حضرت عطاء فرماتے ہیں کہ محرم کے لیے ایسے گانے، حدی یا اشعار پڑھنے میں کوئی حرج نہیں جس میں فحش اور شرکیہ کلام نہ ہو۔ [مصنف ابن ابي شيبه/كتاب الحج/حدیث: 14493]

حضرت عطاء بن السائب فرماتے ہیں کہ حضرت عمر ایک شخص کو حکم فرماتے تو وہ حدی پڑھتا۔ [مصنف ابن ابي شيبه/كتاب الحج/حدیث: 14494]

حضرت محمد بن قاسم فرماتے ہیں کہ حضرت حسن سے اونٹوں کی حدی کے متعلق دریافت کیا گیا؟ آپ نے فرمایا مسلمان (صحابہ کرام) اس طرح کرتے تھے۔ [مصنف ابن ابي شيبه/كتاب الحج/حدیث: 14495]

حضرت ابراہیم بن عبد الاعلیٰ فرماتے ہیں کہ حضرت سوید بن غفلہ نے اپنے غلام کو حکم فرمایا کہ وہ ہمارے (اونٹوں) کے لیے حدی پڑھے۔ [مصنف ابن ابي شيبه/كتاب الحج/حدیث: 14496]

حضرت یزید بن الأعرج فرماتے ہیں کہ میں نے حضرت مورق کو مکہ کے راستہ پر ان الفاظ کے ساتھ حدی پڑھتے ہوئے سنا کہ اگر وہ بول سکتیں تو راہ رو سے شکایت کرتیں۔ [مصنف ابن ابي شيبه/كتاب الحج/حدیث: 14497]

حضرت عمر بن خطاب نے سنا کہ ایک شخص سواریوں کے لیے گانے والی حدی پڑھ رہا ہے آپ نے فرمایا: یہ سوار کا زاد راہ ہے۔ [مصنف ابن ابي شيبه/كتاب الحج/حدیث: 14498]

حضرت مجاہد سے مروی ہے کہ نبی کریم صلی اللہ علیہ وآلہ وسلم کی ایک قوم سے ملاقات ہوئی جن میں حدی پڑھنے والے تھے، جب ان لوگوں نے نبی کریم صلی اللہ علیہ وآلہ وسلم کو دیکھا تو ان کا حدی خوان خاموش ہوگیا، آپ صلی اللہ علیہ وآلہ وسلم نے دریافت فرمایا: کون سی قوم کے لوگ ہیں، لوگوں نے عرض کیا قبیلہ مضر میں سے ہیں، آپ صلی اللہ علیہ وآلہ وسلم نے ارشاد فرمایا: میں بھی مضر میں سے ہوں۔ پھر آپ صلی اللہ علیہ وآلہ وسلم نے دریافت فرمایا کہ تمہارے حدی خوان کو کیا ہوا ہے کہ وہ حدی نہیں پڑھتا؟ لوگوں نے عرض کیا اے اللہ کے رسول (صلی اللہ علیہ وآلہ وسلم)! ہم عرب کے پہلے حدی خواں ہیں، آپ صلی اللہ علیہ وآلہ وسلم نے دریافت فرمایا یہ کس طرح شروع ہوا؟ لوگوں نے عرض کیا کہ اے اللہ کے رسول (صلی اللہ علیہ وآلہ وسلم)! ہم میں ایک شخص تھا پھر اس کا نام لیا ایام ربیع میں اپنے اونٹ سے دور تھا، اس نے اپنے ایک غلام کو اونٹ کے ساتھ روانہ کیا، غلام کو دیر ہوگئی۔ اس پر اس نے غلام کے ہاتھ پر اپنی لاٹھی ماری تو غلام یہ کہتے ہوئے تیز تیز چلنے لگا کہ: ہائے میرا ہاتھ، ہائے میرا ہاتھ، غلام کے اس قول کی وجہ سے اونٹ میں بھی حرکت پیدا ہوئی اور وہ بھی تیز اور چست ہو کر چلنے لگا، اس شخص نے اس کو کہا رک جا، رک جا، پھر لوگوں نے (اس واقعہ کے بعد) حدی پڑھنا شروع کردی۔ [مصنف ابن ابي شيبه/كتاب الحج/حدیث: 14499]