حضرت ابوہریرہ فرماتے ہیں کہ رسول اللہ صلی اللہ علیہ وآلہ وسلم کا ارشاد ہے کہ: تم لوگ ہوا کو بُرا بھلا مت کہو، پس یہ تو اللہ کی مہربانی ہے، جو رحمت اور عذاب دونوں کو لاتی ہے۔ لیکن تم لوگ اللہ کی پناہ مانگو اس کے شر سے، اور اللہ سے اس کی خیر و بھلائی کو طلب کرو۔ [مصنف ابن ابي شيبه/كتاب الدعاء/حدیث: 31179]

حضرت عبد الرحمن بن أبزی فرماتے ہیں کہ حضرت ابی ّ کا ارشاد ہے: تم لوگ ہوا کو بُرا مت کہو، جب تم اسے ناپسند سمجھنے لگو تو یوں کہو: اے اللہ! ہم آپ سے اس ہوا اور جو کچھ اس ہوا میں ہے اور جس وجہ سے یہ ہوا بھیجی گئی ہے اس کی بھلائی کا سوال کرتے ہیں، اور ہم آپ کی پناہ مانگتے ہیں اس ہوا کے شر سے، اور جو کچھ اس ہوا میں ہے اس کے شر سے، اور جس وجہ سے یہ ہوا بھیجی گئی ہے اس کے شر سے۔ [مصنف ابن ابي شيبه/كتاب الدعاء/حدیث: 31180]

حضرت منصور فرماتے ہیں کہ حضرت مجاہد نے فرمایا: ایک مرتبہ زور دار آندھی چلی تو لوگوں نے اسے برا بھلا کہا۔ یہ سن کر حضرت ابن عباس رضی اللہ عنہما فرمانے لگے: تم اسے بُرا مت کہو۔ پس یقیناً ہوا کبھی رحمت کو لے کر آتی ہے، اور کبھی عذاب کو لاتی ہے، لیکن یوں کہا کرو: اے اللہ! تو اس ہوا کو باعث رحمت بنا دے اور تو اس کو باعث عذاب مت بنا۔ [مصنف ابن ابي شيبه/كتاب الدعاء/حدیث: 31181]

حضرت امام محمد الباقر فرماتے ہیں کہ جب طوفانی آندھی آتی اور بھنور بنتے تو حضرت ابن عمر رضی اللہ عنہما فرماتے تھے: بلند اور زور دار تکبیر کہو پس یقینا یہ تکبیر اس آندھی کو ختم کردینے والی ہے۔ [مصنف ابن ابي شيبه/كتاب الدعاء/حدیث: 31182]

حضرت ابو فزارہ فرماتے ہیں: حضرت عبد الرحمن بن مالک جب بھی تیز ہوا چلتی دیکھتے تو فرماتے: اے اللہ! ہم آپ سے اس ہوا کی خیر، اور جو کچھ آپ نے اس ہوا میں بھیجا ہے اس کی خیر طلب کرتے ہیں، اور ہم آپ کی پناہ مانگتے ہیں اس ہوا کے شر سے اور جو کچھ آپ نے اس ہوا میں مقرر کیا ہے اس کے شر سے۔ [مصنف ابن ابي شيبه/كتاب الدعاء/حدیث: 31183]

حضرت عائشہ رضی اللہ عنہا فرماتی ہیں: یقینا جب رسول اللہ صلی اللہ علیہ وآلہ وسلم آسمان کے کسی حصہ میں گھنا بادل دیکھتے تو جس کام میں مشغول ہوتے اسے چھوڑ دیتے اگرچہ نماز پڑھنے میں ہی مشغول ہوں، یہاں تک کہ آپ صلی اللہ علیہ وآلہ وسلم اس کا استقبال کرتے ہوئے فرماتے: ”اے اللہ! ہم آپ کی پناہ مانگتے ہیں اس بھیجے ہوئے بادل کے شر سے“ پس اگر بارش ہونے لگتی تو فرماتے: اے اللہ! اس ہونے والی بارش کو نفع والا بنا دے۔ دو یا تین مرتبہ پڑھتے۔ پس اگر اللہ بادلوں کو ہٹا دیتا اور بارش نہ ہوتی تو اس بات پر اللہ کی حمد وثناء کرتے۔ [مصنف ابن ابي شيبه/كتاب الدعاء/حدیث: 31184]

حضرت قاسم فرماتے ہیں کہ رسول اللہ صلی اللہ علیہ وآلہ وسلم جب بارش دیکھتے تو دعا فرماتے: اے اللہ! اس ہونے والی بارش کو نفع مند بنا دے۔ [مصنف ابن ابي شيبه/كتاب الدعاء/حدیث: 31185]