حضرت ربیع بن سعد فرماتے ہیں کہ میں نے حضرت جابر کو دیکھا کہ وہ حضرت ابن سابط کے پاس تختیوں میں لکھ رہے تھے۔ [مصنف ابن ابي شيبه/ كتاب الأدب/حدیث: 28116]

حضرت یحییٰ بن سعید فرماتے ہیں کہ حضرت عبد الرحمن بن حرملہ نے ارشاد فرمایا کہ میں کمزور حافظہ کا مالک تھا۔ تو حضرت سعید بن مسیب نے مجھے لکھنے کی رخصت دے دی۔ [مصنف ابن ابي شيبه/ كتاب الأدب/حدیث: 28117]

حضرت عبد الملک بن سفیان کے چچا فرماتے ہیں کہ میں نے حضرت عمر بن خطاب کو یوں فرماتے ہوئے سنا: علم کو لکھ کر محفوظ کرو۔ [مصنف ابن ابي شيبه/ كتاب الأدب/حدیث: 28118]

حضرت یحییٰ بن ابی کثیر فرماتے ہیں کہ حضرت ابن عباس رضی اللہ عنہما نے ارشاد فرمایا: علم کو لکھ کر محفوظ کرو۔ [مصنف ابن ابي شيبه/ كتاب الأدب/حدیث: 28119]

حضرت یوسف بن ماھک فرماتے ہیں کہ حضرت عبد اللہ بن عمرو رضی اللہ عنہ نے ارشاد فرمایا: کہ میں رسول اللہ صلی اللہ علیہ وآلہ وسلم کی سنی ہوئی ہر حدیث لکھ لیا کرتا تھا تاکہ میں اس کو یاد رکھوں۔ قریش نے مجھے ایسا کرنے سے روک دیا۔ اور کہنے لگے، کہ تم رسول اللہ صلی اللہ علیہ وآلہ وسلم کی ہر فرمودہ بات لکھ لیتے ہو؟ حالانکہ رسول اللہ صلی اللہ علیہ وآلہ وسلم کبھی خوشی کی حالت میں ہوتے ہیں اور کبھی غصہ کی حالت میں! آپ فرماتے ہیں: کہ میں لکھنے سے رک گیا اور میں نے یہ بات نبی کریم صلی اللہ علیہ وآلہ وسلم کے سامنے ذکر کی۔ تو آپ صلی اللہ علیہ وآلہ وسلم نے اپنی زبان کی طرف اشارہ کر کے فرمایا: لکھ لیا کرو۔ پس قسم ہے اس ذات کی جس کے قبضۂ قدرت میں میری جان ہے اس زبان سے صرف حق بات نکلتی ہے۔ [مصنف ابن ابي شيبه/ كتاب الأدب/حدیث: 28120]

حضرت معن فرماتے ہیں کہ حضرت عبد الرحمن بن عبد اللہ نے میرے سامنے ایک کتاب نکالی، اور قسم اٹھا کر فرمایا کہ یہ میرے والد کے ہاتھ کی لکھی ہوئی ہے۔ [مصنف ابن ابي شيبه/ كتاب الأدب/حدیث: 28121]

حضرت منصور فرماتے ہیں کہ حضرت ابراہیم نے ارشاد فرمایا: کناروں پر لکھنے میں کوئی حرج نہیں۔ [مصنف ابن ابي شيبه/ كتاب الأدب/حدیث: 28122]

حضرت ابو کبران فرماتے ہیں کہ میں نے حضرت ضحاک کو یوں فرماتے ہوئے سنا کہ جب تم کوئی بات سنو تو اسے لکھ لیا کرو اگرچہ دیوار پر ہی لکھو۔ [مصنف ابن ابي شيبه/ كتاب الأدب/حدیث: 28123]

حضرت حسین بن عقیل فرماتے ہیں کہ حضرت ضحاک نے مجھے حج کے مناسک کی املاء کروائی۔ [مصنف ابن ابي شيبه/ كتاب الأدب/حدیث: 28124]

حضرت بشیر بن نھیک فرماتے ہیں کہ میں حضرت ابوہریرہ سے جو بھی حدیث سنتا تھا اسے لکھ لیا کرتا تھا۔ جب میں نے ان سے جدا ہونے کا ارادہ کیا تو میں اپنی لکھی ہوئی کا پی لایا اور میں نے عرض کیا: یہ وہ روایات ہیں جو میں نے آپ سے سنی ہیں؟ آپ نے فرمایا: جی ہاں!۔ [مصنف ابن ابي شيبه/ كتاب الأدب/حدیث: 28125]