حضرت سعید بن یزید فرماتے ہیں کہ حضرت عکرمہ نے ارشاد فرمایا: تمہیں کیا ہوا کہ تم سوال نہیں کرتے؟ کیا تم طالب علم نہیں ہو؟ [مصنف ابن ابي شيبه/ كتاب الأدب/حدیث: 28104]

حضرت سعد بن ابراہیم فرماتے ہیں کہ حضرت ابن عباس رضی اللہ عنہما نے ارشاد فرمایا: مجھ سے کسی بھی شخص نے سوال نہیں کیا مگر میں نے پہچان لیا کہ وہ فقیہ ہے یا غیر فقیہ۔ [مصنف ابن ابي شيبه/ كتاب الأدب/حدیث: 28105]

حضرت عطاء بن سائب فرماتے ہیں کہ حضرت سعید بن جبیر نے ارشاد فرمایا: کوئی مجھ سے پوچھنے والا نہیں؟ [مصنف ابن ابي شيبه/ كتاب الأدب/حدیث: 28106]

حضرت عمرو فرماتے ہیں کہ حضر ت عروہ نے ہمیں ارشاد فرمایا: میرے پاس آؤ اور مجھ سے علم حاصل کرو۔ [مصنف ابن ابي شيبه/ كتاب الأدب/حدیث: 28107]

امام زہری فرماتے ہیں کہ حضرت عروہ لوگوں کو اپنی باتوں سے مانوس کرتے تھے۔ [مصنف ابن ابي شيبه/ كتاب الأدب/حدیث: 28108]

حضرت عبد اللہ بن سائب فرماتے ہیں کہ حضرت زاذان نے ارشاد فرمایا: کہ میں نے حضرت ابن مسعود سے چند اشیاء کے بارے میں پوچھا کہ کسی نے مجھ سے ان کے متعلق سوال نہیں کیا۔ [مصنف ابن ابي شيبه/ كتاب الأدب/حدیث: 28109]

حضرت خالد بن عرعرہ فرماتے ہیں کہ میں کسی کشادہ میدان میں گیا تو میں نے وہاں تیس یا چالیس کے قریب آدمیوں کو بیٹھا ہوا پایا، تو میں بھی ان کے ساتھ بیٹھ گیا۔ اتنے میں حضرت علی رضی اللہ عنہ ہمارے پاس تشریف لائے۔ راوی کہتے ہیں کہ میں نے نہیں دیکھا کہ انہوں نے لوگوں میں سے کسی کو میرے سوا نہ پہچانا ہو۔ پھر آپ نے فرمایا: کیا کوئی ایسا شخص نہیں جو مجھ سے سوال کر کے فائدہ اٹھائے اور اس کے ہمنشین بھی فائدہ اٹھائیں۔ [مصنف ابن ابي شيبه/ كتاب الأدب/حدیث: 28110]

حضرت سعید بن المسیب فرماتے ہیں کہ نبی کریم صلی اللہ علیہ وآلہ وسلم کے صحابہ میں حضرت علی رضی اللہ عنہ بن ابی طالب کے سوا کوئی بھی نہیں تھا، جو یوں کہتا ہو کہ مجھ سے سوال کرو۔ [مصنف ابن ابي شيبه/ كتاب الأدب/حدیث: 28111]