اس پر بکری لازم ہے۔ [مصنف ابن ابي شيبه/كتاب الحج/حدیث: 13690]

حضرت عطاء فرماتے ہیں کہ جو شخص مکہ کے کبوتروں میں سے کوئی کبوتر مار دے اس پر بکری لازم ہے۔ [مصنف ابن ابي شيبه/كتاب الحج/حدیث: 13691]

حضرت عطاء فرماتے ہیں اس پر بکری لازم ہے۔ [مصنف ابن ابي شيبه/كتاب الحج/حدیث: 13692]

حضرت سلمہ بن محرز فرماتے ہیں کہ میں نے مکہ میں اپنا دروازہ بند کردیا جب میں نے اس کو دوبارہ کھولا تو دو پرندے مرچکے تھے، میں نے حضرت طاؤس سے اس کے متعلق دریافت کیا؟ آپ نے فرمایا: دو بکریاں ذبح کرو۔ [مصنف ابن ابي شيبه/كتاب الحج/حدیث: 13693]

حضرت ابن عباس رضی اللہ عنہما فرماتے ہیں حرم کے ہر پرندے (کبوتر) کے بدلے ایک ایک بکری دینا لازم ہے۔ [مصنف ابن ابي شيبه/كتاب الحج/حدیث: 13694]

حضرت عطاء فرماتے ہیں الدبسی پرندہ (جو لال اور کالے رنگ کا ہوتا ہے) اور خوبصورت آواز والا کبوتر اور الأخضر پرندہ (جو عربوں کے ہاں منحوس سمجھا جاتا ہے) کے بدلے بکری لازم ہے۔ [مصنف ابن ابي شيبه/كتاب الحج/حدیث: 13695]

حضرت حکم مکہ کے ایک شیخ سے روایت کرتے ہیں کہ گھر پر ایک کبوتر بیٹھا ہوا تھا جو حضرت عمر کے ہاتھ پر گرپڑا حضرت عمر نے ہاتھ سے اشارہ کیا تو وہ اڑ کر مکہ کے کسی گھر پر جا بیٹھا جہاں اس کو سانپ نے کھالیا، حضرت عمر نے اپنے اوپر بکری لازم کرلی۔ [مصنف ابن ابي شيبه/كتاب الحج/حدیث: 13696]

حضرت صالح کے والد فرماتے ہیں کہ میں نے حضرت عثمان کے ساتھ حج کیا میں نے ان کے لیے ایک گھر میں بستر بچھایا تو وہ لیٹ گئے، اتنے میں ایک کبوتر آیا اور بستر کے اوپر روشندان میں آ بیٹھا اور اس نے اپنے پاؤں سے کھودنا شروع کردیا مجھے ڈر ہوا کہ یہ مٹی وغیرہ بستر پر گرائے گا جس کی وجہ سے حضرت عثمان جاگ جائیں گے، میں نے اس کبوتر کو اڑا دیا تو وہ دوسرے روشندان میں جا بیٹھا، ایک سانپ نکلا اور اس کو مار ڈالا، پھر جب حضرت عثمان نیند سے بیدار ہوئے تو میں نے یہ بات بتائی، آپ نے فرمایا اپنی طرف سے بکری ادا کرو، میں نے عرض کیا کہ میں نے تو آپ کی وجہ سے اس کو بھگایا تھا، آپ نے فرمایا پھر میری طرف سے بھی بکری ادا کرو۔ [مصنف ابن ابي شيبه/كتاب الحج/حدیث: 13697]