ابوعبید، جو ابن اظہر کے آزاد کردہ غلام ہیں، بیان کرتے ہیں: میں عید کے موقع پر سیدنا عمر بن خطاب رضی اللہ عنہ کے ہمراہ شریک ہوا، وہ تشریف لائے اور انہوں نے نماز ادا کی۔ جب انہوں نے نماز مکمل کی تو لوگوں کو خطبہ دیتے ہوئے ارشاد فرمایا: یہ دو دن ایسے ہیں جن میں روزہ رکھنے سے نبی اکرم صلی اللہ علیہ وسلم نے منع فرمایا ہے: ”ایک وہ دن جس دن تم اپنے روزوں کے بعد عید الفطر مناتے ہو اور دوسرا وہ دن جس دن میں تم اپنی قربانی کا گوشت کھاتے ہو۔“ ابوعبید بیان کرتے ہیں: میں نے سیدنا عثمان بن عفان رضی اللہ عنہ کی اقتدا میں بھی عید کی نماز میں شرکت کی، وہ تشریف لائے اور انہوں نے نماز ادا کی۔ جب انہوں نے نماز مکمل کی تو خطبہ دیتے ہوئے ارشاد فرمایا: آج کے دن تم لوگوں کی دو عیدیں اکٹھی ہو گئی ہیں (یعنی آج عید کے دن جمعہ بھی ہے)، تو نواحی علاقوں کے رہنے والے لوگوں میں سے جو شخص جمعہ کا انتظار کرنا چاہے، وہ اس کا انتظار کرے اور جو شخص واپس جانا چاہے، وہ واپس چلا جائے، میں اسے اجازت دیتا ہوں۔ ابوعبید بیان کرتے ہیں: پھر میں نے سیدنا علی بن ابی طالب رضی اللہ عنہ کی اقتدا میں نمازِ عید میں شرکت کی، اس وقت سیدنا عثمان رضی اللہ عنہ (گھر میں) محصور کر دیے گئے تھے، پس وہ تشریف لائے اور انہوں نے نماز ادا کی۔ جب انہوں نے نماز مکمل کی تو لوگوں کو خطبہ دیا۔ [صحیح ابن حبان/كِتَابُ الصَّوْمِ/حدیث: 3600]