حضرت شمیسہ فرماتی ہیں کہ میں نے حضرت عائشہ رضی اللہ عنہا کو یوں فرماتے ہوئے سنا کہ ان سے یتیم بچہ کو اد ب سکھانے کے متعلق سوال کیا گیا؟ آپ نے فرمایا: بیشک میں ان میں سے کسی کو اتنا ماروں گی کہ وہ خوش ہوجائے۔ [مصنف ابن ابي شيبه/ كتاب الأدب/حدیث: 28391]

حضرت حسن عرنی فرماتے ہیں کسی صحابی نے نبی کریم صلی اللہ علیہ وآلہ وسلم سے پوچھا: میں یتیم کو کس حد تک مار سکتا ہوں؟ آپ صلی اللہ علیہ وآلہ وسلم نے فرمایا: تم اس کو اتنا مارو جتنا تم اپنے بچہ کو مارتے ہو۔ [مصنف ابن ابي شيبه/ كتاب الأدب/حدیث: 28392]

حضرت ابو جعفر خطمی فرماتے ہیں کہ ان کے والد نے حضرت سعید بن مسیب سے سوال کیا یا یوں فرمایا: کہ انہوں نے اپنے غلام کو بھیجا اور میں ان کے ساتھ تھا کہ آدمی یتیم کو کس حد تک مار سکتا ہے؟ آپ نے فرمایا: جتنا آدمی اپنے بچہ کو مار سکتا ہے۔ حضرت ابو جعفر فرماتے ہیں: کہ انہوں نے حضرت محمد بن کعب سے پوچھا: انہوں نے بھی یہی ارشاد فرمایا۔ [مصنف ابن ابي شيبه/ كتاب الأدب/حدیث: 28393]