حضرت علی رضی اللہ عنہ سے سوال کیا گیا کہ ایک آدمی کوئی باندی خریدے اور اس باندی سے اس کی اولاد بھی ہو اور پھر کوئی آدمی اس بات پر گواہی قائم کردے کہ یہ باندی اس کی ہے تو کیا حکم ہے؟ انہوں نے فرمایا کہ یہ باندی اس کو واپس کی جائے گی، باندی کے بچے کی قیمت لگائی جائے گی اور باندی کو بیچنے والے سے جرمانہ وصول کیا جائے گا۔ [مصنف ابن ابي شيبه/كتاب البيوع والأقضية/حدیث: 21767]

حضرت ابراہیم فرماتے ہیں کہ اگر ایک آدمی نے اپنی باندی کو کسی آدمی کے پاس دیکھا کہ اس آدمی نے اس کی باندی کو خریدا اور اس سے اس آدمی کی اولاد ہوئی تو وہ باندی کو لے لے گا اور اولاد کے باپ سے اولاد کی قیمت لے گا۔ [مصنف ابن ابي شيبه/كتاب البيوع والأقضية/حدیث: 21768]

حضرت میسرہ فرماتے ہیں کہ ہر خادم کے بدلے ایک خادم ہے۔ [مصنف ابن ابي شيبه/كتاب البيوع والأقضية/حدیث: 21769]

حضرت حسن فرماتے ہیں کہ ہر خادم کے بدلے ایک خادم ہے۔ [مصنف ابن ابي شيبه/كتاب البيوع والأقضية/حدیث: 21770]

حضرت سالم کہتے ہیں کہ میں نے حضرت شعبی سے سوال کیا کہ لڑکے کی قیمت کب سے لگائی جائے گی؟ انہوں نے فرمایا کہ جس دن وہ پیدا ہوا۔ [مصنف ابن ابي شيبه/كتاب البيوع والأقضية/حدیث: 21771]