سیدنا عمر رضی اللہ عنہ کے بارے میں منقول ہے: انہوں نے میاں بیوی کے درمیان علیحدگی کروا دی تھی، راوی بیان کرتے ہیں: ”اس سے مراد وہ شخص ہے، جس نے حالت احرام میں شادی کر لی تھی۔“ [سنن الدارقطني/ كِتَابُ النِّكَاحِ/حدیث: 3646]

قدامہ کہتے ہیں: میں نے سعید بن مسیب سے حالت احرام والے شخص کے شادی کرنے کے بارے میں دریافت کیا، تو انہوں نے فرمایا: ”ان دونوں میاں بیوی کے درمیان علیحدگی کروا دی جائے گی۔“ [سنن الدارقطني/ كِتَابُ النِّكَاحِ/حدیث: 3647]

سیدنا عثمان غنی رضی اللہ عنہ روایت کرتے ہیں: نبی کریم صلی اللہ علیہ وسلم نے ارشاد فرمایا: ”حالت احرام والا شخص نہ خود نکاح کر سکتا ہے، نہ کسی کا نکاح کروا سکتا ہے۔“ [سنن الدارقطني/ كِتَابُ النِّكَاحِ/حدیث: 3648]

عکرمہ بن خالد بیان کرتے ہیں: میں نے سیدنا عبداللہ بن عمر رضی اللہ عنہما سے ایسی خاتون کے بارے میں دریافت کیا، جس کے ساتھ کوئی ایسا شخص شادی کرنا چاہتا ہے، جو مکہ سے باہر ہے اور وہ عمرہ یا حج کرنے کے لیے جا رہا ہے، تو انہوں نے فرمایا: ”جب تم حالت احرام میں ہو، تو شادی نہ کرو، کیونکہ نبی کریم صلی اللہ علیہ وسلم نے اس سے منع کیا ہے۔“ [سنن الدارقطني/ كِتَابُ النِّكَاحِ/حدیث: 3649]

سیدنا عبداللہ بن عمر رضی اللہ عنہما نبی کریم صلی اللہ علیہ وسلم کا یہ فرمان نقل کرتے ہیں: ”حالت احرام والا شخص نہ خود نکاح کر سکتا ہے، نہ کسی کا نکاح کروا سکتا ہے، اور نہ ہی نکاح کا پیغام دے سکتا ہے۔“ [سنن الدارقطني/ كِتَابُ النِّكَاحِ/حدیث: 3650]

نافع، سیدنا ابن عمر رضی اللہ عنہما کے حوالے سے نقل کرتے ہیں: انہوں نے نبی کریم صلی اللہ علیہ وسلم کے فرمان کے طور پر یہ بات نقل کی کہ آپ صلی اللہ علیہ وسلم نے فرمایا: ”حالت احرام والا شخص نہ خود نکاح کر سکتا ہے، نہ کسی کا نکاح کروا سکتا ہے، نہ کسی کو (اپنی) شادی کا پیغام دے سکتا ہے، نہ کسی کی طرف سے شادی کا پیغام دے سکتا ہے۔“ [سنن الدارقطني/ كِتَابُ النِّكَاحِ/حدیث: 3651]

سیدنا انس رضی اللہ عنہ روایت کرتے ہیں: نبی کریم صلی اللہ علیہ وسلم نے ارشاد فرمایا: ”حالت احرام والا شخص نہ خود شادی کر سکتا ہے، نہ کسی کی شادی کروا سکتا ہے۔“ [سنن الدارقطني/ كِتَابُ النِّكَاحِ/حدیث: 3652]

سیدنا عبداللہ بن عمر رضی اللہ عنہما بیان کرتے ہیں: نبی کریم صلی اللہ علیہ وسلم نے جب سیدہ میمونہ رضی اللہ عنہا کے ساتھ شادی کی تھی، آپ صلی اللہ علیہ وسلم اس وقت حالت احرام میں نہیں تھے۔ [سنن الدارقطني/ كِتَابُ النِّكَاحِ/حدیث: 3653]

سیدہ میمونہ رضی اللہ عنہا بیان کرتی ہیں: نبی کریم صلی اللہ علیہ وسلم نے جب ان کے ساتھ شادی کی تھی، آپ صلی اللہ علیہ وسلم اس وقت حالت احرام میں نہیں تھے، اور جب سیدہ میمونہ رضی اللہ عنہا کی رخصتی ہوئی، تو اس وقت نبی کریم صلی اللہ علیہ وسلم حالت احرام میں نہیں تھے۔ [سنن الدارقطني/ كِتَابُ النِّكَاحِ/حدیث: 3654]

یزید بن اصم بیان کرتے ہیں: نبی کریم صلی اللہ علیہ وسلم نے جب سیدہ میمونہ رضی اللہ عنہا کے ساتھ شادی کی تھی، آپ صلی اللہ علیہ وسلم اس وقت حالت احرام میں نہیں تھے، اور جب سیدہ میمونہ رضی اللہ عنہا کی رخصتی ہوئی، تو اس وقت بھی نبی کریم صلی اللہ علیہ وسلم حالت احرام میں نہیں تھے، سیدہ میمونہ رضی اللہ عنہا کا انتقال سرف کے مقام پر ہوا۔ [سنن الدارقطني/ كِتَابُ النِّكَاحِ/حدیث: 3655]