حضرت عکرمہ فرماتے ہیں کہ حضرت عبد اللہ بن عباس رضی اللہ عنہما سے جب قرآن کریم کی کسی آیت کی تفسیر پوچھی جاتی تو جواب میں اہل عرب کے اشعار سناتے۔ [مصنف ابن ابي شيبه/كتاب فضائل القرآن/حدیث: 31977]

حضرت عبد اللہ بن عباس رضی اللہ عنہما فرماتے ہیں کہ مجھے قرآن مجید کی اس آیت { رَبَّنَا افْتَحْ بَیْنَنَا وَبَیْنَ قَوْمِنَا بِالْحَقِّ } کے صحیح معنی کا اس وقت تک علم نہ تھا، جب تک میں میں نے بنت ذی یزن کا یہ قول نہیں سنا۔ تعال افا تحک۔ [مصنف ابن ابي شيبه/كتاب فضائل القرآن/حدیث: 31978]

حضرت عامر فرماتے ہیں کہ قرآن مجید کی آیت { فَإِذَا ہُمْ بِالسَّاہِرَۃِ } میں ساھرہ سے مراد زمین ہے۔ پھر انہوں نے دلیل کے طور پر امیہ کا یہ شعر پڑھا۔ وَفِیہَا لَحْمُ سَاہِرَۃٍ وَبَحْرٍ۔ [مصنف ابن ابي شيبه/كتاب فضائل القرآن/حدیث: 31979]

حضرت سعید بن جبیر قرآن مجید کی سورة حج میں آ نے والے الفاظ القانع کے بارے میں فرماتے ہیں کہ اس سے مراد مانگنے والا ہے، پھر انہوں نے شماخ کا یہ شعر پڑھا۔ لَمَالُ الْمَرْئِ یُصْلِحُہُ فَیُغْنِی مَفَاقِرَہُ أَعَفُّ مِنَ الْقَنُوعِ [مصنف ابن ابي شيبه/كتاب فضائل القرآن/حدیث: 31980]

حضرت عبد اللہ بن عباس رضی اللہ عنہما فرماتے ہیں کہ زنیم ایسے شخص کو کہتے ہیں جو کمینہ ہو اور دھتکارا ہوا ہو۔ پھر وہ شعر پڑھتے۔ زَنِیمٌ تَدَاعَاہُ الرِّجَالُ زِیَادَۃً کَمَا زِیدَ فِی عَرْضِ الأَدِیمِ الأَکَارِعُ [مصنف ابن ابي شيبه/كتاب فضائل القرآن/حدیث: 31981]

حضرت عبد اللہ بن عباس رضی اللہ عنہما قرآن مجید کی سورة انعام میں آ نے والے لفظ دَرَسْتَ کو پڑھتے پھر یہ کہتے: دَارِسٌ کَطَعْمِ الصَّابِّ وَالْعَلْقَمِ۔ [مصنف ابن ابي شيبه/كتاب فضائل القرآن/حدیث: 31982]

حضرت کہف فرماتے ہیں قرآن مجید کی آیت { فَمِنْہُمْ مَنْ قَضَی نَحْبَہُ } میں نحبہ سے مراد نذر ہے، پھر یہ شعر کہتے: قَضَتْ مِنْ یَثْرِب نَحْبَہَا فَاسْتَمَرَّتْ۔ [مصنف ابن ابي شيبه/كتاب فضائل القرآن/حدیث: 31983]