حضرت ابن عباس رضی اللہ عنہما سے روایت ہے وہ کہتے ہیں کہ میں نے جناب نبی کریم صلی اللہ علیہ وآلہ وسلم کو کہتے ہوئے سُنا: ”جس کسی چمڑے کو بھی دباغت دی جائے تو وہ یقینا پاک ہوجاتا ہے۔“ [مصنف ابن ابي شيبه/كتاب اللباس/حدیث: 26379]

حضرت سلمان سے روایت ہے وہ کہتے ہیں کہ حضرت امہات المؤمنین میں سے کسی کے پاس ایک بکری تھی۔ وہ مرگئی تو جناب رسول اللہ صلی اللہ علیہ وآلہ وسلم اس کے پاس سے گزرے اور ارشاد فرمایا: ”اگر اس بکری کے مالک اس کی کھال سے نفع حاصل کرتے تو ان کو نقصان نہ ہوتا۔“ [مصنف ابن ابي شيبه/كتاب اللباس/حدیث: 26380]

حضرت میمونہ سے روایت ہے کہ ان کی آزاد کردہ لونڈی کی مرد ہ بکری… جو انہیں صدقہ کے مال سے عطاء ہوئی تھی…کے پاس سے آپ صلی اللہ علیہ وآلہ وسلم کا گزر ہوا تو فرمایا: ”ان لوگوں نے اس بکری کی کھال کیوں نہیں اتاری کہ اس کو دباغت دیتے اور پھر وہ اس سے نفع لیتے؟“ لوگوں نے عرض کیا: یا رسول اللہ صلی اللہ علیہ وآلہ وسلم! یہ تو مردار ہے۔ آپ صلی اللہ علیہ وآلہ وسلم نے فرمایا: ”اس کا صرف کھانا حرام ہے۔“ [مصنف ابن ابي شيبه/كتاب اللباس/حدیث: 26381]

حضرت ابن عباس رضی اللہ عنہما سے روایت ہے کہ حضرت سودہ بنت زمعہ کی ایک بکری تھی جو مرگئی۔ وہ کہتی ہیں کہ ہم نے اس کی کھال کو دباغت دے دی اور ہم اس میں نبیذ بناتے تھے یہاں تک کہ وہ بوسیدہ ہوگئی۔ [مصنف ابن ابي شيبه/كتاب اللباس/حدیث: 26382]

حضرت عکرمہ سے روایت ہے کہ جناب رسول اللہ صلی اللہ علیہ وآلہ وسلم، حضرت سودہ بنت زمعہ کی (مری ہوئی) بکری کے پاس سے گزرے تو آپ صلی اللہ علیہ وآلہ وسلم نے فرمایا: ”ان لوگوں نے اس کی کھال سے کیوں نفع نہیں لیا۔ کیونکہ کھال کی دباغت کھال کی طہارت ہے۔“ [مصنف ابن ابي شيبه/كتاب اللباس/حدیث: 26383]

حضرت سعید بن جبیر سے روایت ہے وہ کہتے ہیں کہ کھال کی دباغت ہی کھال کی طہارت ہے۔ [مصنف ابن ابي شيبه/كتاب اللباس/حدیث: 26384]

حضرت عائشہ رضی اللہ عنہا سے روایت ہے وہ کہتی ہیں کہ جناب رسول اللہ صلی اللہ علیہ وآلہ وسلم نے اس بات کا حکم دیا ہے کہ مرداروں کی کھالوں سے نفع حاصل کیا جائے۔ [مصنف ابن ابي شيبه/كتاب اللباس/حدیث: 26385]

حضرت ابن عباس رضی اللہ عنہما سے روایت ہے کہ جناب رسول اللہ صلی اللہ علیہ وآلہ وسلم، حضرت میمونہ کی آزاد کردہ لونڈی کی مردہ بکری کے پاس سے گزرے تو ارشاد فرمایا: ”ان لوگوں نے اس بکری کی کھال سے نفع کیوں نہیں لیا؟“ [مصنف ابن ابي شيبه/كتاب اللباس/حدیث: 26386]

حضرت ابن عباس رضی اللہ عنہما، حضرت میمونہ سے روایت کرتے ہیں کہتے ہیں کہ جناب نبی کریم صلی اللہ علیہ وآلہ وسلم کی عورتوں میں سے کسی ایک کی بکری مرگئی تو جناب نبی کریم صلی اللہ علیہ وآلہ وسلم نے فرمایا: ”تم لوگوں نے اس کے چمڑے سے کیوں نفع نہیں لیا؟“ [مصنف ابن ابي شيبه/كتاب اللباس/حدیث: 26387]

حضرت قیس بن ابی حازم سے روایت ہے وہ کہتے ہیں کہ مجھے یہ حدیث بیان کی گئی کہ جناب رسول اللہ صلی اللہ علیہ وآلہ وسلم ایک مردہ بکری کے پاس سے گزرے تو آپ صلی اللہ علیہ وآلہ وسلم نے ارشاد فرمایا ـ: ”اس بکری کے مالکوں کو کوئی نقصان نہ ہوتا اگر یہ اس کے چمڑے سے منتفع ہوتے؟“ [مصنف ابن ابي شيبه/كتاب اللباس/حدیث: 26388]