ابو سعد سے روایت ہے کہ حضرت سعید بن جبیر رحمہ اللہ نے آیت { وَإِذَا حَضَرَ الْقِسْمَۃَ أُولُوا الْقُرْبَی وَالْیَتَامَی وَالْمَسَاکِینُ فَارْزُقُوہُمْ مِنْہُ } کی تفسیر میں فرمایا کہ اگر ورثاء بالغ ہوں تو ان لوگوں کو کچھ مال دے دیا جائے، اور اگر ورثاء نابالغ ہوں تو ان لوگوں سے معذرت کرلی جائے، یہ مطلب ہے { قَوْلاً مَعْرُوفًا } کا۔ [مصنف ابن ابي شيبه/كتاب الوصايا/حدیث: 32943]

محمد بن سیرین سے روایت ہے کہ حضرت حمید بن عبد الرحمن نے فرمایا کہ میرے والد ایک مرتبہ وراثت کے مال کے ذمہ دار بنے، تو انہوں نے ایک بکری ذبح کروا کر پکوائی پھر جب میراث تقسیم کرچکے تو ان لوگوں کو کھلا دیا جو وہاں موجود تھے اور اس کے بعد جو لوگ وارث نہیں تھے ان سے اچھی بات فرما دی۔ [مصنف ابن ابي شيبه/كتاب الوصايا/حدیث: 32944]

سدی روایت کرتے ہیں کہ ابو مالک نے فرمایا کہ اس آیت کو میراث کی آیت نے منسوخ کردیا ہے۔ [مصنف ابن ابي شيبه/كتاب الوصايا/حدیث: 32945]

عکرمہ حضرت ابن عباس رضی اللہ عنہما کا فرمان نقل کرتے ہیں کہ یہ آیت مُحکَم ہے منسوخ نہیں۔ [مصنف ابن ابي شيبه/كتاب الوصايا/حدیث: 32946]