سیدنا عبداللہ بن عمر رضی اللہ عنہ، روایت کرتے ہیں: نبی اکرم صلی اللہ علیہ وسلم نے ارشاد فرمایا ہے: ”مجھے اس بات کا حکم دیا گیا ہے، میں لوگوں کے ساتھ اس وقت تک جنگ کرتا رہوں، جب تک وہ اس بات کی گواہی نہ دیں کہاللہ تعالیٰ کے علاوہ اور کوئی معبود نہیں ہے، اور میں اللہ کا رسول ہوں اور وہ نماز قائم کریں اور زکوۃ ادا کریں، جب وہ ایسا کر لیں گے، تو اپنی جانوں اور اپنے اموال کو مجھ سے محفوظ کر لیں گے، البتہ اسلام کے حق کا معاملہ مختلف ہے، اور ان لوگوں کا حساباللہ تعالیٰ کے ذمہ ہو گا۔“ (امام ابن حبان رحمہ اللہ فرماتے ہیں:) اس روایت کو نقل کرنے میں شعبہ نامی راوی منفرد ہے، اور اس روایت میں اس بات کا واضح بیان موجود ہے کہ ایمان کے اجزاء اور شعبے ہوتے ہیں، جو اس بارے میں مخاطب لوگوں کے احوال کے حوالے سے مختلف ہوتے ہیں، کیونکہ نبی اکرم صلی اللہ علیہ وسلم نے اس روایت میں اس بات کا تذکرہ کیا ہے۔ ”یہاں تک کہ وہ لوگ اس بات کی گواہی دیں گےاللہ تعالیٰ کے علاوہ اور کوئی معبود نہیں ہے، اور بے شک میں اللہ کا رسول ہوں۔“ تو اس میں اس بات کی طرف اشارہ موجود ہے کہ یہ وہ شعبہ ہے، جو تمام مخاطب لوگوں پر تمام حالتوں میں فرض ہے۔ پھر آپ نے یہ فرمایا اور وہ نماز قائم کریں، تو نبی اکرم صلی اللہ علیہ وسلم نے اس چیز کا تذکرہ کیا ہے، جو مخاطب لوگوں پر بعض حالتوں میں فرض ہوتی ہے۔ پھر آپ نے فرمایا اور وہ زکوۃ ادا کریں، تو نبی اکرم صلی اللہ علیہ وسلم نے اس چیز کا تذکرہ کیا ہے، جو مخاطب لوگوں پر بعض حالتوں میں فرض ہوتی ہے۔ تو یہ بات اس بات پر دلالت کرتی ہے کہ تمام نیکیوں، جو ان تین چیزوں کے ساتھ مشابہت رکھتی ہے، جس کا آپ نے اس روایت میں ذکر کیا ہے یہ سب ایمان کا حصہ ہیں۔ [صحیح ابن حبان/كِتَابُ الإِيمَانِ/حدیث: 175]