سیدنا عبداللہ بن عمر رضی اللہ عنہما کہتے ہیں کہ ایک رات رسول اللہ صلی اللہ علیہ وسلم کسی کام میں مشغول ہو گئے اور نماز (عشاء) میں بہت تاخیر کر دی، حتیٰ کہ ہم لوگ مسجد میں سو گئے، پھر جاگے، پھر سو گئے، پھر جاگے، پھر سو گئے، پھر کہیں آپ صلی اللہ علیہ وسلم تشریف لائے اور فرمایا: ”تمہارے علاوہ اور کوئی نماز کا انتظار نہیں کر رہا۔“ [سنن ابي داود/كِتَاب الطَّهَارَةِ/حدیث: 199]

سیدنا انس رضی اللہ عنہ کہتے ہیں کہ ”اصحاب رسول صلی اللہ علیہ وسلم نماز عشاء کا انتظار کرتے رہتے تھے حتیٰ کہ ان کے سر (نیند کے باعث) جھک جھک جاتے تھے۔ پھر وہ نماز پڑھ لیتے اور (نیا) وضو نہ کرتے تھے۔“ امام ابوداؤد رحمہ اللہ کہتے ہیں کہ ”شعبہ کی قتادہ سے روایت میں یہ اضافہ ہے کہ رسول اللہ صلی اللہ علیہ وسلم کے زمانے میں ہمارے سر (نیند کے باعث) جھک جایا کرتے تھے۔“ امام ابوداؤد رحمہ اللہ کہتے ہیں کہ ”ابن ابی عروبہ نے قتادہ سے دوسرے الفاظ سے بیان کیا ہے۔“ [سنن ابي داود/كِتَاب الطَّهَارَةِ/حدیث: 200]

سیدنا انس رضی اللہ عنہ نے بیان کیا کہ ”نماز عشاء کی اقامت کہی جا چکی تھی کہ ایک شخص کھڑا ہوا اور کہنے لگا: اے اللہ کے رسول! مجھے آپ سے کام ہے۔ چنانچہ وہ آپ صلی اللہ علیہ وسلم سے سرگوشیاں کرنے لگا، حتیٰ کہ قوم کو یا ان میں سے کچھ کو اونگھ آنے لگی، اس کے بعد آپ صلی اللہ علیہ وسلم نے نماز پڑھائی اور (سیدنا انس رضی اللہ عنہ نے) وضو کرنے کا ذکر نہیں کیا۔“ [سنن ابي داود/كِتَاب الطَّهَارَةِ/حدیث: 201]

سیدنا ابن عباس رضی اللہ عنہما سے مروی ہے کہ رسول اللہ صلی اللہ علیہ وسلم سجدہ کرتے اور (بعض اوقات اس میں) سو جاتے اور خراٹے لینے لگتے، پھر کھڑے ہوتے اور نماز پڑھنے لگتے اور وضو نہ کرتے۔ میں نے (ایک بار) عرض کیا کہ آپ نے نماز پڑھ لی اور وضو نہیں کیا، حالانکہ آپ سو گئے تھے، تو آپ صلی اللہ علیہ وسلم نے فرمایا: ”وضو اس پر ہے جو لیٹ کر سوئے۔“ عثمان اور ہناد نے اضافہ کیا: ”انسان جب لیٹ جاتا ہے تو اس کے جوڑ ڈھیلے ہو جاتے ہیں۔“ امام ابوداؤد رحمہ اللہ کہتے ہیں کہ: ”اس روایت میں یہ ٹکڑا ”وضو اس پر ہے جو لیٹ کر سوئے“ منکر ہے، اسے صرف یزید ابوخالد دالانی نے قتادہ سے روایت کیا ہے، جبکہ اس روایت کا ابتدائی حصہ ایک جماعت نے سیدنا ابن عباس رضی اللہ عنہما سے نقل کیا ہے مگر وہ یہ ٹکڑا بیان نہیں کرتے۔“ اور (عکرمہ) کہتے ہیں کہ نبی کریم صلی اللہ علیہ وسلم (دل کی نیند سے) محفوظ تھے اور سیدہ عائشہ رضی اللہ عنہا کہتی ہیں کہ نبی کریم صلی اللہ علیہ وسلم نے فرمایا: ”میری آنکھیں سوتی ہیں، مگر دل نہیں سوتا۔“ شعبہ کہتے ہیں کہ قتادہ نے ابوالعالیہ سے چار حدیثیں سنی ہیں: پہلی حدیث یونس بن متی علیہ السلام کے متعلق، دوسری سیدنا ابن عمر رضی اللہ عنہما کی حدیث جو نماز کے بارے میں ہے، تیسری وہ حدیث کہ قاضی تین قسم کے ہوتے ہیں اور چوتھی سیدنا ابن عباس رضی اللہ عنہما کی حدیث کہ مجھے معتمد اور پسندیدہ افراد نے حدیث بیان کی ان میں سے ایک عمر رضی اللہ عنہ ہیں اور ان میں سب سے زیادہ قابل اعتماد اور پسندیدہ میرے نزدیک عمر رضی اللہ عنہ ہی ہیں۔ امام ابوداؤد رحمہ اللہ کہتے ہیں کہ: ”میں نے یزید دالانی کی حدیث امام احمد بن حنبل رحمہ اللہ کے سامنے پیش کی تو انہوں نے مجھ کو اس کی (انتہائی) کمزوری کے باعث ڈانٹ دیا اور کہا کہ یزید دالانی کو کیا ہوا کہ مشائخ قتادہ کی روایات میں (وہ کچھ) داخل کر دیتا ہے (جو ان میں نہیں ہوتا) اور اس حدیث کو انہوں نے کوئی اہمیت نہ دی۔“ [سنن ابي داود/كِتَاب الطَّهَارَةِ/حدیث: 202]

سیدنا علی رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ”آنکھیں سرین کا تسمہ ہیں، تو جو سو جائے وہ وضو کرے۔“ [سنن ابي داود/كِتَاب الطَّهَارَةِ/حدیث: 203]