سیدنا حذیفہ رضی اللہ عنہ بیان کرتے ہیں: نبی کریم صلی اللہ علیہ وسلم رکوع میں ”سبحان ربی العظیم وبحمدہ“ تین مرتبہ پڑھتے تھے اور سجدے میں ”سبحان ربی الاعلیٰ“ تین مرتبہ پڑھتے تھے۔ [سنن الدارقطني/ كِتَابُ الصَّلَاةِ/حدیث: 1292]

سیدنا عبداللہ بن مسعود رضی اللہ عنہ بیان کرتے ہیں: یہ بات سنت ہے کہ آدمی رکوع میں ”سبحان ربی العظیم وبحمدہ“ اور سجدے میں ”سبحان ربی الاعلیٰ وبحمدہ“ پڑھے۔ [سنن الدارقطني/ كِتَابُ الصَّلَاةِ/حدیث: 1293]

سیدنا علی بن ابوطالب رضی اللہ عنہ بیان کرتے ہیں: نبی کریم صلی اللہ علیہ وسلم جب فرض نماز میں سجدے میں جاتے تھے، تو یہ پڑھتے تھے: ”اے اللہ! میں نے تیرے لیے سجدہ کیا، میں تجھ پر ایمان لایا اور میں نے تیرے لیے اسلام قبول کیا، تو میرا پروردگار ہے، میرا چہرہ اس ذات کی بارگاہ میں سربسجود ہے جس نے اسے پیدا کیا، اسے شکل و صورت عطا کی، اسے سماعت اور بصارت نصیب کی، تو اللہ تعالیٰ کی ذات برکت والی ہے، سب سے عظیم خالق ہے۔“ نبی کریم صلی اللہ علیہ وسلم جب رکوع میں جاتے تھے، تو یہ پڑھتے تھے: ”اے اللہ! میں نے تیرے لیے ہی رکوع کیا، میں تجھ پر ایمان لایا، میں نے تیرے لیے اسلام قبول کیا، تو میرا پروردگار ہے، میری سماعت، میری بصارت، میرا مغز، میری ہڈیاں، میرا پورا وجود اللہ کی بارگاہ میں جھکا ہوا ہے جو تمام جہانوں کا پروردگار ہے۔“ نبی کریم صلی اللہ علیہ وسلم جب فرض نماز میں رکوع سے سر اٹھاتے، تو یہ پڑھتے تھے: ”اے اللہ، اے ہمارے پروردگار! تمام حمد تیرے لیے مخصوص ہے جو اتنی ہو جو آسمانوں کو بھرے اور زمین کو بھرے اور اس کے علاوہ جس چیز کو تو چاہے اسے بھی بھر دے۔“ اس روایت کی سند صحیح حسن ہے۔ [سنن الدارقطني/ كِتَابُ الصَّلَاةِ/حدیث: 1294]

ایک اور سند کے حوالے سے یہ بات منقول ہے، جس میں یہ الفاظ ہیں: نبی کریم صلی اللہ علیہ وسلم جب رکوع میں جاتے، اس میں بطور خاص رکوع کا ذکر ہے، دوسری چیزوں کا ذکر نہیں ہے۔ ایک روایت میں یہ الفاظ ہیں: میری ہڈیاں اور میرے پٹھے۔ [سنن الدارقطني/ كِتَابُ الصَّلَاةِ/حدیث: 1295]

سیدنا جبیر بن مطعم رضی اللہ عنہ بیان کرتے ہیں: نبی کریم صلی اللہ علیہ وسلم جب رکوع میں جاتے، تو ”سبحان ربی العظیم“ تین مرتبہ پڑھتے تھے۔ [سنن الدارقطني/ كِتَابُ الصَّلَاةِ/حدیث: 1296]

عبید اللہ بن عبداللہ رحمہ اللہ اپنے والد کا یہ بیان نقل کرتے ہیں: مجھے نبی کریم صلی اللہ علیہ وسلم کے بارے میں یہ بات یاد ہے کہ آپ صلی اللہ علیہ وسلم رکوع میں تین مرتبہ ”سبحان ربی العظیم“ پڑھتے تھے۔ [سنن الدارقطني/ كِتَابُ الصَّلَاةِ/حدیث: 1297]

سیدنا ابوہریرہ رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”جب کوئی شخص رکوع کرے، تو تین مرتبہ تسبیح پڑھے، کیونکہ وہ اپنے جسم کے ساتھ تسبیح پڑھ رہا ہو گا اور اس کے ساتھ تین سو تینتیس ہڈیاں اور تین سو تینتیس رگیں اللہ کی تسبیح بیان کر رہی ہوں گی۔“ [سنن الدارقطني/ كِتَابُ الصَّلَاةِ/حدیث: 1298]

سیدنا عبداللہ بن مسعود رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی: ”جب کوئی شخص رکوع میں تین مرتبہ ’سبحان ربی العظیم‘ پڑھ لے، تو اس کا رکوع مکمل ہو جائے گا، یہ اس کی کم از کم مقدار ہے۔ پاک ہے وہ ذات جو ہر عیب سے پاک ہے، جو فرشتوں کا اور جبرائیل امین کا پروردگار ہے۔“ [سنن الدارقطني/ كِتَابُ الصَّلَاةِ/حدیث: 1299]

سیدہ عائشہ رضی اللہ عنہا بیان کرتی ہیں: نبی کریم صلی اللہ علیہ وسلم رکوع میں یہ دعا پڑھتے تھے: ... [سنن الدارقطني/ كِتَابُ الصَّلَاةِ/حدیث: 1300]

راوی کہتے ہیں: میں نے سلیمان بن حرب سے دریافت کیا: شعبہ نے یہ بات بیان کی ہے: ہشام نے مجھے یہ روایت بیان کی ہے، انہوں نے فرمایا: انہوں نے یہی بات بیان کی ہے۔ [سنن الدارقطني/ كِتَابُ الصَّلَاةِ/حدیث: 1301]