یونس اور منصور نے حسن بصری رحمہ اللہ سے روایت کی کہ جب ایک عورت کسی مرد اور اس کی بیوی کے بارے میں گواہی دے کہ اس نے دونوں کو دودھ پلایا ہے تو حسن بصری رحمہ اللہ نے ایک مرتبہ فرمایا: ”اگر وہ معتبر ہو۔“ اور دوسری مرتبہ فرمایا: ”اگر وہ عادل ہو تو اس سے اللہ کی قسم لی جائے کہ اس نے انہیں دودھ پلایا ہے، اگر وہ قسم اٹھا لے تو ان دونوں کے درمیان جدائی کر دی جائے۔“ ہشیم نے کہا: ”ہم اس پر عمل نہیں کرتے۔“ [سنن سعید بن منصور/كِتَابُ النِّكَاحِ/حدیث: 2171]

حضرت حسن بصری رحمہ اللہ سے روایت ہے کہ وہ فرمایا کرتے تھے: ”آدمی اپنے بچے کے لیے یہودیہ، نصرانیہ اور فاجرہ (بری عورت) سے دودھ پلوا سکتا ہے۔“ [سنن سعید بن منصور/كِتَابُ النِّكَاحِ/حدیث: 2172]

حضرت ابراہیم نخعی رحمہ اللہ سے بھی اسی طرح روایت ہے، البتہ انہوں نے فاجرہ کا ذکر نہیں کیا۔ [سنن سعید بن منصور/كِتَابُ النِّكَاحِ/حدیث: 2173]

عمر بن حبیب، ایک آدمی سے (جو غالباً کینانہ قبیلے کا عتواری تھا) روایت کرتے ہیں، وہ کہتا ہے: میں عبداللہ بن عمر رضی اللہ عنہما کے پاس بیٹھا تھا، انہوں نے پوچھا: ”کیا تم فلاں قبیلے سے ہو؟“ میں نے کہا: ”نہیں، البتہ انہوں نے مجھے دودھ پلایا ہے۔“ تو سیدنا عمر بن خطاب رضی اللہ عنہم نے فرمایا: ”دودھ کے بارے میں شبہ ہو سکتا ہے۔“ [سنن سعید بن منصور/كِتَابُ النِّكَاحِ/حدیث: 2174]