حضرت ابن ابی لیلیٰ فرماتے ہیں کہ حضرت عطاء نے فرمایا: ایک آدمی دورانِ طواف کچلا گیا تو حاکم نے اس کی دیت بیت المال سے ادا کی۔ [مصنف ابن ابي شيبه/كتاب الديات/حدیث: 29682]

حضرت وھب بن عقبہ اور حضرت مسلم بن یزید بن مذکور فرماتے ہیں کہ انہوں نے حضرت یزید بن مذکور کو یوں فرماتے ہوئے سنا کہ جمعہ کے دن کوفہ کی جامع مسجد میں لوگوں کا رش لگ گیا جب رش ختم ہوا تو وہاں ایک آدمی قتل ہوا پڑا تھا تو پھر حضرت علی رضی اللہ عنہ بن ابو طالب نے بیت المال سے اس کی دیت ادا کی۔ [مصنف ابن ابي شيبه/كتاب الديات/حدیث: 29683]

حضرت حکم فرماتے ہیں کہ حضرت ابراہیم نے ارشاد فرمایا: کہ ایک شخص کو طوا ف کے دوران قتل کردیا گیا تو حضرت عمر نے اس بارے میں لوگوں سے مشورہ طلب کیا اس پر حضرت علی رضی اللہ عنہ نے فرمایا: اس کی دیت مسلمانوں پر یا بیت المال میں لازم ہوگی۔ [مصنف ابن ابي شيبه/كتاب الديات/حدیث: 29684]

حضرت ابن جریج فرماتے ہیں کہ حضرت عطاء نے ارشاد فرمایا: مروان کی حکومت میں ایک نامعلوم پتھر آیا اور ابن نسطاس بن عامر بن عبداللہ بن نسطاس کو جا لگا اس کا پھینکنے والا معلوم نہیں تھا پس اس پتھر نے اسے مار دیا تو مروان نے اس کی دیت لوگوں پر ڈال دی۔ [مصنف ابن ابي شيبه/كتاب الديات/حدیث: 29685]

حضرت اشعث فرماتے ہیں کہ کچھ لوگ تیر اندازی کا مقابلہ کررہے تھے کہ انہوں نے ایک شخص کو تیر مار دیا یہ معلوم نہیں تھا کہ ان میں سے کس نے اس کو تیر مارا ہے حضرت حسن بصری نے ارشاد فرمایا: اس کی دیت ان سب پر لازم ہوگی۔ [مصنف ابن ابي شيبه/كتاب الديات/حدیث: 29686]