حضرت جابر فرماتے ہیں کہ ایک آدمی نبی کریم صلی اللہ علیہ وآلہ وسلم کی خدمت میں آیا اور عرض کیا: یا رسول اللہ صلی اللہ علیہ وآلہ وسلم! افضل ترین مسلمان کون ہے؟ آپ صلی اللہ علیہ وآلہ وسلم نے فرمایا: جس کے ہاتھ اور زبان سے مسلمان محفوظ رہیں۔ [مصنف ابن ابي شيبه/ كتاب الأدب/حدیث: 28194]

حضرت عبد اللہ بن عمرو رضی اللہ عنہ فرماتے ہیں کہ ایک صحابی نے کھڑے ہو کر سوال کیا: اے اللہ کے رسول (صلی اللہ علیہ وآلہ وسلم)! افضل ترین اسلام کیا ہے؟ آپ صلی اللہ علیہ وآلہ وسلم نے فرمایا: یہ کہ تمہارے ہاتھ اور تمہاری زبان سے مسلمان محفوظ ہوں۔ [مصنف ابن ابي شيبه/ كتاب الأدب/حدیث: 28195]

حضرت معاذ بن جبل فرماتے ہیں کہ نبی کریم صلی اللہ علیہ وآلہ وسلم نے ان سے ارشاد فرمایا: کیا میں تمہیں ان تمام چیزوں کی جڑ نہ بتادوں؟ آپ کہتے ہیں: میں نے عرض کیا: اے اللہ کے رسول (صلی اللہ علیہ وآلہ وسلم)! آپ صلی اللہ علیہ وآلہ وسلم کا کہنا کہ میں تمہیں تمام چیزوں کی جڑ نہ بتادوں؟ آپ صلی اللہ علیہ وآلہ وسلم نے اپنی زبان کی طرف اشارہ کیا۔ میں نے عرض کیا: اے اللہ کے رسول (صلی اللہ علیہ وآلہ وسلم)! ہم اپنی زبان سے جو بھی لفظ نکالتے ہیں ان سب پر مؤاخذہ ہوگا؟ آپ صلی اللہ علیہ وآلہ وسلم نے فرمایا: اے معاذ! تمہیں تمہاری ماں گم پائے۔ لوگوں کو جہنم میں پیشانی کے بل گرانے والی چیز اسی زبان کی کھیتیاں ہوں گی۔ [مصنف ابن ابي شيبه/ كتاب الأدب/حدیث: 28196]

حضرت عنبس بن عقبہ فرماتے ہیں کہ حضرت عبد اللہ بن مسعود رضی اللہ عنہ نے ارشاد فرمایا: قسم ہے اس ذات کی جس کے سوا کوئی معبود نہیں، زمین پر زبان سے زیادہ کوئی چیز بھی لمبی قید کی محتاج نہیں۔ [مصنف ابن ابي شيبه/ كتاب الأدب/حدیث: 28198]

حضرت اسلم فرماتے ہیں کہ حضرت عمر حضرت ابوبکر پر داخل ہوئے اس حال میں کہ انہوں نے اپنی زبان کو پکڑا ہوا تھا اور یوں فرما رہے تھے۔ بیشک یہ ہی ہے جس نے مجھے مصیبتوں کے گھاٹ اتارا۔ [مصنف ابن ابي شيبه/ كتاب الأدب/حدیث: 28199]

حضرت عبد اللہ بن سفیان فرماتے ہیں کہ ان کے والد حضرت سفیان نے فرمایا: کہ میں نے عرض کیا: اے اللہ کے رسول (صلی اللہ علیہ وآلہ وسلم)! میں کن چیزوں سے بچوں؟ تو آپ صلی اللہ علیہ وآلہ وسلم نے جواب میں اپنی زبان کی طرف اشارہ فرمایا۔ [مصنف ابن ابي شيبه/ كتاب الأدب/حدیث: 28200]

حضرت عبد اللہ بن دینار فرماتے ہیں کہ حضرت ابن عمر رضی اللہ عنہما نے ارشاد فرمایا: کہ سب سے زیادہ حقدار چیز جس کو مسلمان پاکیزہ رکھے وہ اس کی زبان ہے۔ [مصنف ابن ابي شيبه/ كتاب الأدب/حدیث: 28201]